Mahungu a manene o bhalwa ngu Matewu 26:1-75
-
Vaprista va lava kudaya Jesu (1-5)
-
Jesu e totwa mafura o bhumula (6-13)
-
Paxkwa yo gwita ni kuningelwa ka Jesu (14-25)
-
Kukhatiswa ka Txilalelo txa Mkoma (26-30)
-
Jesu e womba ti to Pedro a na mʼlamba (31-35)
-
Jesu e khongela khe Getsemani (36-46)
-
Jesu e ñolwa (47-56)
-
Kuxuxiswa ka Jesu (57-68)
-
Pedro e lamba Jesu (69-75)
26 Mbimo yi Jesu a nga gwita kuwomba totshe timhaka eto, a to khene ka vagondiswa vakwe:
2 “Anu ma ti ziva to ku to sala masiku mambidi kasiku yi hoka Paxkwa, Mwanana wa M’thu a na ningelwa ti to e dawa haphandeni.”
3 Se tinduna ta vaprista ni madhota a ditiko, va to sengeletana ha mthandani ka mprista wa hombe a nga txi dhanwa ku i Kayifasi.
4 Se va to luka makungo o va nga m’ñolisa kutxani Jesu ve mu daya.
5 Aniko va txi khona: “Hi nga m’ñoleni ngu ditshiku da m’buso ti to vathu va si mahi nyima-nyima.”
6 Mbimo yi Jesu a nga ti Bhetaniya mtini ka Simoni awu wa tshekela,
7 a to tshuketelwa ngu wamsikati a nga ti ni fraxko ya alabhastru yi nga ti ni mafura o bhumula o dhula ngutu, ene a to khata ku m’thela ha msungo kwakwe mbimo yi ene a nga txi lalela.
8 Mbimo yi va nga wona tiya vagondiswa va to henya va txi kha vona: “Hi nga wonani mafura va ko xakela.
9 Phela ma di xavisilwe ngu male ya yingi kasiku male ya kona yi ningwa sisiwana.”
10 Mbimo yi Jesu a nga ti pfa a to khene: “Kasi mi m’dhukisela txani wuwa wa msikati? Atiya a nga ni mahela timhaka ta tinene ngutu.
11 Nguko sisiwana mi naso yotshe mbimo, kambe hi nga yotshe mbimo mi no va ni nani.
12 Aku awuwa wa msikati a nga thela mafura awa o bhumula ha mmidini kwangu ene a mahile eto kasi kulungisela ditshiku adi ni no tshotshwa ngu dona.
13 Ani na mi gela ditshuri, ni khani: Ni hani aha ku no txhumayelwa mahungu a manene ha mafuni kotshe, ati awu wa msikati a nga maha ti na wombwa kasiku e khumbulwa ngu tona.”
14 Se mmweyo wa vale va 12 a nga txi dhanwa ku i Judhasi Iskariyoti, a to yela tinduna ta vaprista
15 a txi ya khene: “Mi na ni ninga txani ngako ni txi m’xavisa kwanu?” Vona va to m’thembisa 30 wa singetxe sa male ya prata.
16 Se kukhukhela koneho, a txi zumba a txi lavetela mkhanjo wa wunene ti to e m’ningela.
17 Ka ditshiku do khata da M’buso wa mapawa o mbi tshumbelwa, vagondiswa va to tshuketela Jesu, veya m’wotisa tiya: “Mkoma, ngu hayi aha u lavako ti to hi lulamisela kona, kasi ku ya dyela kona Paxkwa kani?”
18 Ene a to khene: “Tsulani didhoropani ka wamwamna wo kari mi ya m’gela to: ‘Mkoma a khene: “Yi hokile mbimo ayi yi nga vekwa, ani ni vagondiswa vangu hi lava ku ta dya Paxkwa mtini kwako.”’”
19 Se vagondiswa va to maha nga ti Jesu a nga va leletisa tona, se ve lulamisela Paxkwa.
20 Mbimo yi di nga swa, ene a ti khalahatshile ha mezani ni vagondiswa vakwe va 12.
21 Se va txi nga txi dya a to khene: “Phela na mi gela ditshuri ku khani: Mmweyo wanu a na ni xavisa.”
22 Eto ti va pandile ngutu, se mmweyo ni mmweyo a to wotisa a txi khene: “Mkoma, i ngava i di ani?”
23 Ene a to va xamula a txi khene: “Awule hi betako diwoko ngu mkama wumwewo amu ka mbiya, ngeneyo a no ni xavisa.
24 Ditshuri ti to Mwanana wa M’thu wa tsula nga ti timhaka takwe ti nga bhaliswa tona, kambe awu a xavisako Mwanana wa M’thu a na ti wona, i di tshuko i di ku m’thu eneyo a sa velekwa.
