Mahungu a manene o bhalwa ngu Johani 12:1-50
12 Ku ti sate 6 wa masiku kasiku yi hoka Paxkwa, Jesu a to hoka Bhetaniya amu a nga ti zumba kona Lazaro awu Jesu a nga ti m’wusile ngu ka vakufa.
2 Va to m’mahela jantari, se Marta ngene a nga txi servhira, aniko Lazaro i ti mmweyo wa va va nga txi dya ni Jesu.
3 Se Mariya a to teka meyu litru ya mafura o bhumula, a nardho ya orijinali o dhula ngutu, e ma thela minengeni ka Jesu e tshumela e bahulela ngu misisi yakwe. Se nyumbani ku to tala ngu m’bhumulo wa mafura.
4 Kambe Judhasi Iskariyoti mmweyo wa vagondiswa vakwe, awu a nga m’xavisa a to khene:
5 “Ngu kutxani mafura yawa o bhumula ma si tekwi me xaviswa ngu 300 wa madhenari, male ya kona yi ningelwa sisiwana kani?”
6 Ene a wombile tiya i si nga ngu ku a nga ti khatala ngu sisiwana, kambe ngu ku i nga ti dikhamba ni ku ngene a nga txi ñola dikaxa da timale, se a txi tolovela kupa male yi yi nga txi betwa ka dikaxa.
7 Se Jesu a to khene: “M’lekeni, nguko ati a nga ti maha, a ti mahile kasi kululamisela ditshiku di ni no tshotshwa ngu dona,
8 nguko sisiwana mi naso yotshe mbimo, kambe hi nga yotshe mbimo mi no va ni nani.”
9 Ka mbimo yoneyo, Vajudha vo tala va to ziva ti to Jesu a ti Bhetaniya, se va to tsula i si nga ngu mhaka ya Jesu dwe, kambe ngu kulava ku ya wona Lazaro wu a nga ti m’wusile ngu ka vakufa.
10 Tinduna ta vaprista ti to luka tipulani to daya Lazaro nene.
11 Nguko i ti ngu mhaka ya Lazaro Vajudha vo tala va nga ti tsula Bhetaniya ve ya kholwa ka Jesu.
12 Mangwanani ka kona, txitshungu txo tala a txi txi nga ti yite m’busoni txi to ziva ti to Jesu a txi ta Jerusalema.
13 Se va to teka matshanzu a mitxhese* ve m’yela ve ya kwangula va txi kha vona: “Txizimu, ha ku kombela, hanyisa. A katekile awu a tako ngu ditina da Jehovha, Mkoma wa Israyeli.”
14 Mbimo yi Jesu a nga mana tximbongolana a to txi gadha, nga ha ti nga bhalwa ngu kona ti to:
15 “U nga thave dihorana da Siyoni: Wonani! Mfumeli wako wa ta a di gadhile tximbongolana.”
16 Vagondiswa vakwe kha va ti pfisisa tiya makhatoni, kambe msana kova Jesu a di dhumisilwe, vona va khumbute ti to totshe ati ti nga maheka ngu tona ti ngu ditshuri ti nga ti bhaletwe ene.
17 Se vathu vo tala ava va nga ti ni Jesu mbimo yi a nga dhana Lazaro dithithani e m’wusa ngu ka vakufa va ti fakaza.
18 Ngu toneto txitshungu txo tala txi nga tsula kwakwe nguko txi ti pfite ti to a ti mahile txidiwukiso txile.
19 Vafarisi va to gelana ngu txawe va txi kha vona: “Ma ti wona ti to kha hi koti kumaha txilo! Phela votshe vathu vo m’londisela.”
20 Ka vale va nga ti tsute m’busoni, ku ti ni Vagriki.
21 Se va to ya ka Filipi awu i nga ti wa Bhetsayidha ka Galileya ve ya m’kombela va txi kha vona: “Hi kombela kuwona Jesu.”
22 Filipi a to ya gela Andreya. Se Andreya ni Filipi va to ya womba-womba ni Jesu.
23 Se Jesu a to va gela ku khene: “Yi hokile mbimo yo Mwanana wa M’thu e dhumiswa.
24 Ani na mi gela ngu ditshuri ni txi khani ngako mbewu ya trigu yi si wi hamafuni yi fa, yi na simama i di mbewu, kambe ngako yi txi fa, yi na veleka mihando yo tala.
25 Awu a dhundako ngutu wutomi wakwe a na wu luza, kambe awu a nyenyako wutomi wakwe ka mafu yawa, a wu xayisela wutomi wo mbi guma.
