TXIWOTISO 3
Ni nga maha txani ti to ni kota kuwombawombisana ni vaveleki vangu?
U NGA MAHA TXANI?
Alakanya ngu txiemo txiya: I ti wazithathu ni minova Jose, wa 17 wa malembe, se a gwitile kulungisela nyumbani kwakwe! Ato khalahatsha ka txitulo e khata ku txhaya radhiyo.
Se ngu mbimo yoneyo, e hoka Tate wakwe adi thuvikile.
“Jose! Wo thuma txani nyumbanimo? U ko sakana, mthumo ngu ku txhaya radhiyo dwe, huma hahanze u ya vhuneta mnanda wako kuthuma. U emela kumaha ngu kugelwa ti to maha tiya?”
Jose e ngungurukela, “U khatekile.”
Tate wakwe e mtshuketela atxi khene: “U khawe txani mo Jose? Tshumela u womba kambe.”
Jose a nje khene: “Ni leke ani, Papa.”
Tate wakwe e thuvika ngutu atxi khene: “Eto u xamulisako tona ti womba ti to se u wa hombe ku ni pinda.”
I di ti to awe u Jose, u di mahile txani ti to ku si maheki dizunga do fana ni diya?
ALAKANYISISA NGU TIYA!
Kuwombawombisana kwati ni vaveleki ti fana ni ku tsimbitisa mmovha. Ngako mtsimbitisi a txi wona phango o lava yimwane nzila.
MHAKA YI YI NGA HUMELELA:
Dihorana di va ku khona i Lívia di womba tiya: “Ta ni karatela kuwombawomba ni papa. Mbimo yimwane ni txi wombawomba nayo, kha engiseli, ti nga maha e gwita a txi khene, ‘u ni nani?’”
TINZILA TIRARU ATI LÍVIA A NGA TI TEKAKO.
-
Kubhongela tate wa kona.
Lívia e bhonga “no wombawomba phela papa! U nga ni mahi mwanana!”
-
Kumalala a si m’geli txilo.
Lívia e gwitisa kumalala a si nge ngadi e womba txilo ka tate wakwe.
-
Kusawula mbimo ya yinene ti to e tshumela e m’gela kambe.
Lívia e pima mkama e tsula ka tate wakwe e ya bhula nayo, mwendo e maha ngu ku m’bhalela txipapilwana ngu txikarato txakwe.
Ngu yihi nzila ayi u wonako ti to Lívia a ndina yi sawula?
ALAKANYISISA NGU TIYA: Tate wa Lívia a karatekile ngutu. I di ti to Lívia a sawula Nzila yo khata, tate wakwe a ndina khene kha na txixonipho. Ngako Lívia a txi bhongela tate wa kona, kha na mbi tiziva ti to nji txani txi txi henyisako Lívia, se kha na mbi muengisela. (Vaefesu 6:2) Ngu magwito, votshe va na mbi wuyelwa ngu txilo.
Ngako u txi wona phango ha txitaratoni lava yimwane nzila. Ngu ha ku fanako u txi lava ku hanyisana ni vaveleki ti lava u wombawomba navo ngu nzila ya yinene
Nzila ya wumbidi yi nga woneka i di ya yinene ka mhaka yiya, kambe ngu ditshuri hi nga ya yinene. Ngu ku txani? Nguko ti to Lívia e kota kuhumelela ka mhaka yakwe, ti lava e gela tate wakwe. Kha na kusikota kuziva ta wutomi wakwe a sa nga za e bhula ni tate wakwe. A txi malala o sakana ngu mbimo.
Nzila ya wuraru ko? Ngako Lívia a txi emela mbimo ya yinene yo bhula ni tate wakwe, a nava a di vayilete phango. Se eyo yi nga va nzila ya yinene yo wonisana ni mhaka yiya. Ta fana ni loko a txo wona kumaha ngu kubhala txipapilwana, ti nga maha e bhala se a di tsakile.
Kubhala txipapilwana ti nga tshumela tivhuna Lívia ti to e womba kwati txikarato txakwe. Se mbimo yi tate wakwe a no amukela txipapilwana, a na yi pfisisa kwati mhaka. Wa tiwona ti to nzila ya wuraru ngu yona i ku ya yinene? Kubhula nayo mwendo ku m’bhalela ta vhuna ka Lívia ni ka tate wakwe. Nzila yiya yi londisela mlayo wa Bhiblia wo ‘xota kumaha ati ti vangako kudikha.’—Varoma 14:19.
Ngu yihi nzila yimwane?
Ti mahe nga awe u Lívia. Bhala nzila yi u yi pimisako ni wuyelo ya kona.
VAYILELA KUWOMBA TO KARI KU YA PFALA TIMWANE
Khumbula ti to, ati u nga tiwomba ka vaveleki vako va nga ti pfisisa ngu nzila yimwane.
NGU TXIKOMBISO:
Vaveleki vako va tumbula ti to khu tsaki, se ve ku wotisa ti to kuhumelela txani. Se u xamula u txi: “Hi nga to ni nga mi gela.”
Kambe ka vaveleki vako kupfala ti to: “Ani kha ni mi thembi ti to ni nga za ni mi gela ati ni ku nato. I tshuko ni gela vangana vangu i singa anu.”
Alakanya u txo thuka u manana ni txikarato se vaveleki vako ve la ku kuvhuna. Kambe u txo khawe: “Ni lekeni na tiwonela.”
-
U pimisa ti to vaveleki vako va na pfisisa txani?
-
U nga xamulisa ku txani ti to vaveleki vako ve tsaka?
