Mahungu a manene o bhalwa ngu Matewu 14:1-36
14 Ka mbimo yoneyo, Herodha i nga ti adhimistradhori wa Galileya, a to pfa nduma ya ti Jesu a nga txi maha.
2 Ene a to gela sithumi sakwe a txi khene: “Eyo i Johani M’bhabhatisi. Ene a to wuswa ka vakufa, ngu toneto a sikotako kumaha mithumo yo xamalisa.”
3 Nguko masiku msana Herodha a ti nõte Johani e m’sunga e m’beta jele ngu mhaka ya Herodhiya msikati wa Filipi, mkoma wa Herodha.
4 Nguko Johani atxi m’gela ku khene, kha ti tumelelwi ku u m’teka e va msikati wako.
5 Kambe hambiku a nga txi lava ku m’daya a txi thava txitshungu nguko txi txi wona Johani i di mprofeti.
6 Kambe ka ditshiku di Herodha a nga maha fexta yo tshanganisa malembe akwe, mwanana wa dihorana wa Herodhiya a to sinya ngutu hagari ka va a nga ti va rambile, se Herodha a to tsaka ngutu ta tinene.
7 Ene a to xambanya e m’thembisa ku m’ninga sotshe si a ndi no si lava.
8 Ngu kukuzetelwa ngu mame wakwe, ene a to gela Herodha tiya: “Ni kombela u ni ninga msungo wa Johani M’bhabhatisi a mu ka mbiya.”
9 Hambiku Herodha a nga sa tsaka ngu tona, a sungekile ku ti maha ngu mhaka ya txixambanyo atxi a nga ti mahile, ni ngu kuthava ava a nga ti va rambile.
10 Se, a to rumisa ku ya wilwa msungo wa Johani khe jele.
11 Va to teka msungo, ve wu beta ka mbiya ve ya ningela dihorana dile, se dona di to teka di ya ningela ka mame wa dona.
12 Msana keto, vagondiswa va Johani va to ta va ta teka txirumbi txakwe, ve ya kelela ve gwita va teka mhaka va yi hokisa ka Jesu.
13 Mbimo yi Jesu a nga ti pfa eto, a to khukha hale a nga di kona e bela ngalavani eya txiwulani kasi ku ya zumba ekha. Kambe, mbimo yi txitshungu txi nga ti ziva txi to khukha madhoropani mu txi nga ti kona txi londisa ngu mikondo.
14 Mbimo yi a nga huma ngu ngalavani, a to wona txitshungu txa hombe a txi pfela wusiwana, se e hanyisa valwati.
15 Kambe, mbimo yi di nga swa ditambo vagondiswa va to tshuketela ka Jesu va txi kha vona: “Wukhalo wuwa txiwulani ni ku se wusiku, gela txitshungu txi tsula kasi ku txi ya ti xavela sakudya madhoropani.”
16 Kambe Jesu a to va gela ku khene: “Kha ti lavi kuza ve tsula, va ningeni anu sakudya.”
17 Vona va to m’xamula va txi kha vona: “Kha hi nga ni txilo, ho va ni mtxhanu wa mapawa ni sihaka simbidi dwe.”
18 Se ene a to khene: “Si wuyiseni kheno.”
19 Ene a to rumisa ku txitshungu txi khalahatsha hamwasini. A to teka mapawa yale a mtxhanu ni sihaka sile sa simbidi e wona nzumani, e bonga* e si katekisa. E gwita e khema mapawa e ningeta vagondiswa vakwe, se vagondiswa vakwe ve phakisela ka txitshungu.
20 Se votshe va to dya va txi khura si veka ni kusala asi si nga tata 12 wa tithavangu.
21 Ava va nga dya i di vo dingana kona mu ka 5.000 wa majaha ku si balwi vavasikati ni vanana.
22 Neti va nga gwita kudya, ene a to gela vagondiswa vakwe ve bela ngalavani, ve thangela ve ya mtxhatuko ene a txi ngadi a txi satisana ni txitshungu.
23 Mbimo yi txitshungu txi nga tsula, ene a to kwelela ekha e ya mmangoni kasi ku ya khongela. Di to swa a di ngadi kona kheya ekha.
24 Ngalava se yi ti hagari ka mati* ni ku va txi lwisana ni mavimbi, nguko ku txi peka moya wa hombe.
25 Kambe ngu madrugadha, Jesu a to va yela a txi tsimbila ngu txitimwi ka mati.
26 Mbimo yi vagondiswa vakwe va nga wona Jesu a txi tsimbila ngu txitimwi ka mati va to dhuka va txi kha vona: “Txigonoo!”* Ve peka tihuwa ngu kuthava.
27 Se Jesu a to khene: “Tsanani! Mi nga thaveni txilo, ngani.”
28 Pedro a to xamula a txi khene: “I di awe Mkoma ni dhani ni tsimbila txitimwi ka mati ni ta kwako.”
29 Se Jesu a to khene: “Ngono!” Se Pedro a to huma ngu ngalavani e ya ka Jesu.
30 Kambe, mbimo yi a nga khata kuwonetela txihuhuri a to thava, e khata kubhwabhwamela e kwangula a txi: “Ni lamulele Mkoma.”
31 Jesu a to tekela kunawuluta diwoko dakwe e m’ñola a txi khene: “Awe wo kholwa ka kudotho, ngu kutxani u txi kana-kana?”
32 Msana kova va di bete ngalavani, moya wu to ema.
33 Se ava va nga ti ngalavani va to m’khizamela va txi kha vona: “Awe ngu ditshuri u Mwanana wa Txizimu.”
34 Se va to txhatuka ve ya ka ditiko da Genezareta.
35 Mbimo yi va nga ziva to i Jesu a nga hoka, ku to rumelwa m’biko ka wotshe wukhalo wule, se vathu va to yisela Jesu votshe vathu ava va nga txi lwala.
36 Vona va to m’kombela ti to ve gwesa hambi tshoka ya siambalo sakwe. Se votshe ava va nga txi m’gwesa va txo so hanyiswa.
