El Watch Tower Bible and Tract Society of Pennsylvania amo un corporacion que gendeh de negocio que ya forma del 1884 bajo na maga ley del Commonwealth of Pennsylvania, U.S.A. Ta usa con este el maga Testigo de Jehova para suporta con el diila trabajo na entero mundo, incluido ya el produccion del Biblia y maga publicacion que base na Biblia.

 Asegun na documento acerca na corporacion, el proposito de este amo para na “religion, enseñada y dalida de ayuda,” especialmente para “predica y enseña el evangelio acerca na Reino del Dios bajo con Cristo Jesus.” Para queda miembro del corporacion, ta invita lang con el un persona y gendeh se base na cantidad del donacion que ya dale ele. El maga miembro y director del corporacion ta asisti con el Cuerpo Gobernante del maga Testigo de Jehova.

 Puera con el Watch Tower Bible and Tract Society of Pennsylvania, el maga Testigo de Jehova ta usa manada legal agencia na diferente maga nacion. Incluido na nombre del cuanto de este maga agencia el termino igual como “Watch Tower,” “Watchtower,” o el translation del uno na este dos.

 Desde ya establicia con este maga legal agencia, ya puede se ayuda kanamon para hace pa mas, igual como el siguiente:

•   Produccion y distribucion. Ya produci kame maga 220 millon de Biblia y cerca 40 billon maga publicacion que base na Biblia. Puede obtene con el diamon maga publicacion na mas de 900 lengguaje. Por medio na jw.org website, el maga gente libre ta puede le con el Biblia na mas de 160 lengguaje y ta puede sabe el contestacion na maga pregunta acerca na Biblia igual como, “Cosa el Reino del Dios?”

•   Educacion. Tiene kame manada diferente escuela para obtene kame maga instruccion que base na Biblia. Por ejemplo, principia 1943, tiene maga 9,000 de maga Testigo de Jehova quien ya beneficia na training que ya ricibi sila na Watchtower Bible School of Gilead. Ya ayuda se kanila para puede sila sirvi como maga misionario o para puede sila ayuda para continua y tiene buen exito el diamon trabajo que ta hace na entero mundo. Cada semana tambien, millones de gente, incluido el maga gendeh Testigo de Jehova, el ta ricibi instruccion na maga miting que ta hace na maga congregacion. Ta enseña tambien kame con el maga gente le y escribi. Gane, ya produci kame un libro na 120 lengguaje para na ese proposito.

•   Dalida de ayuda. Ya dale kame material ayuda para con aquellos quien ya experiencia tragedia—gente man el ya causa con ese, igual na matanza del un particular grupo de gente na Rwanda del 1994 o por causa na natural calamidad, igual na temblor na Haiti del 2010.

 Maskin pa manada el cosa kame ya puede hace por medio na maga corporacion y legal agencia que ta usa kame, el diamon trabajo gendeh ta depende na maskin onde de ese. El cada Cristiano tiene el responsibilidad que cumpli con el mandato que ya dale el Dios que predica y enseña el buen noticia. (Mateo 24:14; 28:19, 20) Ta creé kame que el Dios el ta ayuda kanamon na diamon maga trabajo y ele “el ta hace . . . crici” con ese.—1 Corinto 3:6, 7.