Cosa Training Ta Ricibi el Maga Testigo de Jehova?

MAN PLAY

El maga Testigo de Jehova ta continua ricibi training na todo aspeto del diila vida como maga Cristiano, incluido ya na diila ministerio. Ese ministerio amo el trabajo que ya manda si Jesus con el de suyu maga siguidores—el predicacion y enseñada del buen noticia acerca na Reino del Dios. (Mateo 24:14; 28:19, 20) Ta ricibi kame training na diamon maga miting que ta hace cada semana y na diamon maga convencion y asemblea que ta hace cada año. El maga Testigo de Jehova quien tiene maga responsibilidad na congregacion o na organizacion ta ricibi maga omento training.

Na este articulo

Cosa training ta ricibi el maga Testigo de Jehova?

Maga miting na congregacion. Cada semana, ta atende kame dos miting na maga lugar onde kame ta adora con Dios que ta llama Kingdom Hall. Ta hace con el un miting una vez adentro del dia de Lunes hasta Viernes; y ta hace con el otro miting na fin del semana. Puede atende el todo y gendeh ta colecta sen alla.

Midweek miting. Ta aprende kame si paquemodo queda bueno le, converza, dale discurso, predica y enseña. Ta puede se kame aprende por medio na maga talk, discussion, demonstracion y maga video. Ta ayuda este kanamon para queda mas efectivo si ta predica con el mensaje del Biblia con otro y si ta conduci estudiada de Biblia con aquellos interesao. Ta beneficia na este training el todo quien ta atende. Mas pa na todo, este maga miting ta ayuda kanamon para queda mas fuerte el diamon fe con Dios y el amor diamon para con ele y para na diamon maga hermano y hermana na fe.
Weekend miting. Este miting tiene dos parte. Una amo el discurso que base na Biblia que ya hace para na todo, especialmente na maga gendeh Testigo de Jehova. Na segundo parte del miting, ta discuti con el un articulo de estudiada estaba na El Torre de Guardia a y puede participa el maga ta atende. Ta discuti y ta explica na este maga articulo con el maga topico y principio na Biblia que ta ayuda kanamon na diamon ministerio y na diamon personal vida.

Maga asemblea y convencion. Tres beses na un año, tan junto-junto el maga Testigo de Jehova de diferente congregacion. El cada asemblea amo base na un especifico tema na Biblia. Tiene aqui maga discurso, drama, interview y video. Igual na diamon maga miting na congregacion, el maga asemblea y convencion mas ta omenta con el diamon saber na Biblia y ta ayuda kanamon para queda mas efectivo na predicacion y enseñada del buen noticia. Puede tambien atende el todo y gendeh ta colecta sen alla.

Omento training para na maga Testigo de Jehova

Ta invita con el cuanto maga Testigo de Jehova para ricibi omento training na diferente maga escuela del organizacion. Cosa este maga escuela? Cosa el proposito del cada escuela y paquemodo se de tarda? Quien puede atende na este maga escuela?

Pioneer Service School

Proposito: Para man train con el maga pioneer b o aquellos quien ta sirvi full-time na ministerio para queda mas efectivo na predicacion y enseñada. Durante el clase, ta discuti con el cuanto maga topico y tiene maga drama, talk y demonstracion.
Si paquemodo de tarda: Seis dia.
Si quien puede atende: Ta invita para atende con aquellos mas de un año ya ta sirvi como pioneer. Posible tambien invita otravez na este escuela con el maga pioneer quien mas de cinco año ya nuay puede atende.

School for Kingdom Evangelizers

Proposito: Para dale omento training con el maga experienciao pioneer. Na este escuela, ta ayuda con el maga estudiante para queda mas bueno predica y enseña. Ta estudia tambien sila mas hondo con el maga topico na Biblia. Ta invita con el manada de aquellos quien ya gradua na este escuela que anda na maga lugar donde tiene mas grande necesidad de maga predicador.
Si paquemodo de tarda: Dos meses.
Si quien puede atende: Puede man apply el maga pioneer si ya puede sila alcanza con el maga cualificacion y si talli sila na circumstancia para sirvi maskin onde kanila man assign.

School for Congregation Elders

Proposito: Para ayuda con el maga anciano c sabe si paquemodo sila cumpli con el diila maga responsibilidad na congregacion, igual na enseñada y visitada na maga hermano y hermana. Ta ayuda tambien este para queda mas hondo el diila amor con Dios y na maga hermano y hermana.—1 Pedro 5:2, 3.
Si paquemodo de tarda: Cinco dia.
Si quien puede atende: Maga nuevo anciano y maga experienciao anciano quien nuay pa puede atende del ya pasa cinco año.

School for Circuit Overseers and Their Wives

Proposito: Para man train con el maga circuit overseer d si paquemodo cumpli con el diila maga responsibilidad na mas efectivo manera. (1 Timoteo 5:17) Na este clase, ta ayuda tambien con este maga anciano y con el diila mujer para tene mas saber na Biblia.
Si paquemodo de tarda: Un mes.
Si quien puede atende: Ta invita con el maga nuevo circuit overseer y con el diila mujer que atende si mas de un año ya sila na diila assignment. Despues del cinco año, ta invita kanila otravez que atende.

Kingdom Ministry School

Proposito: Para ayuda con el maga anciano y siervo ministerial e que cumpli con el diila maga responsibilidad na congregacion asegun na presente situacion y necesidad del maga hermano y hermana. (2 Timoteo 3:1) Ta conduci con el escuela cada pasa cuanto año.
Si paquemodo de tarda: Depende, pero mas mucho, un dia.
Si quien puede atende: Maga circuit overseer, anciano y siervo ministerial.

