TXIWOTISO 1
Ngani mani?
U NGA MAHA TXANI?
Alakanya u di ka txiemo txo fana ni txiya: Kupinda digume da timeneti Karen a di hokile m’busoni se epfa ku dhanwa ngu m’thu wu a mu zivako.
“Wo emela txani koneho?”
Karen wa tshembereka e wona msana e wona mngana wakwe Jessica adi ni mamedhiya mambidi a servheja. Ene a teka dimedhiya dimwedo e ninga Karen e m’gela tiya, “teka phela khu nga ngadi mwanana, se wa tixamulela”.
Karen a lava kulamba, kambe ene ni Jessica mba maseve. Se ene kha lavi ku etipfa i singa wa txilo. Kambe Jessica dihorana da dinene. Kambe aku ene a selako, kusela kha ta biha. Karen a tigela ti to, ‘ho pekanyana dimwedo basi’. ‘Kha hi seleli kuleva’.
U nga maha txani u txova ka txiemo txo fana ni txa Karen?
ALAKANYISISA NGU TIYA!
Ti to u kota kumaha txisungo txa txinene ka txiemo txo fana ni txiya, ti lava u va ni mialakanyo ya yinene. Ku va ni mialakanyo ya yinene ti lava u ti ziva kwati awe upune ni ti to u m’thu wo zumbisa ku txani. Mialakanyo ya yinene yi nga kuvhuna ku kongomisa wutomi wako i singa ku ti maha matumelete.—1 Vakorinto 9:26, 27.
U nga mahisa ku txani ti to u va ni mialakanyo ya yinene? Tixamulo ta siwotiso si si londiselako ti nga kuvhuna.
1 NGU TIHI ATI NI TIKOTAKO KUMAHA KA WUTOMI WANGU?
Kuziva ti to u ni wusikoti wa wunene ti na tsanisa themba yako.
TXIKOMBISO TXA MU KA BHIBLIA: Mpostoli Paulo a bhate a txi: “Hambi ni sa txhariha ngu mapswi, kambe wuzivi ni nawo.” (2 Vakorinto 11:6) Ngako a nga ti ni wuzivi wo tshima ngu mibhalo, Paulo a simamile e tsana hambiko vamwane va nga txi mu kaneta. Ene kha tumelela ti to ati vathu vamwane va nga ti ti womba ti thavisa themba yakwe.—2 Vakorinto 10:10; 11:5.
TIXOLISISE UPUNE: Bhala timhaka ati u kotako ku ti maha kwati.
Bhala tifanelo ati u ku nato. (Ngu txikombiso, awe u ni wuha? Wa thembeka? Mwendo u ni majevejeve?)
2 NGU TIHI ATI NI TANDEKAKO KU TI MAHA?
Kuzumbela ku alakanya ngu ti u tandekako ku ti maha ti nga fana ni ku teka dikonzo u veka mmalane. Kutandeka ku kongomisa wutomi wako, ti nga onha mialakanyo yako.
TXIKOMBISO TXA MU KA BHIBLIA: Paulo a txi tiziva ti to wa tandeka kumaha to kari. Ene a bhate atxi: “Ngukusa ni tsakela mlayo wa Txizimu ani ngu wutumbu wangu, kambe amu ka sihango sangu ni mana wumwane mlayo awu wu lwako ni mlayo wu wu tsimbitisako mialakanyo yangu, wona wu ni ndindela wukhumbini ka txiwonho txi txiku ka sihango sangu.”—Varoma 7:22, 23.
TIXOLISISE UPUNE: Ngu tihi ati u tandekako ku ti maha na u txi ti lava?
3 NGU YIHI MIXUWU YAKO?
Ina u nga bela m’movha wa xapa se u kombela mtsimbitisi wa kona ti to mi rendelekela kala ku za gasolina ya m’movha yi guma? Eto ti nga va wupumbu ni ku sakana ngu male!
Ti kugondisa txani tiya? U di ni mixuwu khu na kuva ka nga hanya. Kambe yi nga kuvhuna ti to u ziva ati u lavako ku tihokelela.
TXIKOMBISO TXA MU KA BHIBLIA: Paulo ati khene: “Ani kha ni mahi nyamtutume.” (1 Vakorinto 9:26) Paulo kha khutarela mawoko, ene ati ni mixuwu ni ku a ti lwela ku hokelela mixuwu yoneyo ka wutomi wakwe.—Vafilipiya 3:12-14.
TIXOLISISE UPUNE: Konkuwa bhala timhaka tiraru ati u lavako ku ti hokelela ka dilembe di ditako.
4 NGU TIHI ATI NI KHOLWAKO KA TONA?
Mbimo yi u va ku ni mialakanyo ya yinene, u na tsana kufana ni txiwindi txa linene
Ngako u singa ni ti u kholwako ka tona, u na maha matumelete. U na fana ni txizokoro txa kanju atxi txi yiswako kheya ni kheya ngu moya—kumaha eto ti kombisa ti to khu na mialakanyo yako upune.
Ku hambana ni to, ngako simaho sako si txi seketelwa ka ti u ti kholwako u na simama u di ni mialakanyo yako upune i singa ku ti maha matumelete.
TXIKOMBISO TXA MU KA BHIBLIA: Mbimo yi mprofeti Dhanieli i nga ti m’phya “a to xambanya mbiluni kwakwe” ta ku ene a ti fanete kuengisa milawu ya Txizimu hambiko a nga ti hambanisilwe ni mwaya wakwe. (Dhanieli 1:8) Ngu kumaha eto a simamile ni mialakanyo ya yinene. Ene a hanyile ngu ti a nga ti kholwa ka tona.
TIXOLISISE UPUNE: Ngu tihi ati u kholwako ka tona? Ngu txikombiso: Ina wa kholwa ka Txizimu? I di ti to wa kholwa, nji txani txi ku kholwisako? Nji txani txi ku kholwisako ti to txona txi ho?
Ina wa kholwa ti to kuengisa milayo ya Txizimu nda lisima Kwako? I di ti to wa kholwa, Nji txani txi ku kholwisako?
Ngu magwito, u lava kufana ni txizokoro txi txi yiswako kheya ni kheya ngu moya mwendo u lava kufana ni txiwindi txa lineneni? U txi tsanisa mialakanyo yako, u na fana ni txiwindi txa lineneni. Ni ku eto ti na kuvhuna kuxamula txiwotiso txi txi ku, Ani ni m’thu wo zumbisa ku txani?
