El maga Testigo de Jehova ta respeta con el gobierno y con el maga simbolo que ta representa con este. Ta acepta kame que el otro posible decidi que promete que esta leal na nacion, saluda na bandera o canta con el national anthem.

 Pero, el maga Testigo de Jehova ta iscuji que gendeh participa con este maga ceremonia cay ta creé kame que este ta anda contra na enseñanza na Biblia. Ta aprecia kame si ta respeta el otro con el diamon creencia igual si paquemodo kame ta respeta kanila.

Na este articulo

•  Cosa maga enseñanza na Biblia el envuelto?

•  Paquemodo si tiene ley que necesita participa con ese maga ceremonia?

•  Tiene ba con quien ta man afavor el maga Testigo de Jehova si acerca na maga issue del comunidad y politica?

 El siguiente dos enseñanza na Biblia amo el razon del diamon decision:

•   Con Dios lang debe adora. El Biblia ta habla: “Adora con el Señor, el dituyu Dios, con ele lang gayot sirvi.” (Lucas 4:8, El Nuevo Testamento na Chavacano) El maga promesa de lealtad y maga national anthem ta contene maga palabra que donde el un persona ta promete que suporta y hace le una con el de suyu nacion contra na maskin cosa. Poreso, el maga Testigo de Jehova ta pensa que gendeh justo para kanila que participa con ese maga ceremonia.

   Ta pensa tambien el maga Testigo de Jehova que si el un persona ta saluda con el bandera, un acto este de adoranza o idolatria que ta condena el Biblia. (1 Corinto 10:14) El cuanto maga historian ta creé que el maga bandera amo un simbolo de religion. “El bandera amo el simbolo del fe y centro del adoranza del nacionalismo,” ya habla el un historian que si Carlton J. H. Hayes. a Acerca na maga Cristiano del primer siglo, ya habla el un autor que si Daniel P. Mannix: “El maga Cristiano nuay conforma que ofrece . . . sacrificio con el espiritu que ta vicia con el [Romano] emperador—dol igual tambien se na maga Cristiano ahora que gendeh ta saluda bandera.” b

  Maskin pa el maga Testigo de Jehova gendeh ta saluda con el bandera, gendeh tambien kame ta hace mabuling con este, ta quema o hace maskin cosa que gendeh ta dale mira respeto con este o con el otro maga simbolo del nacion.

•   Igual el todo gente na mirada del Dios. (Maga Actividad 10:34, 35) El Biblia ya habla que el Dios “ya crea un gente . . . y ya sale con ese todo el maga raza de gente.” (Maga Actividad 17:26, El Nuevo Testamento) Por causa con ese razon, el maga Testigo de Jehova ta creé que gendeh justo considera con el un raza o nacionalidad que mas alto que con otro. Ta dale kame mira respeto con todo gente maskin onde pa sila estaba o onde sila ta queda.—1 Pedro 2:17.

 El maga Testigo de Jehova gendeh tan contra con el gobierno. Ta creé kame que el maga gobierno amo parte del arreglamiento o “plano del Dios” que ta permiti le existi. (Roma 13:1-7) Ta creé tambien kame que el maga Cristiano debe obedece con el secular autoridad.—Lucas 20:25.

 Pero, paquemodo si el secular ley ta anda contra con el ley del Dios? Na cuanto maga situacion, posible que puede pidi na gobierno que hace maga cambio na ley. c Si gendeh posible este maga cambio, el maga Testigo de Jehova con respeto ta iscuji que “obedece con el Dios, y gendeh con el maga gente.”—Maga Actividad 5:29.

 Nuay. El maga Testigo de Jehova nuay con quien ta man afavor acerca con ese maga issue. Maskin gendeh kame ta hace promesa de lealtad, saluda con el bandera o canta con el national anthem, gendeh este quierre decir que maga activista kame. Sino, ta sigui kame con el diamon creencia que base na Biblia acerca con ese maga ceremonia.