Mahungu a manene o bhalwa ngu Johani 17:1-26
17 Jesu a to womba timhaka tiya e gwita e guleta maso e wona nzumani a txi khene: “Tata, mbimo yi hokile. Dhumisa mwanana wako kasiku mwanana wako e ku dhumisa.
2 Kufana ni ku u nga mninga mtamo wo fuma votshe vathu, kasiku e ninga wutomi wo mbi guma ka votshe vale u nga mninga.
3 Kasiku ve mana wutomi wo mbi guma va fanete ku kuziva awe, Txizimu txa tximwetxo dwe txa ditshuri ni wule u nga m’rumela, Jesu Kristu.
4 Ani ni ku dhumisile hamafuni hawa, ni kuhetisa mthumo wu u nga ni ninga wona.
5 Tata ni dhumise kumweko ni nawe, ni va ni wudhumo wu ni nga ti nawo ku si se kuvangwa ditiko.
6 “Ni zivisile ditina dako ka vathu va u nga ni ninga ditikoni muwa. Vona i ti vako, aniko u ni ningile, ni ku vona va engisa dipswi dako.
7 Ni ku vona va ti ziva ti to sotshe si u nga ni ninga, si ta ngu kwako,
8 nguko ani ni va txhamusete totshe timhaka ti u nga ni ninga ni ku vona va ti tumete, ni ku ngu ditshuri va ti ziva ti to ani ni tile kota muemeli wako, ni ku kholwa ti to u ni rumete.
9 Ani na va kombelela, kha ni kombeleli ditiko, kambe ni kombelela avale u nga ni ninga, nguko vona mbako.
10 Sotshe si u ku naso nzangu, ni ku sotshe si ni ku naso nzako, ni ku ani ni dhumisilwe hagari kwawe.
11 “Kha ni swi ni vaho haditikoni, kambe vona vaho haditikoni, nguko ni ta kwako. Tate wo Sawuleka, va wonelele ngu mhaka ya ditina dako, adi u nga ni ninga kasiku vona ve va ni wumwewo kufana ni nathu hi ku ni wumwewo.
12 Mbimo yi ni nga ti navo, ani ni txi va wonelela ngu mhaka ya ditina dako adi u nga ni ninga, ni va vhikete ni ku kha ngaho wu a nga loviswa hahanze ka wule a yako kuloviswani, kasiku ti tatiseka ati ti nga wombwa ka mibhalo.
13 Kambe konkuwa ni ta kwako, ni womba timhaka tiya haditikoni kasiku ve pfa litsako lo hetiseka ali ni li pfako.
14 Ani ni va ningile dipswi dako, kambe ditiko da va nyenya nguko vona kha va lumbi ditiko, kufana ni nani ni si lumbiko ditiko diya.
15 “Kha ni ku kombeli ti to u va thavisa haditikoni, kambe ti to u va wonelela ngu mhaka ya M’bihi.
16 Vona kha va lumbi ditiko diya, kufana ni ku ani ni si lumbiko ditiko diya.
17 Va basise* ngu ditshuri, dipswi dako ditshuri.
18 Kufana ni ku u nga ni rumela haditikoni, nanani ni va rumete haditikoni.
19 Ani na ti basisa ti to ve wuyelwa, kasiku ni vona ve basiswa ngu kona ha ka ditshuri.
20 Kha ni kombeleli vava dwe, kambe ni vale va kholwako kwangu ngu kona ha ka ti va ti gondisako,
21 kasiku vona ve va ni wumwewo kufana ni nawe Tata u ku ni wumwewo ni nani ni ku nani ni ku ni wumwewo ni nawe, ti to ve va ni wumwewo ni nathu, kasiku ditiko di kholwa ti to ngawe u nga ni rumela.
22 Ani ni va ningile wudhumo awu u nga ni ninga, kasiku ve va ni wumwewo kufana ni nathu hi ku ni wumwewo.
23 Ti to ni va ni wumwewo navo ni ku awe u va ni wumwewo ni nani kasiku ve va ni wumwewo wo hetiseka, ti to ditiko di ti ziva ti to ngawe u nga ni rumela ni ku u va randile kufana ni ku u nga ni randa.
24 Tata, ni lava ti to ava u nga ni ninga ve va ni nani amu ni ku kona, kasiku ve wona wudhumo awu u nga ni ninga nguko awe u ni randile ku si se kuvangwa ditiko.
25 Tata wo Lulama, kuwomba ditshuri ditiko diya kha di ku zivi, kambe ani na ku ziva ni ku ava ni vona va ti ziva ti to ngawe u nga ni rumela.
26 Ani ni zivisile ditina dako kwawe, ni ku na simama ni di zivisa kasiku lirando li u nga ni randa ngu lona li ti komba kwawe ni ku ani ni va ni wumwewo navo.”
Titxhamuselo ta hahatshi 1.
^ Mwendo: “sawulekise.”
