Mithumo ya Vapostoli 21:1-40
21 Mbimo yi hi nga hambana navo, hi to bela txitimela* hi tsula Kose, mangwanani ka kona hi to tsula Rodhe hi gwita hi tsula Patara.
2 Mbimo yi hi nga mana txitimela txa matini txo ya Fenikiya, hi to bela hi tsula nayo.
3 Msana ko wona txitondolo txa Kipra hi to pinda ngu didhawa da txona da txibhabha* hi tsula Siriya, hi ya ema Tiro aha txitimela txi nga ya txhikisa kona mithwalo.
4 Hi to lavetela vagondiswa hi za hi va mana, se hi to zumba kona hale kudingana 7 wa masiku. Kambe ngu kuthumiswa ngu moya wo sawuleka, vona va txi gela Paulo ti to a si kandi Jerusalema.
5 Ngako ma di gumile masiku athu, hi to khukha hi simama ni liendo lathu, se votshe kumweko ni vavasikati ni vanana va to hi heleketa kala kuza hi huma didhoropani. Kona khe hi to ya khizama mabambe ka linene hi khongela.
6 Se hi to satisana navo. Ngu msana, hi to ya bela txitimela txa matini hi tsula, kambe vona va to tshumela mtini.
7 Hi to khukha Tiro hi hoka Pitolomayi, hi di hokile khe, hi to losa vanathu hi zumba navo ditshiku dimwedo.
8 Mangwanani ka kona hi to khukha hi tsula Khezareya, kona khe hi to ya bela mtini ka Filipi awu wa mtxhumayeli, i nga ti mmweyo wa vavamna vale va 7, se hi to zumba nayo.
9 Ene a ti ni mune wa mahorana ma nga sa txhadha,* aya ma nga ti profeta.
10 Msana ko zumba hale masiku a manginyana, ku to hoka mprofeti awu a dhanwako ku i Agabho a txi ta ngu Judheya.
11 Ene a to hi tshuketela e ta teka libhandi la Paulo e ti sunga ngu lona minenge ni mawoko a txi khene: “Moya wo sawuleka wu womba tiya: ‘Nyamne wa libhande liya, a na sungwa ngu Vajudha khe Jerusalema, vona va na mningela manzani ka vathu va matiko.’”
12 Mbimo yi hi nga pfa eto, athu ni vale va nga ti tiho hale hi to khata kukombela Paulo ku a si kweleli e ya Jerusalema.
13 Paulo a to hi gela a txi khene: “Ngu kutxani mi txi dila mi txi zama ku ni maha ni guma mtamo* kani? Tsanisekani ti to ni ti emisete, i si nga kusungwa dwe, kambe hambi kuya fa khe Jerusalema ngu mhaka ya ditina da Mkoma Jesu.”
14 Aku hi nga mbi sikota ku m’thindekisa, hi to ema ku m’sinzisa* hi txi khathu: “Ku na maheke kudhunda ka Jehovha.”*
15 Msana ka tile, hi to ti lulamisela kuya Jerusalema.
16 Vagondiswa vo kari va Khezareya va to tsula ni nathu, ve hi heleketa mtini ka Minasoni wa Kipra, mmweyo wa vagondiswa vo khata, aha hi nga ya zumba kona.
17 Mbimo yi hi nga hoka Jerusalema, vanathu va to hi amukela va di tsakile.
18 Mangwanani ka kona, Paulo a to tsula ni nathu ka Jakobe, ni ku otshe madhota ma ti tile.
19 Ene a to va losa e gwita e va xawutela tximwetxo ngu tximwetxo txa si Txizimu txi nga maha ngu kuthumisa mthumo wakwe wo txhumayela ka vamatiko.
20 Mbimo yi va nga pfa eto, va to khata kudhumisa Txizimu, ve m’gela ku kha vona: “Mwanathu awe wa ti ziva ti to Vajudha vavangi va kholwa ni ku va wu engisa* Mlayo.
21 Kambe va pfite ti to awe u gondisa votshe Vajudha ni vathu vamatiko ku ve leka Mlayo wa Mosi, va si yi si wukwerani vanana vawe nem va si londisi sihena sawe.
22 Se hi fanete kumaha txani? Nguko vona va na ti ziva ti to u hokile.
23 Sekoko, maha ati hi no kugela: Ku ni mune wa vavamna hawa ava va nga maha txixambanyo ka Txizimu.
24 Ngu toneto, teka vavamna vava mi ya ti basisa ngu kuya ngu mlayo, ni ku va hakelela kasiku ve kuyula* misisi. Se votshe va na ti ziva ti to ati va wombako ngu ngawe hi nga ditshuri, kambe awe wa londeta Mlayo ni kutshumela u wu engisa.
