Alakanya ngu mhaka yiya: Alex wa kholwa ti to Txizimu m’vangi, kambe konkuwa wa kanakana. M’gondisi wakwe wa biologia a khene vasiyentista va womba ti to silo si to ti mahekela. Se Alex kha lavi ku tidhanisa masoni ka vagondi kulowe. Ene a zumbela ku tiwotisa tiya: ‘Se aku i ku vasiyentista va wombako ti to silo si to ti mahekela, se ani ni na txani?’

I ti ku awe u Alex, u ndina tumela ti to silo si to ti mahekela nguku mabhuku a siyensia ma wombako toneto?

Phela ka totshe ti vathu va ti kholwako, kha va tizivi ati ti va mahako ve kholwa ka mhaka yoneyo.

• Vamwane va kholwa ka m’vangi ngu mhaka ya ku va gondiswako txhetxheni.

• Kasi vamwane va kholwa ka ku ti mahekela ka silo nguku va gondiswako txikolwani.

Bhiblia yi khene: “Nguko, nyumba yihi ni yihi yi ni muaki wa yona, kambe awu a nga aka sotshe i Txizimu.” (Vahebheru 3:4) Ina ta pfala kutumela mhaka yiya?

ATI VATHU VA TI WOMBAKO: Sotshe silo ha mafuni si ve ho ngu kubuluka ka hombe.

ATI VATHU VA TI WOMBAKO: Vathu va khukhela ka sihari.

ATI VATHU VA TI WOMBAKO: Ku ti mahekela ka silo i ditshuri.

“I di ti to wo tsimbila ka txitinga txa hombe, se u ya mana nyumba yo tshura ngutu, ina u ndina pimisa u txi khawe: ‘Hi nga wona, kuxamalisa ka tona! Mindonga yi nga wetetela yi fola yi za yi maha nyumba yo nga tiya.’Nadha! Nguku eto kha ti pfisiseki. Se ngu ku txani hi txi kholwa ka ku ti mahekela ka silo?”—Julia.

“Ina u ndina kholwa ngako m’thu a txi ku gela ti to ditshiku dimwane ku ta nga buluka dithangi da penda, se penda yi ndaka yi ya totelela ha ka diseta da nyumba se kubhaleka mapswi o tala aya ma ku ni titxhamuselo to pfisiseka?”—Gwen.

Bhiblia yi hi kuzeta ti to hi thumisa “wusikoti wathu wo alakanya”. (Varoma 12:1, Tradução do Novo Mundo) Eto ti la kuwomba ti to kha ha fanela ku kholwa ka Txizimu ngu mhaka ya:

• MATIPFELO (Ni pfa nga ku fanete ku va ni m’vangi)

• M’DHAWUKO WATHU (Ka ditiko dathu, votshe mbakhongeli)

• MWAYA WATHU (Vaveleki vangu va ni gondisile kukholwa ka Txizimu, kha ni nge ti sawuleli)

Kukhata, u fanete u va ni sivangelo si si pfalako ti to u kholwa ka mhaka yo kari.

“Mbimo yi ni ku txikolwani ni pfa vagondisi va txi wombawomba ngu nzila yi mmidi wathu wu thumako ngu yona, eto ta ni kholwisa ti to ngu ditshuri Txizimu txi ho. Txiro tximwane ni tximwane txa mmidi, hambi si i ku sa sidotho si ni mthumo wa sona. Ni ku si thuma ngu nzila yi hi si yi pfisisiko. Toneto ta hi xamalisa!”—Teresa.

“Mbimo yi ni wonako nyumba ya hombe, ngalava, mwendo mmovha, na ti wotisa ni txi: ‘I mani a nga si maha?’ Ti lava wutxhari ti to wu mahwa mmovha. Ngu txikombiso, ti to mmovha wu kota kutsimbila kwati, hambi mapesa ya i ku a madotho ngutu ma fanete me faselwa tatinene. Se aku hambi mmovha wu ko mahwa ngu m’thu, ani mmidi wathu ko?”—Richard.

“Mbimo yi ni nga ti gonda siyensia, ti ti ni karatela ngutu kukholwa ka ku ti mahekela ka silo. Ani ni wona ti to ti lava ‘likholo’ la hombe ti to u tumela ka ku ti mahekela ka silo kupinda kukholwa ka M’vangi.”—Anthony.

Phela i kale vasiyentista va txi maha wuxolisisi ngu ta ku ti mahekela ka silo. Kambe kha va se di mana ditshuri da kona ku ve ngu vona vaxolisisi va hombe va timhaka. Ngu toneto, ina ti bihile kukanakana mhaka ya ku ti mahekela ka silo?