Mahungu a manene o bhalwa ngu Matewu 13:1-58
-
JESU A GONDISA NGU TA MFUMO NGU SIDINGANISO (1-52)
-
Mphayi (1-9)
-
Ngu kutxani Jesu a nga txi thumisa sidinganiso (10-17)
-
Txhamuselo ya txidinganiso txa mphayi (18-23)
-
Fulaho ni nyamsavari (24-30)
-
Mbewu ya txinapi ni mtshumbelo (31-33)
-
Kuthumisa sidinganiso kasi kuhetisisa wuprofeti (34, 35)
-
Jesu a txhamusela txidinganiso txa fulaho ni nyamsavari (36-43)
-
Thomba yo siswa ni siketi-keti sa lisima (44-46)
-
Likoka (47-50)
-
Thomba ya kale ni ya yiphya (51, 52)
-
-
Jesu e nyenywa ditikoni kwakwe (53-58)
13 Ka dona ditshiku dile, Jesu a to khukha mtini e ya khalahatsha mabambe* ka linene.
2 Txitshungu atxi txi nga ti m’randete i ti txa hombe ngutu, se a to khukha e ya bela ngalavani e khalahatsha, se txitshungu txi maneka mabambe ka linene.
3 Ene a to va gondisa timhaka to tala, ngu kuthumisa sidinganiso. E va gela ku khene: “Mphayi wo kari a to huma e ya kuphayani.
4 Mbimo yi a nga txi phaya, timbewu timwani ti wete hanzila, se ku to ta sinyana si ta dya.
5 Timbewu timwani ti wete ka marigwi amu ku nga singa ni mafu a mangi, se ti to kuluveta ti kula nguko mafu ma sa tshima.*
6 Aniko, mbimo yi ditambo di nga khata kuhisa ti to pfa kuhya, ti wuna nguko ti si nga ni mikuluti.
7 Timwani ti to wela ka mwasi wa mipa, se mwasi wu to kula wu kura timbewu tile.
8 Timbewu timwani ti to wela ka mafu a manene, se ti to khata kuveka mihando, timwani 100, timwani 60, timwani 30.
9 Awule a ku ni tinzeve, a na engise.”
10 Se vagondiswa vakwe va to ta va txi ta m’wotisa va txi: “Ngu kutxani awe u txi va gondisa ngu kuthumisa sidinganiso kani?”
11 Ene a to va xamula a txi khene: “Anu mi ningilwe kupfisisa sihunja so sawuleka sa Mfumo wa nzumani, aniko vona kha va ningwa.”
12 Nguko awule a ku naso a na ningwa simwani ni ku a na engetelwa si tala ngutu, kambe awule a si ngako naso, a na tekelwa hambi ni sona asi a ku naso.
13 Ni va gondisa ngu kuthumisa sidinganiso, nguko vona va wona, kambe va ti maha mabhofu. Va engisa, kambe vo engisa mahala nguko kha va pfisisi txilo.
14 Se kutatiseka ati ti nga wombwa ngu mprofeti Isaya to khene: ‘Mi na engisa kambe kha mi na mbi pfisisa txilo, mi na khanu mo wona, kuve kha mi woni txilo.
15 Nguko timbilu tawe ti mahile marigwi. Vona va ti vhate tinzeve ni maso, kasiku va si woni ngu maso nem va si engisi ngu tinzeve tawe. Nem timbilu tawe kha ti pfisisi txilo kasiku ve ti sola ve mana kuhanyiswa.’
16 “Aniko tsakani anu, nguko maso anu ma wona ni tinzeve tanu ta engisa.
17 Nguko na mi gela ditshuri ni txi khani, vaprofeti vo tala ni vathu vo lulama va txi ti lava ngutu kuwona ati mi ti wonako, aniko kha va ti wona; va txi ti lava kupfa ati mi ti pfako aniko kha va ti pfa.
18 “Konkuwa engisani txhamuselo ya txidinganiso txa wu a nga phaya mbewu.
19 Ngako m’thu atxi engisa mahungu a Mfumo aniko a si ma pfisisi, ku ta M’bihi e ta dula asi si nga phaywa mbiluni kwakwe, eyo i mbewu ayi yi nga phaywa hanzila.
