Falso: El maga Testigo de Jehova gendeh ta celebra Christmas cay gendeh sila ta creé con Jesus.

 Verdad: Cristiano kame. Ta creé kame que posible el salvacion por medio lang con Jesucristo.​—Maga Actividad 4:12.

 Falso: Ta causa ustedes division na familia cay ta enseña ustedes con el maga gente que no celebra Christmas.

 Verdad: Ta dale kame grande importancia na familia y ta usa kame con el Biblia para hace mas fuerte con el relacion entre na familia.

 Falso: Gendeh ustedes ta puede experiencia el pagka-bondadoso, paz y pagka-bueno entre na maga gente durante el Christmas.

 Verdad: Ta hace kame esfuerzo para mentena con el paz y queda bondadoso cada dia. (Proverbio 11:25; Roma 12:18) Por ejemplo, na diamon maga miting y predicacion ta sigui kame con el instruccion de Jesus que: “Ya recivi ustedes libre; dale lang tamen libre.” (Mateo 10:8) Mas pa, ta enseña kame que el Reino del Dios amo solamente el puede dale paz na tierra.​—Mateo 10:7.

•   Si Jesus ya manda kanaton que comemora con el de suyu muerte, gendeh de suyu nacimiento.​—Lucas 22:19, 20.

•   Nuay celebra Christmas el maga apostoles y dicipulo de Jesus de antes. El New Catholic Encyclopedia ya habla que “el celebracion del Navidad [nacimiento de Jesus] ya principia lang del 243 [C.E.],” mas de un siglo despues del muerte del ultimo apostol.

•   Nuay prueba que si Jesus ya nace del Deciembre 25; nuay na Biblia el fecha del de suyu nacimiento.

•   Ta creé kame que gendeh aceptable con Dios el Christmas cay ya origina este na maga ritual y tradicion de pagano.​—2 Corinto 6:17.

 Manada siempre el ta celebra Christmas maskin sabe sila que ya origina este na maga pagano y gendeh este base na Biblia. Posible que pregunta sila: Gendeh ba puede sigui ya lang el maga Cristiano na cosa ta hace el otro?

 El Biblia ta anima kanaton que usa con el diaton abilidad para examina con el un cosa. (Roma 12:1, 2) Ta enseña este kanaton que dale importancia con el verdad. (Juan 4:23, 24) Poreso, maskin quierre kame que tiene buen impresion el otro kanamon, ta sigui kame con el maga principio na Biblia maskin pa otro este na cosa ta hace el mayoria.

 Gendeh kame ta celebra Christmas pero ta respeta kame con el derecho del otro que decidi si celebra ba le con ese o gendeh. Gendeh kame ta sangga con otro que celebra con ese.