Mithumo ya Vapostoli 26:1-32
26 Agripa a to gela Paulo a txi khene: “Konkuwa wa tumelelwa kuwombawomba.” Se Paulo a to nawuluta diwoko dakwe e khata ku womba-womba a txi khene:
2 “Na tsaka ngutu mkoma Agripa, kuema masoni kwako kasi ku ni ti xamulela ka totshe ti Vajudha va ni lumbetako tona,
3 ngutu-ngutu awe u si zivako sihena ni ku kanetisana aku ku kuho hagari ka Vajudha. Ngu toneto ni kombela u ni pasiyentarela u txi ni engisela.
4 “Ngu ditshuri Vajudha votshe va ti ziva ati ni nga hanyisa tona kukhukhela ni di nga di mfana, ka Vajudha kulothi ni Jerusalema.
5 Vona va ni ziva kukhukhela kale, va nga fakaza ti to ni txi lumba mtxawa wa Vafarisi awu wu nga txi hanya ngu mlayo wo karata ngutu wa wukhongeli wathu.
6 Konku ni lamulwa ngu mhaka ya themba ayi ni ku nayo ya txithembiso atxi Txizimu, txi nga ninga va tate vathu.
7 I ku txithembiso atxi tihunzu ta 12 txi emelako ku txi wona txi txi tatiseka, va txi thumela Txizimu ngu kuhiseka wusiku ni mitshikari, i mhaka ya txona txithembiso txiya Vajudha va ni lumbetako.
8 “Ngu kutxani anu mi txi ti wona ti si koteki ku Txizimu, txi wusa vakufa?
9 Ani nipune ni ti khotwe to ni nga maha totshe ti ni ti kotako kasi kufuvisa ditina da Jesu wa Nazareta.
10 Ngu toneto ni nga maha Jerusalema, ni betile vasawuleki vo tala jele, ani ni ti ningilwe mtamo ngu vathangeli va Vajudha kasi kumaha toneto, ni ku mbimo yi ti nga txi lava ku ve dawa ni txi seketela.
11 Ka otshe masinagoga ni va tsayisile kasi ku ve leka likholo lawe, aku ni nga ti va henyete ko pindisa mpimo, ni hokile ni madhoropani ka kule kasi ku ya va xanisa.
12 “Ngu toneto ti nga ni maha ni ya Dhamasku ngu kurumwa ni ku ningwa mtamo ngu tinduna ta vaprista.
13 Mkoma, mbimo yi ni nga ti hanzila ni mitshikari ni woni kuphatima ka hombe ko pinda ni kuwoninga ka ditambo ku txi phatima kwangu ni ka va ni nga ti navo.
14 Hotshethu hi to wa hahatshi, se di to pfala dipswi ngu Txihebheru di txi kha dona: ‘Sawule, Sawule, u ni xanisela txani? Ngako u txo simama u ni xanisa wo ti dayisa upune.’
15 Se ni to m’wotisa ni txi khani: ‘Ngawe mani Mkoma?’ Ene a njo kuxamula a txi khene: ‘Ngani Jesu awu awe u m’xanisako.
16 Kambe khukha u txi ema, nguko ni humelete kwako kasi ku kusawula to u va txithumi txangu ni fakazi yangu ka timhaka ti u nga ti wona, ni ti u no ti wona mayelano ni nani.
17 Na ku hulukisa ka vathu vava ni ka matiko ya ni no ku rumela ka ona.
18 Kasi kutula maso awe u va humisa txidemani ve ta kuwonekelani, ni ku ve txhatxhiswa ka mtamo wa Sathani ve ta ka Txizimu, ti to ve divalelwa sionho sawe kasiku ve va ni thomba hagari ka ava va nga basiswa ngu kukholwa kwangu.’
19 “Ngu toneto mkoma Agripa, ani kha na kanyisa muwoniso,
20 kukhata ni to txhumayela Dhamasku, Jerusalema ni ka dotshe ditiko da Judheya ni ka vamatiko ti to va ti fanete kutisola ve hunduluka ve tshumelela ka Txizimu, ve maha mithumo ayi yi kombisako kutisola.
21 Ngu toneto ti nga maha Vajudha ve ni nõla dithempeleni ve zama ku ni daya.
22 Ngu toneto, aku Txizimu txi ni vhunako na simama ni nyamsi ni ningela wufakazi ka va vadotho ni va hombe, ni womba timhaka ta timweto ati vaprofeti ni Mosi va nga womba to ti na maheka.
23 To Kristu a na xaniseka ni ku aku i ku wo khata kuwuswa ka vakufa a ndi na txhumayela ni kutisa kuwonekela ka vathu vava ni ka vamatiko.”
24 Mbimo yi Paulo a nga txi txhamusela mhaka yakwe, Festo a to kwangula a txi khene: “Wa xanga mo Paulo, wuzivi wu wako wa wungi wa ku xangisa.”
25 Kambe Paulo a to xamula a txi khene: “Kha na xanga wa hombe, kambe ni womba-womba timhaka ta ditshuri ni mapimo.
26 Kuwomba ditshuri mkoma, ni womba-womba ni nawe ni di khululekile nguko wa tiziva totshe timhaka tiya. Na tsaniseka to kha ti ngaho ati u si tiziviko nguko kha ti ngaho ati ti nga mahwa kusisalani.
27 Ani na tiziva mkoma Agripa to awe wa kholwa ka vaprofeti.”
28 Kambe Agripa a to gela Paulo a txi khene: “Ngu mbimonyana ya yidotho u txi lava ku ni kholwisa ni va Mkristu.”
29 Kambe Paulo a to xamula a txi khene: “Ni kombela ka Txizimu, to konkuwa mwendo mbimo ayi yi tako i si nga awe dwe mkoma, kambe ni votshe ava va ni engisako nyamsi to ve fana ni nani, kambe va singa ni titxhini ati ti nga ni sunga.”
30 Se mkoma Agripa a to khukha kumweko ni govhernadhori ni Bhernike ni va a nga ti khalahatshile navo.
31 Mbimo yi va nga ti huma va to bhula ngu txawe va txi kha vona: “Wamwamna wuwa kha maha to biha to fanelwa ngu kudawa mwendo kukhotelwa.”
32 Se Agripa a to khene ka Festo: “I ti ku a sa kombela ku mhaka yakwe yi ya xuxwa ngu Khezari nga a di txhusilwe.”
Titxhamuselo ta hahatshi 1.
