Gendeh. Regular kame ta anda predica na casa en casa pero gendeh kame ta creé que por causa de ese puede kame obtene salvacion. (Efeso 2:8) Porque?

 Considera con este ilustracion: Imagina que tiene un buen gente que ya promete dale un regalo con todo quien hay anda na un locacion na especifico fecha. Si ta creé tu con el cosa ya promete el gente, siempre sigui gayot tu con el de suyu instruccion. Posible hay habla pa gane tu se na de tuyu maga amigo y familia para puede tambien sila beneficia con ese regalo. Maskin pa sigui tu con el instruccion del gente, gendeh este quierre decir que tiene tu derecho para ricibi con ese regalo. Hay ricibi tu se cay quierre le se dale contigo.

 Na igual manera, el maga Testigo de Jehova ta creé con el promesa del Dios que hay dale le vida hasta para cuando con aquellos quien ta obedece con ele. (Roma 6:23) Ta pricura kame man share con otro el cosa kame ta creé con esperanza que hay beneficia tambien sila con el promesa del Dios. Pero gendeh kame ta creé que obtene kame salvacion por medio na diamon predicacion. (Roma 1:17; 3:28) El deverasan, nuay gente quien puede hace cosa para tiene derecho obtene ese clase de bendicion estaba con Dios. El Biblia ya habla que ya salva le kanaton “hende por causa del maga buen accion que ya hace kita, sino por el di suyo lastima.”—Tito 3:5, El Nuevo Testamento.