20 Ayi yi nga phaywa ka wukhalo wa marigwi ngu wule a nga engisa mahungu a Mfumo e tekela ku ma amukela ngu litsako.
21 Kambe ene kha mili mikuluti, hambiketo, a na simama ngu mbimonyana, kambe ngako ku txi humelela sikarato ni kuxaniswa ngu mhaka ya mahungu a manene, ene a na tshwetemuka e wa.
22 Ayi yi nga phaywa hagari ka mwasi wa mipa, ngu wule a engisako didungula da Mfumo, aniko ngu kuvilela ngu sa mafu awa ni kuxengwa ngu kulava kuganya, ku kura dipswi se yi si* veleki.
23 Ayi yi nga phaywa ka mafu a manene, ngu wule a engisako mahungu a Mfumo e ma pfisisa, se mbewu yoneyo yi veleka mihando, yimwani yi veleka 100, yimwani yi veleka 60, yimwani 30.”
24 A to va ninga tximwani txidinganiso a txi khene: “Mfumo wa nzumani wu nga fananiswa ni m’thu wule a phayako mbewu ya yinene thembweni kwakwe.
25 Mbimo yi vadimi va nga txi otela, ku to ta mlala e ta txhutxheta nyamsavari hagari ka trigu e gwita e tsula.
26 Mbimo yi trigu yi nga rumbuka yi veleka, ku to tumbuleka nyamsavari.*
27 Se sithumi sakwe si to m’wotisa si txi kha sona: ‘Mkoma, ina khwa phaya mbewu ya yinene basi thembweni kwako, nyamsavari a ta ngu hani?
28 Ene a to va xamula a txi khene: ‘M’lala a nga maha eto.’ Se sithumi si to m’wotisa si txi: ‘Mkoma, u lava hi ya dulela nyamsavari* kani?’
29 Ene a to va gela ku khene: ‘Ahim-him. Mi nga yeni mi ya dulela nyamsavari, nguko mi nga phazama mi dula trigu ni yona.
30 Si lekeni sotshe si kula, kala ka mbimo ya kuelula, ka mbimo ya kuelula ni na gela sithumi sangu ni txi, khatani ngu kudulela nyamsavari mi m’sungelela ngu tinyanda kasiku e ya hiswa; msana keto mi na elula trigu mi ya yi veka txisangalani kwangu.’”
31 A to va gela tximwani txidinganiso a txi khene: “Mfumo wa nzumani wu fana ni mbewu ya txinapi ayi m’thu a nga teka e yi phaya thembweni kwakwe.
32 Ngu yona ya yidotho ya kona ka totshe timbewu, aniko mbimo yi yi kulako yi maha ya hombe kupinda mindonga yimwani aha koza sinyana sa nzumani si mana wukhalo wo aka ka wona.”
33 A to va gela kambe txidinganiso tximwani a txi khene: “Mfumo wa nzumani wu fana ni mtshumbelo awu wamsikati a wu tekako e wu patanisa ni trigu ya yingi kala kuza yotshe trigu yi kukumuka.”
34 Jesu a ti womba-womba ni txitshungu ngu kuthumisa sidinganiso. Ngu ditshuri, txi walo atxi a nga txi txi womba a si thumisi txidinganiso,
35 Kasiku ti tatiseka ati ti nga wombwa ngu mprofeti to khene: “Mkanani kwangu ku na huma sidinganiso. Ni na huwelela ati ti nga ti baramile kukhukhela makhatoni.”
36 Msana ko leka txitshungu txi tsula, ene a to wulela nyumbani. Se vagondiswa va to m’tshuketela va txi ya kha vona: “Hi kombela u hi gela txhamuselo ya txidinganiso txa nyamsavari wa thembweni.”
37 Ene a to va xamula a txi khene: “Mphayi wa mbewu ya yinene i Mwanana wa M’thu,
38 aniko thembwe ditiko. Mbewu ya yinene ngu vanana va Mfumo, kambe nyamsavari ngu vanana va M’bihi.