26 Ngako m’thu a txi lava ku ni thumela a na ni londise, o va ha ni no va kona, nene wule a ni thumelako a na va koneho. Ngako m’thu a txi lava ku ni thumela, Tate a na m’dhumisa.
27 Konku ni karatekile, ni na womba txani? Tata, ni hulukise ka xanisa yiya. Kambe ani ni tete yona xanisa yiya.
28 Tata dhumisa ditina dako.” Se ku to pfala dipswi ngu nzumani di txi kha dona: “Ani se ni di dhumisile, ni ku na tshumela ni di dhumisa kambe.”
29 Txitshungu a txi txi nga ti ti ho hale txi to ti pfa, se txi to kha txona kupekile txingwalangwanda. Kambe vamwani va to kha vona: “I ngilozi yi nga womba-womba nayo.”
30 Jesu a to va gela ku khene: “Dipswi diya kha da pfala ngu mhaka yangu, kambe ngu mhaka yanu.
31 Konkuwa ditiko diya di ku lamulwani ni ku mkoma wa ditiko diya a na hingwa.
32 Hambiketo, mbimo yi ni no hayekwa, ni na ndindela kwangu totshe tixaka ta vathu.”
33 Ene a txi womba tiya kasi ku kombetela ati a no fisa tona.
34 Se txitshungu txi to kha txona: “Mlayo wu womba ti to Kristu a na simama kala kupinduka. Se ti mahisa kutxani ku u txi khawe Mwanana wa M’thu a na hayekwa? I mani Mwanana wa M’thu wu u womba-wombako ngu ngene?”
35 Jesu e va gela ku khene: “Liwoningo li na va ni nanu ngu mbimonyana. Tsimbilani ku txi ngadi ku txi wonekela kasiku txidema txi si mi xuli. Awu a tsimbilako txidemani kha kuzivi mu a yako kona.
36 Mi di ngadi ni liwoningo, kholwani ka liwoningo, kasiku mi va vanana va liwoningo.”
Msana ko womba timhaka tiya Jesu a to tsula e ya barama.
37 Hambiku a nga maha sidiwukiso so tala va txi ti wona, vona kha va kholwa kwakwe.
38 Kasi kutatiseka ati ti nga wombwa ngu mprofeti Isaya to khene: “Jehovha, i mani a nga kholwa ka ti hi nga womba? Mtamo wa diwoko da Jehovha wu ti kombekisile ka mani?”
39 Isaya a tshumete e womba txivangelo tximwani txi nga va maha va si kholwi, a txi khene:
40 “A va mahile mabhofu e bangisa timbilu tawe, ti to va si woni ngu maso awe ni kwa mbi pfisisa ngu timbilu tawe, kasiku ve ti sola ve mana kuhanyiswa.”
41 Isaya a wombile timhaka tiya nguko a woni wudhumo wa Jesu se e womba-womba ngu ngene.
42 Hambiketo, kutala ka vathangeli va Vajudha va txi kholwa kwakwe, kambe va si ti kombi hakubasani ngu mhaka ya Vafarisi, nguko va txi thava kuhingwa masinagogani,
43 nguko va txi dhunda ngutu kudhumiswa ngu vathu kupinda kudhumiswa ngu Txizimu.
44 Se Jesu a to kwangula a txi khene: “Awu a kholwako kwangu, kha kholwi kwangu dwe, kambe a kholwa ni ka wule a nga ni rumela,
45 wuhi ni wuhi a ni wonako, a wona ni Wule a nga ni rumela.
46 Ni tile kota liwoningo haditikoni, kasiku wuhi ni wuhi a kholwako kwangu a si simami txidemani.
47 Kambe ngako m’thu a txi engisa mapswi angu aniko a si ma vekisi, ani na mbi m’lamula nguko kha na tela ku ta lamula ditiko, ni tete ku ta di hanyisa.
48 Awu a ni kanyisako ni kwa mbi engisa mapswi angu, ku ni wu a no m’lamula. Mapswi ya ni nga ma womba, ngu ona ma no m’lamula ka ditshiku do gwita.
49 Nguko ani kha ni womba-wombi ngu ku ti sukela. Kambe Tate awu a nga ni rumela, ngene a nga ni ninga txirumo txa ti ni fanelako kuwomba ni ti ni fanelako kuzivisa.
50 Ani na ti ziva ti to txirumo txakwe txi yisa ka wutomi wo mbi guma. Se totshe ti ni ti wombako, ni womba nga ti Tate a nga ni leletisa tona.”
Titxhamuselo ta hahatshi 1.
^ Mwendo: “m’jindo.”
