Falso: El maga Testigo de Jehova gendeh ta celebra Easter, el celebracion del resureccion de Jesus, cay gendeh sila maga Cristiano.

 Verdad: Ta creé kame que si Jesucristo el diaton Salvador y ta hace kame esfuerzo para “sigui na disuyo maga paso.”—1 Pedro 2:21; Lucas 2:11.

 Falso: Gendeh ustedes ta creé que ya resucita con Jesus.

 Verdad: Ta creé kame que ya resucita con Jesus; importante este na diamon creencia y incluido este na maga cosas que ta predica kame.—1 Corinto 15:3, 4, 12-15.

 Falso: No quierre ustedes que man enjoy el de ustedes maga anak celebra con el Easter.

 Verdad: Ta ama kame con el diamon maga anak. Ta hace kame esfuerzo para man train kanila y ta ayuda kame kanila para queda alegre.—Tito 2:4.

•   Gendeh base na Biblia el celebracion de Easter.

•   Si Jesus ya manda que comemora kita con el de suyu muerte, gendeh el de suyu resureccion. Ta hace kame con este Comemoracion na aniversario del de suyu muerte asegun na lunar calendar na tiempo del Biblia.—Lucas 22:19, 20.

•   Ta creé kame que gendeh aceptable con Dios el Easter cay estaba este na maga ritual de sexo de antes. Quierre el Dios que dale kita con ele el diaton “exclusivo devocion” y ta sinti le duele si ta inclui kita na diaton adoranza el maga practica que gendeh aceptable con ele.—Exodo 20:5; 1 Rey 18:21.

 Ta creé kame que el diamon decicion que gendeh celebra Easter amo base gayot na Biblia. Este ta anima kanaton que usa con el ‘sabeduria y con el diaton pensamiento’ y gendeh lang basta sigui con el tradicion del maga gente. (Proverbio 3:21; Mateo 15:3) Si ta pregunta el otro, tan share kame si cosa kame ta creé acerca na celebracion de Easter. Pero ta respeta tambien kame con el derecho del cada individual que hace de suyu mismo decicion acerca con este celebracion.—1 Pedro 3:15.