Mahungu a manene o bhalwa ngu Luka 1:1-80

TXHAYA

Mapswi o khata ma nga bhalelwa Teyofilo (1-4)
Gabriyeli e zivisa kuvelekwa ka Johani M’bhabhatisi (5-25)
Gabriyeli e zivisa kuvelekwa ka Jesu (26-38)
Mariya e endela Elizabheti (39-45)
Mariya e dhumisa Jehovha (46-56)
Johani e velekwa e gwita e raywa ditina (57-66)
Wuprofeti wa Zakariya (67-80)

1 Vo tala va zamile kuxolisisa ni kutshumela ve bhala timhaka tiya hotshethu hi ti kholwako, ² tona hi ti mani ka vale kukhukhela makhatoni va nga va tifakazi ta mhaka yiya, ni ku va vatxhumayeli va Dipswi da Txizimu. ³ Tata Teyofilo, nanani msana kova ni di khatile ngu kuxolisisa ditshuri da totshe timhaka kukhukhela makhatoni, ni sungile ku ti bhala ngu kuya ngu m’longameto wa tona, ⁴ kasiku u tsaniseka ka ti to atiya hi nga gondiswa* nda ditshuri. ⁵ Ka masiku a Herodha i nga ti mkoma wa Judheya, ku ti ni mprista a nga ti dhanwa ku i Zakariya a nga txi thuma ka mtxawa wumwewo ni Abhiya. Msikati wakwe i ti Elizabheti, ene i ti wa lixaka la Aroni. ⁶ Votshe mwamna ni msikati i ti vo lulama masoni ka Txizimu, vona va txi londeta yotshe milayo ni sirumo sa Jehovha.* ⁷ Hambiketo, vona va si nga ni vanana nguko Elizabheti i ti txifule, i si nga eto basi, vona va ti kumbile ngutu. ⁸ Zakariya a ti thuma masoni ka Txizimu kota mprista kumweko ni mtxawa wakwe. ⁹ Se ku di hokile mbimo yakwe yo hisa dibaselo, a to wulela ka wukhalo wo sawuleka dithempeleni ka Jehovha* ngu kuya ngu ti va nga txi mahisa tona vaprista. ¹⁰ Txotshe txitshungu atxi txi nga ti ngu hahanze txi txo maha mikombelo mbimo ayi ku nga txi ningelwa dibaselo. ¹¹ Ku to humelela ngilozi ya Jehovha* yi ta ema ngu txineneni* ka altari yo hisela dibaselo. ¹² Kambe mbimo yi Zakariya a nga yi wona a to karateka e thava. ¹³ Hambiketo, ngilozi yile yi to m’gela ku khene: “Zakariya, u nga thave nguko mikombelo yako yi engisilwe, se msikati wako Elizabheti a na veleka mwanana wa mfana ni ku u na m’raya ditina da ku i Johani. ¹⁴ Awe u na tsaka ni kutshumela u nengela ni ku vo tala va na tsaka ngu kona ha ka kuvelekwa kwakwe. ¹⁵ Nguko ene a na va wa hombe masoni ka Jehovha.* Kambe kha fanela kusela vhinya mwendo wumwani wusuke, ene a na tala ngu moya wo sawuleka hambi a si se kuvelekwa* ¹⁶ ni ku a na maha ti to vathu vo tala va ka Israyeli ve wuyela ka Jehovha,* Txizimu txawe. ¹⁷ Ene a na thangela masoni kwakwe a di ni moya ni mtamo wa Elija. A na phindula timbilu ta vaveleki ti fana ni ta vanana, ni kumaha ti to sindaka-milayo si va ni wutxhari ni kuva vathu vo lulama kasi kumaha ti to Jehovha* e ta mana vathu ava va nga lulamiselwa.” ¹⁸ Zakariya a to wotisa ngilozi a txi khene: “Nji txani txi no ni kholwisa toneto u wombako? Nguko ani se ni kumbile ni ku msikati wangu nene se a kumbile.” ¹⁹ Ngilozi yi to xamula yi txi kha yona: “Ani ngani Gabriyeli, ni emako masoni ka Txizimu, ni rumetwe kasi kuta womba-womba ni nawe ni ku kugela mahungu yawa a manene. ²⁰ Kambe awe u na va txiduma, khu na mbi sikota kuwomba-womba kala kuza ti maheka atiya ni nga ti womba, nguko awe khwa kholwa ka mapswi angu aya ma no tatiseka ngu mbimo ya kona. ²¹ Kambe txitshungu txi txi rinzela Zakariya hahanze, se txi to xamala ngutu ngu ku a nga txi swela kuhuma dithempeleni. ²² Mbimo yi a nga huma, ene a si ti