39 Mlala awu a nga phaya i Dhawulosi. Kuelula ngu gumani ka timbimo* ni ku vaeluli tingilozi.
40 Kufana ni ku nyamsavari a dulelwako e ya hiswa, ti na mahisa toneto kugumani ka timbimo.
41 Mwanana wa M’thu a na rumela tingilozi takwe, tona ti na ta thavisa Mfumoni kwakwe sotshe asi si mahako vathu ve onha ni va va mahako to biha.
42 Tona ti na va rinza mdhikilani ka mndilo. Ngu eho va no ya peka tihuwa ni ku ya gugurusela makwasa.
43 Ka mbimo yoneyo, ava vo lulama va na phatima ngutu kufana ni ditambo Mfumoni ka Tate wawe. Awu a ku ni tinzeve a na engise.
44 “Mfumo wa nzumani wu fana ni txuma atxi txi nga siswa thembweni, atxi wamwamna wo kari a ku ya txi tumbula, e txi siseta; e tsaka ngutu aha koza eya xavisa sotshe asi a ku naso e ya xava thembwe yile.
45 “Mfumo wa nzumani wu nga fana kambe ni mxavisi wule a tsulako e ya xavisa siketi-keti sa lisima.
46 Mbimo yi a nga mana txiketi-keti txo dhula ngutu, a to tsula e ya xavisa sotshe asi a nga ti naso e ya txi xava.
47 Mfumo wa nzumani wu nga fana kambe ni likoka lo kukuta ali li betwako matini kasi kuzweta sihaka sa totshe tixaka.
48 Mbimo yi li talako vo li humisa hahanze, ve ta khalahatsha ve sawulela sihaka sa sinene ve si beta ka txiya, aniko asile so mbi vhuna txilo ve si tshotsha.
49 Ti na mahisa toneto kugumani ka timbimo. Tingilozi ti nata ti ta hambanisa vabihi ka va vo lulama.
50 Tona ti na rinza vabihi mdhikilani ka mndilo. Ngu eho va no ya peka tihuwa ni kugugurusela makwasa awe.
51 “Mi ti pfisisile ati ni nga mi txhamusela?” Vona va to xamula va txi: “Ina, hi ti mani.”
52 Se ene a to va gela ku khene: “Ngu toneto, m’gondisi wuhi ni wuhi awu a gondisako ngu ta Mfumo wa nzumani a fana ni wamwamna awu i ku patrawu awu a humisako ngu txisangalani kwakwe sa siphya ni sa kale.”
53 Mbimo yi Jesu a nga gwita kutxhamusela sidinganiso soneso a to khukha e tsula.
54 Mbimo yi a nga hoka didhoropani kwakwe a to khata kugondisa txitshungu disinagogani ka txona, aha koza ve xamala va txi: “Mamo wuwa a wu mana hani wuzivi ni mtamo wo maha mithumo yiya yo xamalisa kani?
55 Kasi hi nga ene wuwa mwanana wa m’vati? Mame wakwe hi nga wule a dhanwako ku i Mariya? Vananda vakwe hi nga Jakobe, Josefa, Simoni ni Judhasi?
56 Ni tindiyakwe hi nga tona ti ku ho hagari kwathu kani? Se ene a ti mana hani totshe tiya?”
57 Se va to khata kukana-kana* va si kholwi kwakwe. Kambe Jesu a to va gela ku khene: “Mprofeti wa amukelwa ka matiko mamwani, aniko kha amukelwi ditikoni kwawe, hambi i txo va ngu va mtini kwakwe.”
58 Se kha maha ngutu mithumo yo xamalisa didhoropani mule, nguko va si kholwi kwakwe.
Titxhamuselo ta hahatshi 1.
^ Mwendo: “tikasa.”
^ Mwendo: “ma sa enta.”
^ Ti nga maha ku txi wombwa: “ene”, i ku “wule a engisako dipswi.”
^ Mwendo: “mwasi.”
^ Mwendo: “mwasi.”
^ Mwendo: “i mbimo ya magwito.”
^ Mwendo: “kuhumbwa ve wa.”
