Gendeh un culto el maga Testigo de Jehova. Maga Cristiano kame quien ta hace esfuerzo que imita con el ejemplo de Jesucristo y sigui na de suyu maga enseñanza.

 Otro-otro el entendimiento del maga gente na termino “culto.” Pero, considera este dos comon idea acerca na culto y si porque se gendeh aplicable kanamon.

•   El cuanto ta pensa que el culto amo un religion que nuevo o gendeh comon. Nuay establicia un nuevo religion el maga Testigo de Jehova. Sino tan base kame diamon adoranza na maga Cristiano del primer siglo, de quien ejemplo y enseñanza escribido na Biblia. (2 Timoteo 3:​16, 17) Ta creé kame que debe man base na Sagrao Escritura si cosa el aceptable manera de adoranza.

•   El cuanto ta pensa que el culto amo un peligroso secta de religion que donde tiene un gente quien ta sirvi como lider. Nuay gente quien ta sirvi como lider del maga Testigo de Jehova. Sino ta sigui kame na cosa ya enseña si Jesus con el de suyu maga siguidores cuando ya habla le: “Tiene ustedes un Señor [“Lider,” NW] lang quien el Cristo.”​—Mateo 23:10, El Nuevo Testamento.

 Gendeh un peligroso secta el maga Testigo de Jehova sino ta sigui kame na un manera de adoranza que donde kame mismo el quien ta beneficia y el otro na comunidad. Por ejemplo, el diamon ministerio ya puede ayuda con el manada maga gente para deja con el diila mal vicio igual como el usada de droga prohibido y por demas de alcoholico tomada. Mas pa, na entero mundo, ta conduci kame maga clase para ayuda con el manada gente aprende le y escribi. Ta dale tambien kame ayuda si tiene maga calamidad. Ta hace kame esfuerzo para queda buen ejemplo con otro igual na cosa ya manda si Jesus con el de suyu maga siguidores.​—Mateo 5:​13-​16.