koti kuwomba-womba navo, se vona va to tumbula ti to a ve ni m’woniso wo kari mule dithempeleni. Ene a si ti koti kuwomba-womba, a txo maha ngu kuxungametela dwe. ²³ Mbimo yi a nga tshanganisa masiku akwe a mthumo wo sawuleka, a to tsula mtini. ²⁴ Ku di pindile masikunyana o kari, msikati wakwe Elizabheti a to mana txirumbu, kudingana mtxhanu wa mitxima a si khukhi mtini ni ku a txi womba tiya: ²⁵ “Hi nga wona ati Jehovha* a nga ni mahela masiku yawa. A ni khumbute kasiku nani ni wonwa ni di wamsikati.”* ²⁶ Mbimo yi txirumbu txa Elizabheti txi nga va ni 6 wa mitxima, ngilozi Gabriyeli yi to rumelwa ngu Txizimu yi ya ka didhoropa da Nazareta di manekako Galileya. ²⁷ Yona yi to ya ka divhirjem* do kari di nga txi dhanwa ku i Mariya, di nga ti wutilwe ngu dijaha di nga txi dhanwa ku i Josefa wa linyumba la Dhavhidha. ²⁸ Yona yi to bela aha a nga ti kona yi txi kha yona: “Xeweni awe u nga katekiswa, Jehovha* a ni nawe!” ²⁹ Kambe ene a to karateka ngutu ngu mapswi a ngilozi yile, se e lava kupfisisa ti to maloselo yale ma lava kuwomba txani. ³⁰ Se ngilozi yi to m’gela ku khene: “U nga thave Mariya, nguko awe u mani dithomo* masoni ka Txizimu. ³¹ Wona! Awe konkuwa u na mana txirumbu ni ku u na veleka mwanana wa mfana, u na m’raya ditina da ku i Jesu. ³² Ene a na va wa hombe ni ku a na dhanwa ku i Mwanana wa Nyatxitimwi, ni ku Jehovha* Txizimu a na m’ninga txikhalo txa wukoma txa tate wakwe Dhavhidha. ³³ A na va Mkoma ka nyumba ya Jakobe ngu ha ku si gumiko, ni ku Mfumo wakwe kha wu na mbi va ni magwito.” ³⁴ Se Mariya a to wotisa ngilozi a txi: “Ti na mahekisa kutxani toneto nguko ani kha ni khali kuotela ni wamwamna?” ³⁵ Ngilozi yi to xamula yi txi: “Moya wo sawuleka wu na ta kwako ni ku mtamo wa Nyatxitimwi wu na ku fenengeta. Ngu toneto, awu a no velekwa a na dhanwa ku msawuleki, Mwanana wa Txizimu. ³⁶ Phela hambi Elizabheti dixaka dako, a ziwako i di txifule a na veleka mwanana wa mfana hambiku a nga kumba, konkuwa a ka mtxima wa wu 6, ³⁷ nguko kha ti ngaho ati Txizimu txi ti wombako ti si maheki.* ³⁸ Se Mariya a to khene: “Ani ni txithumi txa Jehovha,* ti na maheke nga ha u nga womba ngu kona.” Se ngilozi yi to khukha yi tsula. ³⁹ Msana keto, Mariya a to khukha ngu txikuluveta e ya ka ditiko da mimangoni ka didhoropa da Judha. ⁴⁰ A to hoka mtini ka Zakariya e ya losa Elizabheti. ⁴¹ Se mbimo yi Elizabheti a nga loswa ngu Mariya, mwanana awu a nga ti mndani a to txhukuma ngutu,* se Elizabheti a to tala ngu moya wo sawuleka, ⁴² e kwangula a txi khene: “U katekile awe hagari ka vavasikati, ni ku a katekile mwanana awu a ku mndani kwako. ⁴³ Phela ani kha ni fanelwi ngu lungelo yiya, ti mahisa kutxani ku ni endelwa ngu mame wa Mkoma? ⁴⁴ Nguko mbimo yi u nga ni losa mwanana awu a ku mndani kwangu a to txhukuma* ngu litsako. ⁴⁵ U katekile awe u nga kholwa, nguko totshe atiya ti nga wombwa ngu Jehovha* ti na maheka.” ⁴⁶ Mariya a to khene: “Ani na dhumisa Jehovha,* ⁴⁷ ni ku moya wangu wa tsaka ngutu masoni ka Txizimu, i ku m’hayisi wangu. ⁴⁸ Nguko txi woni wusiwana wa txithumi txa txona. Konkuwa votshe vathu va na womba ti to ni katekile.