Bethel Service School

Proposito: Para ayuda con el maga miembro del familia Bethel f para cumpli con el diila assignment y para hace hondo el diila amor con Dios y con uno y otro.
Si paquemodo de tarda: Cinco y media dia.
Si quien puede atende: Necesita atende na este escuela el maga nuevo ta sirvi na Bethel. Posible que invita otravez con aquellos ya dura ya ta sirvi na Bethel quien nuay pa puede atende del ya pasa cinco año.

Watchtower Bible School of Gilead

Proposito: Para ayuda con el maga estudiante tene mas hondo apresacion y entendimiento na Palabra del Dios y ayuda kanila aplica con el cosa sila ya aprende. (1 Tesalonica 2:13) El maga fiel Cristiano hombre y mujer quien ya atende na este escuela mas ta puede ayuda na organizacion de Jehova y na programa de educacion estaba na Biblia que ta hace na entero mundo. Posible man assign con aquellos ya gradua para sirvi na branch office o na otro lugar na diila nacion o na otro nacion.
Si paquemodo de tarda: Cinco meses.
Si quien puede atende: Ta iscuji el branch office con el cuanto quien ta sirvi full-time para man apply. Ta hace con el escuela na Watchtower Educational Center na Patterson, New York, na United States.

School for Branch Committee Members and Their Wives

Proposito: Para man train con el maga miembro del Branch Committee g si paquemodo mira con el trabajo que ta hace na branch office y con el maga espiritual actividad del maga Testigo de Jehova na maga nacion que incluido na teritorio del diila branch.
Si paquemodo de tarda: Dos meses.
Si quien puede atende: Ta iscuji el World Headquarters del maga Testigo de Jehova cuanto miembro del Branch Committee, incluido el diila mujer, para atende na este escuela. Ta hace con este na Watchtower Educational Center na Patterson, New York.

Onde base el training que ta dale na maga Testigo de Jehova?

El todo cosa ta enseña na maga Testigo de Jehova amo base na Biblia. Ta creé kame que estaba con Dios el Biblia, y el enseñanza alli amo el de con todo bueno para na todo aspeto del vida del un Cristiano.—2 Timoteo 3:16, 17.

Necesita ba paga el maga Testigo de Jehova para ricibi training?

Gendeh. Libre lang este. Ta hace con el maga actividad del maga Testigo de Jehova por medio na maga voluntario donacion.—2 Corinto 9:7.

a Puede mira con el Biblia, con el diamon maga publicacion que ta usa na estudiada y maga video na diamon website, jw.org.

b El pioneer amo un hombre o mujer que bautizao Testigo y un buen ejemplo con otro. Quierre le usa especifico largor de tiempo cada mes para predica y enseña con otro el mensaje del Biblia.

c El maga anciano amo maga fiel hombre Cristiano quien ya dura ya ta sirvi. Ta enseña sila usando el Biblia, ta ayuda y ta anima con el maga siervo de Jehova. Gendeh ta paga con el maga anciano para na cosa sila ta hace.

d El circuit overseer ta sirvi full-time y ta visita na diferente congregacion cada semana. Ta anima le con el de suyu maga hermano y hermana na fe por medio na maga talk que base na Biblia y ta sigui kanila na ministerio.

e El maga siervo ministerial ta hace cuanto trabajo na congregacion para dale practical ayuda na maga hermano y hermana. Como resulta, tiene mas manada tiempo el maga anciano para enseña y visita con aquellos parte del congregacion.

f Bethel el nombre del maga branch office del maga Testigo de Jehova. Aquellos quien ta sirvi alli ta suporta con el maga actividad del maga Testigo de Jehova na teritorio del diila branch.

g Tres o mas pa cualificao hermano el ta sirvi na cada Branch Committee.

Paquemodo ta beneficia el maga Testigo de Jehova na training que ta ricibi sila?

“Cay huyain yo, dificil para conmigo que man cuento con otro acerca na Biblia, especialmente si no conoce yo kanila. Pero por causa na training que ta ricibi yo na midweek miting, mas ya tiene yo confianza y mas yan improve el de mio enseñada. Mas comfortable ya tambien yo ta puede man cuento con otro na congregacion y na de mio trabajo.”—Natasha, United States.
“Ya puede ayuda conmigo el School for Kingdom Evangelizers para imita con el maga calidad de Jehova y queda mas amable, paciencioso y bueno. Ya sinti yo que ya queda yo mas buen Cristiano, amigo y vecinos. Ya aprende tambien yo si paquemodo man research maga topico na Biblia y si paquemodo explica con otro el Palabra del Dios na manera que ta alcanza na diila corazon.”—Stephen, Nigeria.
“Ya puede ayuda conmigo el School for Congregation Elders para queda mas humilde mientras ta sirvi como un anciano. Ya puede yo aprende na maga talk que bien importante sigui con el ejemplo de Jesus.”—Luca, Italy.
“Ya aprende yo na Kingdom Ministry School que bien importante que queda yo mas amable y que facil conmigo atraca el otro. Ya aprende yo que si ta hace yo cosas para con otro, debe por causa se na amor y gendeh lang cay responsibilidad se de mio.”—Samuel, United Kingdom.
“Ya puede ayuda kanamon el escuela de Gilead para examina con el diamon mismo cuerpo base na cosa kame ta aprende na Palabra del Dios. (Santiago 1:22-25) Ya puede kame mira que necesita pa gale kame hace maga cambio na diamon custumbre y si paquemodo kame ta sirvi con Jehova. Ya puede tambien kame aprende que pensa una el bien del otro y demonstra amor na todo cosa kame ta habla y ta hace.”—Elnathan y Princess, Pilipinas.