25 Judhasi awu a nga ti mahile makungo o m’xavisa a to m’wotisa a txi khene: “Rabhi, ina ngani?” Jesu a to khene: “U ti wombete upune.”
26 Va txi ngadi va txi dya, Jesu a to teka dipawa, a di mahile mkombelo a to di khema e ninga vagondiswa a txi khene: “Tekani mi dya. Dipawa diya di emela mmidi wangu.”
27 A to teka kopo, e maha mkombelo e va ninga a txi khene: “Selani ngu yona mi siyetisana motshenu.
28 Vhinya yiya yi emela ‘mnoha wangu wa txitumelelano’ awu wu no theketelwa vathu vavangi kasi kumana kudivalelwa sionho.
29 Kambe ani na mi gela ku khani: Kha ni na mbi swa ni sela kambe vhinya yiya ya mauvha, kala ka ditshiku dile ni no ta sela vhinya ya yiphya hi di hotshe ka Mfumo wa Tate wangu.”
30 Ngu magwito, msana kova va di embelete tindando to dhumisa Txizimu va to khukha ve tsula Mmangoni ka Miolivha.
31 Se Jesu a to va gela ku khene: “Wusiku wuwa, motshenu mi na ni leka ngu mhaka ya ti ti no ni humelela nguko ti bhatwe ti to: ‘Ni na peka m’dyisi, se tinvuta ti na hangalaka.’
32 Kambe msana kova ni di wusilwe ni na thangela ni txi ya Galileya.”
33 Se Pedro a to xamula a txi khene: “Hambi votshe va txo ku leka ngu mhaka ya ti ti no ku humelela, ani kha ni na mbi ku leka.”
34 Jesu a to khene: “Ngu ditshuri ni khani: Wona wusiku wuwa na mkuku wu si se emba, awe u na ni lamba sikhati siraru.”
35 Pedro a to khene: “Hambi i di ti to to lava ni fa kumweko ni nawe, ani ni nge thuki ni ku leka.” Se ava vamwani vagondiswa va to womba toneto ni vona.
36 Jesu a to tsula navo ka wukhalo awu wu dhanwako ku i Getsemani, a to khene ka vagondiswa vakwe: “Zumbani hawa, ni nga txiya hale ni txi ya khongela.”
37 Se a to teka Pedro ni vanana vambidi va Zebhedhewu e tsula navo, a to khata kukarateka ni kupandiseka ngutu.
38 A to va gela ku khene: “Ni karatekile ngutu aha ko hambi kufa ni nga fa. Zumbani hawa mi rinzela kumweko ni nani.”
39 Se a to tshuketa kulenyana, e khizama yi za mbanza yakwe yi gwesa ni hahatshi se e khongela a txi khene: “Tata, ngako ti txi koteka, tshuketisa kopo yiya kule ni nani. Hambiketo ku nga maheke ati ni ti lavako, kambe ti na maheke nga ti awe u ti lavisako tona.”
40 Ene a to tshumela e wuya ka vagondiswa vakwe e ta va mana va txi otela, se a to khene ka Pedro: “Anu kha ma si kota kurinzela kumweko ni nani hambi i txo va diora dimwedo?
41 Zumbani mi di rinzete, mi khongela mi si karali kasiku mi si xulwi ngu txiduko. Ngu ditshuri, moya wa ti lava, aniko nyama yi karate.”
42 A to tshumela kambe da wumbidi e ya khongela, a txi khene: “Tata, ngako ti si koteki ku kopo yiya yi tshuketa kule ni nani ni sa yi sela, ku na maheke kuranda kwako.”
43 A to tshumela e wuya e ta va mana va di otete nguko maso awe ma txi nemela ngu wukohe.
44 Se a to va siya kambe e ya khongela da wuraru, a txi womba mapswi a mamwewo.
45 Se a to wuya ka vagondiswa vakwe a txi ta khene: “Ka mbimo yo nga yiya anu mo otela ni kuhumula! Phela yi hokile mbimo yo Mwanana wa M’thu e ningelwa manzani ka vabihi.
46 Khukhani hi tsula, awu a lavako ku ni xavisa a hokile.”
47 A txi ngadi a txi womba-womba, ku to hoka Judhasi i nga ti mmweyo wa vale va 12, ene a ti ni txitshungu txa hombe txi nga ti ni matxhari ni migomba. Txona txi ti rumetwe ngu tinduna ta vaprista ni madhota a ditiko.
48 Judhasi a ti langanile navo a txi: “Awu ni no m’nyuta, ngene eyo, m’ñoleni.”
49 Se a to tsimbila e kongoma Jesu a txi ya khene: “Diswite Rabhi,” se e m’nyuta.
50 Kambe Jesu a to khene: “He mawe, kasi u tela txani hawa?” Se vona va to ñola Jesu ve msunga.
51 Neti ku nga maheka toneto, mmweyo wa va va nga ti ni Jesu a to swomola ditxhari, e lwisana ni txithumi txa mprista wa hombe, e txi wila nzeve.