* ⁴⁹ Nguko Nyamitamo a ni mahete timhaka to xamatisa ni ku ditina dakwe di sawulekile, ⁵⁰ wuxinji wakwe mbwa kala kupinduka ka votshe ava va m’lavako. ⁵¹ Ene a ni lwete ngu diwoko dakwe da mtamo, a xowokisile avale vo ti gela mbiluni. ⁵² A wisile hahatshi tinduna ka sikhalo sa tona sa wukoma e guleta sisiwana, ⁵³ a khurisile ava va nga ti ni nzala ngu silo sa sinene e hinga ava vo ganya va si nga ni txilo. ⁵⁴ Ene a tete ku ta vhuna txithumi txakwe Israyeli, e khumbula kumaha wuxinji wakwe ⁵⁵ ka Abrahamu ni ka liveleko lakwe, nga ha a nga thembisa ngu kona ka vakokwani vathu.” ⁵⁶ Mariya a zumbile ni Elizabheti kudingana mitxima yiraru, msana keto a to wuya mtini kwakwe. ⁵⁷ Se ku to hoka mbimo yo Elizabheti e hefemula,* ene a to veleka mwanana wa mfana. ⁵⁸ Mbimo yi vaakelani kumweko ni maxaka va nga pfa ti to Jehovha* a mu mahete wuxinji wa hombe va to tsaka nayo. ⁵⁹ Ka ditshiku da wu 8, va to teka mwanana wule ve m’yisa wukwerani* ni ku va txi lava ku m’raya ditina da tate wakwe Zakariya. ⁶⁰ Kambe mame wa kona a to khene: “Ahim-him! Ene a na dhanwa ku i Johani.” ⁶¹ Se vona va to m’gela ku kha vona: “Khu nga ni dixaka ni da dimwedo di ku ni ditina diya.” ⁶² Vona va to maha ngu kuxungametela ve wotisa tate wa kona ti to ngu dihi ditina adi va no raya mwanana. ⁶³ Se ene a to kombela ti to ve m’ninga txipulangwana, e bhala tiya: “Ditina dakwe i Johani.” Se votshe va to xamala. ⁶⁴ Txisofu txakwe txi to tekela kutuleka, lidimi lakwe li txhatxheka, e khata kuwomba-womba e dhumisa Txizimu. ⁶⁵ Se votshe ava va nga txi hanya ka wukhalo wule va to thava ngutu ve khata kuwomba-womba ngu timhaka tiya kotshe mimangoni ka ditiko da Judheya. ⁶⁶ Votshe ava va nga ti pfa tiya va to ti vekisa timbiluni kwawe va txi ti wotisa va txi kha vona: “Kasi ene mwanana wuwa o lava ku va m’thu wo zumbisa kutxani?” Nguko diwoko da Jehovha* di ti ni nene. ⁶⁷ Se tate wakwe Zakariya a to tala ngu moya wo sawuleka e khata kuprofeta a txi khene: ⁶⁸ “A na dhumiswe Jehovha,* Txizimu txa Israyeli, nguko a khumbute vathu vakwe e ta kasi ku ta va khulula. ⁶⁹ Ene a tumbuluxile m’hanyisi* wa mtamo nyumbani ka Dhavhidha txithumi txakwe, ⁷⁰ nga ha a nga womba ngu kona ngu kuthumisa vaprofeti vakwe vo sawuleka va kale. ⁷¹ Kasi ku hi hulukisa manzani ka valala vathu ni ku hi hulukisa manzani ka votshe va va hi nyenyako. ⁷² Kasi ku hi komba wuxinji ngu mhaka ya vakokwani vathu ni kukhumbula txitumelelano txakwe txo sawuleka, ⁷³ i ku txixambanyo atxi a nga maha ka Abrahamu kokwani wathu. ⁷⁴ Ti to msana ko va a di hi hulukisile manzani ka valala e hi ninga lungelo yo hi m’ mahela mthumo wo sawuleka hi si thavi txilo, ⁷⁵ hi maha toneto hi di thembekile ni ku lulama masoni kwakwe otshe masiku a wutomi wathu. ⁷⁶ Kambe awe mwanangu, u na dhanwa ku u mprofeti wa Nyatxitimwi ni ku u na thangela masoni ka Jehovha* kasi kululamisela tinzila takwe, ⁷⁷ kasi kukomba vathu vakwe wuzivi awu wu yisako kuhanyiswani ngu kudivalela sionho sawe, ⁷⁸ asi si divalelwako ngu kona ha ka wuxinji wa hombe wa Txizimu txathu. Ngu mhaka ya wuxinji wonewo hi na telwa ngu kuambuluka* ku txi khukhela txitimwi, ⁷⁹ kasi kuninga kuwoninga ka vale va nga khalahatsha txidemani ni mtsudini ka lifo ni kukongomisa mikondo yathu ka nzila ya kurula. ⁸⁰ Mwanana a txi ya a txi kula ni ku a txi tsana moyani. Ene a simamile a txi zumba txiwulani kala ditshiku di a nga ti kombekisa apune ka votshe vathu va Israyeli.