Mahungu a manene o bhalwa ngu Johani 20:1-31
20 Ka ditshiku do khata da divhiki, Mariya Magdhala a to tsula dithithani ni mixo ku di ngadi phumile, ene a to wona ti to dirigwi dile se di ti thavisilwe dithithani.
2 Se a to tutuma eya ka Simoni Pedro ni mgondiswa wule mmwani, awule Jesu a nga txi m’randa e ya va gela ku khene: “Va thavisile Mkoma dithithani, se kha hi ti zivi ti to va ti ya m’veka hani.”
3 Pedro kumweko ni mgondiswa wule mmwani va to khukha ve kongoma dithithani.
4 Se votshe ngu wumbidi wawe va to khata kututuma, kambe mgondiswa wule mmwani a to tutuma ngutu e siya Pedro e khata ene e hoka dithithani.
5 Ene a to nama e xolela e wona tinguwo ti di hahatshi, kambe kha bela.
6 Ngu msana, Simoni Pedro awu a nga txi mlondisa a to hoka nene, e bela dithithani, se e wona tinguwo ti di vekilwe hahatshi.
7 Difadhuko di di nga ti tombetetwe hamsungo kwakwe di si nga ho ka tinguwo timwani, dona di ti phutetwe ngu didhawa.
8 Se mgondiswa wule mmwani a nga ti khatile ene e hoka dithithani, a to bela e ti wona e tshumela e kholwa.
9 Nguko vona va si se ku wu pfisisa m’bhalo wu wu wombako to ene a ti fanete kuwuswa ngu ka vakufa.
10 Se vagondiswa va to tshumela ve wuya mtini.
11 Kambe Mariya a to sala hafuhi ni dithitha a txi dila. Mbimo yi a nga txi dila, a to nama e xolela mndani ka dithitha.
12 Se a to wona tingilozi timbidi ti di ambate siambalo so basa, aha mmidi wa Jesu wu nga ti vekilwe kona, yimweyo yi di ngu misungoni yimwani yi ti ngu minengeni.
13 Tona ti to m’wotisa ti txi kha tona: “Wamsikati, u dilela txani?” Ene a to xamula tingilozi tile a txi khene: “Va thavisile Mkoma wangu ni ku kha ni kuzivi mu va nga m’veka kona.”
14 Msana ko womba eto, ene a to tshembereka e wona Jesu a di emile, kambe kha m’ziva ti to i ti Jesu.
15 Jesu a to m’wotisa ku khene: “Wamsikati, u dilela txani? U lava mani?” Ngu kupimisa ti to i ti m’khataleli wa jaradhi, ene a to m’gela ku khene: “Ngako i di awe u nga m’thavisa, ni gele mu u nga m’veka kona, na ya mteka ni tsula nayo.”
16 Jesu a to m’gela ku khene: “Mariya!” Ene a to tshembereka e m’wona, e womba ngu Txihebheru ku khene: “Rabhoni!” (Ti wombako ku: “Mgondisi.”)
17 Jesu a to m’gela ku khene: “U nga ni ñole nguko kha ni se kukwela ni ya ka Tate. Kambe tsula ka vafowethu vangu u ya va gela ti to: ‘Na kwela ni ya ka Tate wangu, i ku Tate wanu, ni ka Txizimu txangu i ku Txizimu txanu.’”
18 Mariya Magdhala a to tsula e ya gela vagondiswa a txi khene: “Ani ni woni Mkoma!” Ni ku va gela ati Jesu a nga ti m’leletile.
19 Se i ti minova ya ditshiku do khata ka divhiki, ni ku matimba a wukhalo wu vagondiswa va nga ti tshanganile ka wona ma ti khotilwe ngu kuthava Vajudha, se Jesu a to humelela hagari kwawe a txi va gela ku khene: “Kurula ku nave ni nanu.”
20 Msana ko womba eto, a to va komba manza akwe ni ku va komba didhawa dile a nga ti thotwe. Se vagondiswa va to tsaka ngu kuwona Mkoma.
21 Jesu a to tshumela e va gela ku khene: “Kurula ku nave ni nanu. Kufana ni ku Tate a nga ni rumela, nanani na mi rumela.”
22 Msana ko womba tiya, a to va futeta e va gela ku khene: “Amukelani moya wo sawuleka.
23 Ngako mi txi divalela sionho sa vamwani, sona si na divalelwa, aniko ngako mi si divaleli sionho sa vamwani, sona kha si na mbi divalelwa.”
24 Kambe Tomasi mmweyo wa vale va 12, a nga txi dhanwa ku Dihasa, a si nga navo mbimo yi Jesu a nga humelela.
25 Se vagondiswa vale vamwani va to m’gela ku kha vona: “Athu hi woni Mkoma!” Kambe ene a to va gela ku khene: “Ngako ni si woni timbowo ta sipikiri manzani kwakwe, ni si veki litiho ka timbowo ta sipikiri ni kugwesa hale a nga tholwa, kha ni na mbi kholwa.”
26 Msana ka 8 wa masiku, vagondiswa vakwe va ti tshanganile kambe, se Tomasi a ti navo. Hambiku matimba ma nga ti khotilwe, Jesu a to humelela hagari kwawe e va gela ku khene: “Kurula ku nave ni nanu.”
27 Ngu msana a to gela Tomasi a txi khene: “Veka litiho lako hawa u wona manza angu, veka diwoko dako aha ni nga tholwa, leka kukana-kana u kholwa.”
28 Tomasi a to m’xamula a txi khene: “Mkoma wangu ni Txizimu txangu!”
29 Jesu a to m’gela ku khene: “U kholwa ngu ku u nga ni wona kani? Ava va kholwako hambiku va nga mbi ni wona, va tsaka.”
30 Ngu ditshuri, Jesu a mahile simwani sidiwukiso so tala masoni ka vagondiswa vakwe, asi si nga mbi bhalwa ka dibhuku diya.
31 Kambe asiya si bhatwe kasiku mi kholwa ti to Jesu ngene Kristu, Mwanana wa Txizimu, ni ti to ngako mi txi kholwa mi na mana wutomi ngu ditina dakwe.
Titxhamuselo ta hahatshi 1.