52 Koneho Jesu a to khene kwakwe: “Tshumeta ditxhari txikhwamani ka dona nguko votshe ava va ñolako ditxhari va na dawa ngu ditxhari.
53 Mwendo wo pimisa to ni nge sikoti kukombela ka Tate wangu e ni wuyisela ka yona mbimo yiya magidhi-gidhi* a tingilozi kani?
54 Kambe ni txo maha toneto, ti na tatisekisa kutxani atile ti nga wombwa ngu Mibhalo ti to ti fanete kumahekisa tiya kani?
55 Jesu a to tekela kugela txitshungu txileya a txi khene: “Anu mi ta ni ñola mi di ni matxhari ni migomba nga no va dikhamba. Ditshiku ni ditshiku ani ni txi khalahatsha dithempeleni ni txi gondisa, hambi keto kha ma ni ñola.
56 Kambe, totshe eto ti maheka kasiku ti tatiseka ati ti nga bhalwa ngu vaprofeti.” Se votshe vagondiswa va to tutuma ve msiya.
57 Ava va nga ti ñote Jesu va to mteka ve m’yisa ka Kayifasi mprista wa hombe, aha va nga ti tshanganile kona madhota ni vamabhalani.
58 Kambe Pedro a txo va londisa ngu kule kala mthandani ka mprista wa hombe. Mbimo yi va nga hoka, a to bela e ya zumba kumweko ni sithumi kasi kuwona to ku na maheka txani.
59 Tinduna ta vaprista ni yotshe Sanedhri va txi lava wufakazi wa makuho kasi kulumbeta Jesu ti to ve m’daya,
60 Kambe kha va wu mana, hambiku vathu va vangi va nga txi ningela wufakazi wa makuhu. Ngu msana va to bwaka vathu vambidi,
61 va txi ta kha vona: “Dijaha diya di ti kha dona: ‘Ani ni nga gindimusa dithempele da Txizimu ni di aketa ngu masiku mararu.’”
62 Mbimo yi a nga pfa toneto, mprista wa hombe a to khukha e ema a txi khene: “Wo malala u txi dwe u si xamuli txilo? Wo mbi tipfa ati majaha yawa ma ku lumbetako tona?”
63 Kambe Jesu a to simama e malala a txi dwe. Se mprista wa hombe a to khene: “Ani ni kuxambanyisa ngu Txizimu atxi txi hanyako, ina u nga hi gela to ngawe Kristu, Mwanana wa Txizimu?”
64 Jesu a to m’xamula a txi khene: “Awe upune u womba toneto. Kambe ani na ku gela ku khani: Kukhukhela ka konkuwa, anu mi na wona Mwanana wa M’thu a di khalahatshile txineneni ka Nyamitamo, a txi ta ngu marefuni a nzumani.”
65 Mprista wa hombe a to bhanda siambalo sakwe, atxi khene: “A rukile Txizimu, wufakazi muni mi ku ngadi mi txi wu lava? Phela mi m’pfite mipune a txi ruka.
66 Se mi khanu txani ngu m’thu wuwa?” Vona va to xamula va txi: “A na dawe eyo.”
67 Se va to m’thurela khoheni ni ku mpeka ngu sibhakela. Vamwani va txi m’peka mipama.
68 Va txi kha vona: “He Kristu, hi nga profeta, i mani a nga ku peka?”
69 Pedro a ti khalahatshile ngu hahanze khe mthandani, se mmweyo wa txithumi txa txisikati a to m’yela e ya khene: “Nanawe u ti ni Jesu wa Galileya.”
70 Kambe ene a to lamba a txi khene: “Kha ni ti zivi ati u womba-wombako tona.”
71 Mbimo yi a nga huma e kongoma dipangoni, dihorana dimwani di to m’wona , di txi gela ava va nga di nado di txi kha dona: “Dijaha diya di ti ni Jesu wa Nazareta.”
72 Ene a to xambanya e lamba a txi khene: “Kha ni m’zivi m’thu wuwa.”
73 Msana keto, ava va nga ti ho hale va to yela Pedro va txi ya kha vona: “Ngu ditshuri awe u mmweyo wawe, hambi ngu mawomba-wombelo a kona ma pfala.”
74 Kambe ene a to khata kuxambanya e gima ni hahatshi a txi khene: “Ngu ditshuri kha ni m’zivi m’thu eyo.” Se mkuku wu to emba.
75 Se Pedro a to khumbula ati Jesu a nga ti wombile a to khene: “Na mkuku wu si se emba, awe u na ni lamba sikhati siraru.” Se a to huma e dila ngutu ngu txiviti.
Titxhamuselo ta hahatshi 1.
^ Mwendo: “hambi kupinda 12 wa mabutho.”