25 Ka vamatiko ava va nga kholwa hi va rumete dipasi adi hi nga bhala txisungo txathu txa ti to va fanete kuvayilela asi si nga ningelwa ka sifaniso, mnoha, nyama ya sihari si si nga fa ngu kukamwa mkolo* ni wubhemba.”*
26 Se mangwanani ka kona, Paulo a to teka vavamna vale ve ya ti basisa ngu kuya ngu mlayo, ngu msana e bela dithempeleni e zivisa ti to masiku ya ku ti basisa ma ndi na gwita ditshiku, ni ku mmwani ni mmwani wawe a ti fanete kumahelwa mningelo.
27 Mbimo yi ma nga txi ya kugumani masiku ale a 7, Vajudha va khe Aziya va to m’wona dithempeleni, se va to kuzetela txitshungu ve ya m’ñola,
28 ve kwangula va txi kha vona: “Vavamna va Israyeli hi vhuneni! Ndiyo wamwamna wu a gondisako votshe ka makhalo otshe timhaka ati ti lwisanako ni va ka kwathu, Mlayo wathu ni wukhalo wuwa. I si nga eto basi, ene a tshumete e tisa Vagriki dithempeleni e tshumela e nyamisa wukhalo wuwa wo sawuleka.”
29 Nguko vona va ti m’woni didhoropani a di ni Trofimo wa khe Efesu, se va txi pimisa ti to Paulo a ti m’tekile e tsula nayo dithempeleni.
30 Ku to wuka guje-guje kotshe didhoropani, se vathu va to ta ngu kututuma ve ta ñola Paulo ve m’ruruvisa ve m’humisa hahanze ka dithempele, se ngu txikuluveta ku to vhalwa matimba.
31 Mbimo yi va nga txi zama ku m’daya, komandante wa masotxhwa a to gelwa ti to ku ti ni guje-guje ka dotshe didhoropa da Jerusalema,
32 ngu txikuluveta a to teka vathangeli va masotxhwa e relela e tsula ka txitshungu. Mbimo yi txitshungu txi nga wona komandante wa masotxhwa ni vathangeli va masotxhwa txi to ema kupeketela Paulo.
33 Se komandante a to tshuketa e m’ñola, e rumisa ti to e sungwa ngu titxhini timbidi, e gwita e m’wotisa ti to ngene mani ni ku nji txani a nga ti onhile.
34 Kambe vamwani hagari ka txitshungu va txi kwangula va txi womba tiya, aniko vamwani va txi womba tile. Se aku komandante a nga si ti pfisisi ngu mhaka ya diguwa a to rumisa ti to Paulo e tekwa e yiswa kwarteli.*
35 Kambe mbimo yi a nga hoka ka txikadha, ti lavile e gulwa ngu mhaka ya txitshungu txi nga ti lava ku m’ñola,
36 nguko ku txi londisa txitshungu txi txi kwangula txi txi: “M’dayeni!”
37 Mbimo yi va nga ti hafuhi ni kuhoka kwarteli,* Paulo a to wotisa komandante wa masotxhwa a txi khene: “Ni nga womba to kari?” Ene a to m’xamula a txi khene: “Kasi wa sikota kuwombawomba Txigriki?
38 Kasi awe khu nga Muegipta wule masiku msana a nga wukela wukoma, e teka 4.000 wa sigevenga e tsula naso txiwulani kani?”
39 Paulo a to xamula txi khene: “Ani ni Mjudha wo ta ngu Tarso, didhoropa da Kilikiya di ku ni nduma ngutu. Ngu toneto ni kombela u ni tumelela kuwombawomba ni txitshungu.”
40 Msana ko m’tumelela, Paulo a to guleta diwoko a di emile ka txikadha, a txi kombekisa ti to a lava kuwombawomba. Se txitshungu txi to zwee, Paulo a to khata kuwombawomba navo ngu lidimi la Txihebheru a txi khene:
Titxhamuselo ta hahatshi 1.
^ Mwendo: “navhiyo.”
^ Mwendo: “nyamboswe”
^ Ngu Txigriki: “timbiri.”
^ Mwendo: “ku ni heta mbilu.”
^ Ngu Txigriki: “hi to malala.”
^ Wona Titxhamuselo to gwitisa A5.
^ Mwendo: “khutarela.”
^ Mwendo:“kutsemeta.”
^ Mwendo: “sihari so dawa si sa theketwa mnoha.”
^ I ku ha ma zumbako kona masotxhwa.
^ I ku ha ma zumbako kona masotxhwa.
