Mithumo ya Vapostoli 24:1-27
24 Msana ka mtxhanu wa masiku, mprista wa hombe Ananiya a to relela kumweko ni madhota ni adhivhogadhu a nga txi dhanwa ku i Tertulo, se va to ya mangalela Paulo masoni ka mkoma.
2 Mbimo yi Tertulo a nga dhanwa, a to khata kulumbeta Paulo a txi khene:
“Athu ha ti dila ngu kurula ka hombe ngu kona ha kwako wa hombe wathu, ni ku ngu mhaka ya wuzivi wako ku mahekile kutxitxa ka hombe ditikoni muwa.
3 Yotshe mbimo ni ka otshe makhalo, athu ha ku bonga ngutu ni ku ha kholwa ka mhakeyo wa hombe wathu Felekisi.
4 Kambe kasiku ni si ku tekeli mbimo ni na komisa mahungu, na kombela ngu kona ha ka wunene wako ti to u hi engisa.
5 Nguko athu hi tumbute ti to wamwamna wuwa mtungu,* nguko a wusa mazunga hagari ka votshe Vajudha ni kotshe hamafuni, ni ku ene mmweyo wa vathangeli wa wukhongeli wa Vanazareta.
6 Ni ku ene a txi lava kunyamisa dithempele se athu hi so m’nõla.
7 ——
8 Se wa hombe, mbimo yi u no m’xuxisa, u na wona ti to totshe ti hi ti wombako ngu ngene ditshuri.”
9 Se Vajudha ni vona va to va seketela, ve tsanisa ti to a ti a nga txi ti womba ditshuri.
10 Mbimo yi mkoma a nga ningela dipswi, Paulo a to khene:
“Ngu kuziva ti to awe u m’xuxisi wa ditiko diya kukhukhela kale, ni ti emisete ku ti angulela nipune.
11 Kha kupindi 12 wa masiku ni di kwelete ni ya khozela Jerusalema ngako u txi lava kukholwa ka tiya u nga wotisa.
12 Vona kha va ni mana ni txi kanetisana ni m’thu dithempeleni, mwendo kuwusa mazunga masinagogani nem wumwani wukhalo amuwa didhoropani.
13 Nem kha va na kukombisa ti to atiya va ni lumbetako tona ditshuri.
14 Kambe na tumela tiya masoni kwako, ti to ni khozela Txizimu txa vatate vangu ngu kuya ngu wukhongeli awu vona va wu dhanako ku wukhongeli wa wuphya, nguko na kholwa ka totshe ati ti nga bhalwa ka Mlayo ni ka Vaprofeti.
15 Ni ku, ni ni kuthemba masoni ka Txizimu, kuthemba aku vavamna vava ni vona va ku nako, ti to ku na va ni kuwuswa ka vakufa ava vo lulama ni va vo mbi lulama.
16 Ngu toneto, ni maha totshe ati ni ti kotako kasi ku ni simama ni va ni livhalo lo basa, ka ti to kha ni nga ni mnando masoni ka Txizimu ni ka vathu.
17 Msana ka malembe o tala ni tile Jerusalema kasi kuta maha miningelo ka ditiko dangu kumweko ni ku ningela magandelo.
18 Se mbimo yi ni nga txi maha mithumo yoneyo, vona va ni mani dithempeleni ni di basile ngu kuya ngu mlayo ni ku ni si nga hagari ka txitshungu ni txi wusa mazunga. Hambiketo, ku ti ni Vajudha vo kari va nga txi ta ngu Aziya.
19 Ni vona va ti fanete kuva ho hawa masoni kwako wa hombe kasi ku va ta ni mangalela i di ku ngu ditshuri ni onhile.
20 Ni vona vavamna vava va na wombe mnando wu va nga wu mana mbimo yi ni nga ema masoni ka Sanedri.
21 I si nga ngu mhaka ya ti ni nga womba mbimo yi ni nga ema hagari kwawe ni txi khani: ‘Ni xuxiswa ngu ku ni kholwako ka kuwuswa ka vakufa!’”
22 Ngu toneto, aku Felekisi a nga txi yi ziva kwati Nzila a to sewukisa mhaka yiya a txi khene: “Mbimo yi mthangeli wa masotxhwa Lisiya a no wuya a na ta mi xuxela timhaka tiya.”
23 Se ene a to rumisa ti to mthangeli wa masotxhwa e m’beta jele, kambe e m’ninganyana mkhululeko wo kari kasi ku maxaka akwe me ta m’vhuna ka silaveko sakwe.
24 Ku di pindile masiku o kari, Felekisi a to ta kumweko ni msikati wakwe Drusila, i nga ti Mjudha e rumisa ti to kuhumiswa Paulo, kasi ku ta mu engisa mbimo yi a nga txi womba-womba ngu likholo lakwe ka Kristu Jesu.
25 Kambe Paulo a to khata kuwombawomba ngu wululami, kuziva kutiñola ni wulamuli a wu wu tako, se Felekisi a to thava a txi khene: “Konkuwa tsula, kambe ni txi mana mkhanjo na rumisa ti to u wuya kambe.”
26 Ene a txi rinzela ti to Paulo a na m’ninga male, ngu toneto a txi rumisa ku ve ya m’teka makhambi o tala kasiku e ta bhula nayo.
27 Kambe ku di pindile malembe mambidi Felekisi a to vhaletwa ngu Porkiyo Festo, se aku Felekisi a nga txi lava kutsakelwa ngu Vajudha a to leka Paulo jele.
Titxhamuselo ta hahatshi 1.
^ Mwendo: “mtxhotxhoteli.”
