Falso: El maga Testigo de Jehova gendeh ta creé que puede kanila ayuda el maga doctor poreso gendeh sila ta acepta curada medical.

 Verdad: Quierre kame el de con todo buen clase de cura para na diamon mismo cuerpo y na diamon familia. Si tiene kame problema na salud, ta anda kame na doctor quien puede dale curada medical o hace operacion que gendeh envuelto el usada de sangre. Ta aprecia kame el progreso na medicina. Gane, el maga manera de curada que gendeh ta usa sangre que ya hace para na maga Testigo de Jehova, ta usa ya ahora na otro maga paciente. Na manada maga nacion, puede ya evita el maga paciente con el maga peligro igual na enfermedad que puede saca na sangre, maga complicacion y posibilidad que man kamali na abonada de sangre.

 Falso: Ta creé el maga Testigo de Jehova que el fe puede cura con el maga enfermedad del un persona.

 Verdad: Gendeh kame ta creé na faith healing.

 Falso: Grande el gasto si evita abona sangre.

 Verdad: Menos el gasto del maga curada que nuay abonada de sangre. a

 Falso: Manada del maga Testigo de Jehova el ta muri cada año, incluido el maga bata, cay gendeh sila ta acepta abonada de sangre.

 Verdad: Nuay basejan ese informacion. El maga doctor regular ta hace maga operacion igual na organ transplant y operacion na corazon y bukuk sin abonada de sangre. b El maga paciente, incluido maga bata quien nuay abona sangre, mas pronto ta queda bueno compara con aquellos quien ya abona sangre. c Na maskin cosa situacion, nuay quien puede dale garantia que muri el un paciente si gendeh le abona sangre o vivi le si acepta le con ese.

 Por causa este na cosa kame ta creé. El Daan y Nuevo Testamento claro ta manda kanaton que evita con el sangre. (Genesis 9:4; Levitico 17:10; Deuteronomio 12:23; Maga Actividad 15:28, 29) Y para con Dios, el sangre ta representa con el vida. (Levitico 17:14) Poreso, ta evita kame abona sangre gendeh lang cay ta obedece kame con Dios sino por causa cay ta respeta tambien kame con ele como el Tuburan del vida.

 Para con el maga doctor de antes, peligroso el operacion que gendeh ta usa sangre. Pero cuanto año ya pasa, ya cambia el diila opinion. Por ejemplo, del 2004, el un articulo del magasin que acerca na educacion de medicina ya habla que “manada na maga manera de curada que ya hace para na maga paciente que Testigo de Jehova hay usa ya na maga venedero año.” d Del 2010, el un articulo na magasin Heart, Lung and Circulation ya habla que “‘el operacion que gendeh ta usa sangre’ gendeh lang debe para na maga Testigo de Jehova sino debe usa ya con ese el maga doctor na diila maga operacion.”

 Miles del maga doctor na entero mundo el ta usa ya ahora maga manera de operacion que nuay envuelto abonada de sangre. Este manera de curada ta usa ya maskin na maga progresivo nacion y manada paciente ta iscuji tambien con ese maskin gendeh sila maga Testigo de Jehova.