Alakanya ngu tiya: David a ti tsimbila ngu mmovha se e wona to makhalo ya a pindako ka ona kha ma zivi. Sikombiso sa txitarato si komba to a kule ngutu ni ha a yako kona. Ene e wona ti to a timete. Se a woni ti to a tekile txitarato txo va i singa txona.

I ti ku awe u David u ndina maha txani?

Sawula ati u nga ti mahako:

1. U nga wotisa vamwane.

2. U nga xola ha ka mapa mwendo ka GPS. (i ku mtxhini wo kombisa nzila)

3. U nga simama u tsimbitisa kala u ya mana nzila ayi u yi lavako.

Ka tinzila tiya ta tiraru, yo gwita hi nga ya wutxhari.

Ya wumbidi ngu yona i ku yayinene kupala yo khata. Ku laveka mapa mwendo GPS kasi yi kukongomisa ka diendo dako, nguko ngu yona yi nga kuvhunako ni ku kukomba a ha u yako kona.

Kufana ni GPS mwendo mapa, Bhiblia yi nga kuvhuna!

Bhiblia i ku dibhuku di di ku ho ha mafuni kotshe di nga

• kukongomisa mbimo yi u tshanganako ni sikarato

• kuvhuna ti to u tiziva kwati ni ku u va m’thu wa m’nene

• kukomba nzila yo va ni wutomi wo tsakisa

Mbimo yi hi khatako kuwombawomba ha maha siwotiso.

• Ngu ku txani nzuma i di ya mkhure?

• Ngu ku txani tinyeleti ti txi woninga?

Mbimo yi hi kulako, ha maha siwotiso mayelano ni mafu ya hi hanyako ka ona.

• Ngu ku txani ku txi humelela to biha?

• Ngu ku txani vathu va txi fa?

Ani idiku tixamulo ta maneka yotshe mbimo ka Bhiblia?

Vathu vavangi va womba ti to Bhiblia i dibhuku do tala ngu tikaringani, yi pindetwe mwendo ku ta karata ngutu ku yi pfisisa. Kambe ina txikarato txi ka Bhiblia mwendo ngu ti vathu va ti wombako? Ina hi nga ti to vathu vo mbi ziva txilo ngu yona?

Ngu txikombiso vathu va pimisa ti to Bhiblia yi womba to mafu ma fumwa ngu Txizimu. Kambe toneto ti nga mahisa ku txani? Mafu awa kha ma nga ni muwoneleti! Ma tate ngu mipando, sikarato, malwati, lifo, wusiwana ni tiphango. Ti nga mahisa ku txani to Txizimu txa lirando txi maha totsheleleto?

Ina wa ti lava kuziva tixamulo ta siwotiso siya? Ti nga maha u xamatiswa ngu ti Bhiblia yi ti wombako mayelano ni wu a fumako mafu!

Ti nga maha u di tiwoni ti to sialakanyiso asi si ku ka dibroxura diya si seketetwe mu ka Bhiblia. Tifakazi ta Jehovha ta tsaniseka ti to mbimo yotshe Bhiblia ya hi ninga mkongomiso wa wunene. Hi nga thembela ka yona nguko “yi pimisilwe ngu Txizimu, ya vhuna kugondisa, kulaya, ni kukawuka ni kutolovetisa tinzila to lulama”. (2 Timoti 3:16, 17) Hambiku Bhiblia i ku ya kale, loko u txi yi gonda yi nga kuvhuna!