Alakanya ngu mhaka yiya: Kha ti na mitxima yimbidi Carola ni Filipe i di vangana va hombe, kambe ti wonekisa nga vo va ni malembe va txi zivana. Va rumelelana madungula ngu telefone, va bhula ve heta male kusala mabhulo, va ziva ni ti mngana a lavako ku tiwomba a txi ngadi a txi ti khata! Kambe Filipe kha lavi ti gwitela ka mabhulo basi.

Kukhukhela wu nga khata wungana wawe, Carola ni Filipe va tsimbila va di ñolani mawoko ni ku va thuka ve nyutana. Carola a lava ti gwitela koneho basi. Kambe kha lavi ku mluza Filipe. Phela a walo wu a mu gelako ku a tshurile ni ku a sawulekile i singa Filipe basi. A zumbela ku tigela tiya: ‘Phela ani ni Filipe ha randana . . . ’

I ti kova awe u ku ka txiemo txo fana ni txa Carola na u di ka tanga yo u nga teka mwendo ku tekwa, u ndina maha txani?

Ngako u txo sakana ngu kukwela txitimwi ka mkhokho se u ndaka, u na tidayisa. Ta fana ni loko u txi ndaka milayo ya Txizimu u otela ni m’thu a wu u nga mbi txhadha nayo. Ngu txikombiso Bhiblia yi khene: “Tshuralela txiwonho txa wugango.”—1 Vatesalonika 4:3.

Ngu yihi wuyelo yo ndaka mlayo wonewo? Bhiblia yi womba ti to: “Awule a mahako txiwonho txa wugelegele a wonhela mmidi wakwe wupune.” (1 Vakorinto 6:18) Ngu nzila yihi?

 Wuxolisisi wu kombisa ti to mtalo wa vaphya va va nga otela ni m’thu wu va nga mbi txhadha nayo va ve ni sikarato siya:

• KUXANISEKA. Wungi wa vaphya va va nga otela ni m’thu va si se txhadha nayo va tilayile.

• KWA MBI THEMBANA. Msana ko vathu vambidi va va nga mbi txhadha va di otete votshe ti tolovelekile ku ve gwita ve pimiselana.

• KUNYENYEZEKA. Mahorana o tala ma tsakela mfana wu a no ma vhikela, i singa wu a ko lava ku ma londola basi. Vafana vo tala va txa nga za ve otela ni dihorana kha va ngadi ni mhaka nado.

• Txialakanyiso: Ngako u txo otela ni m’thu wu u nga mbi txhadha nayo, u na va u di ti thavisile lisima upune u gwita u tisola. (Varoma 1:24) U nga sakane ngu mmidi wako nguko mbwa lisima!

Kombisa to u txharihile ngu “kutshuralela txiwonho txa wugango.” (1 Vatesalonika 4:3) Se mbimo yi u no txhadha u na otela ni mkatako na u si karateki, nem kupimiselana to biha mwendo kuthava sikarato asi si tiswako ngu ku otela ni m’thu wu u nga mbi txhadha nayo.—Mavingwa 7:22, 23; 1 Vakorinto 7:3.

• Ina m’thu wu ngu ditshuri a ku randako a nga tsakela ku kuxakela ni ku kuwona u di karatekile?

• Ina m’thu wu a khatalako ngutu ngu ngawe a nga tsakela kumoxa wuxaka wako ni Txizimu?—Vahebheru 13:4.