Ina wa txi wona txifanyana txi txi ku ha ka mfota? Txi woneka txi di ni txiwunda i ku kutipfa i di txokha ni ku txa thava, hi nga tona? Ina nawe u khala kuva ni txiwunda se u thava?— Mbimo yimwani vathu vamwani va thuka ve va ni txiwunda se ve thava. Bhiblia yi womba-womba ngu vangana va Jehovha ava ni vona va nga va ni txiwunda se ve thava. Mmweyo wawe i Elija. Konkuwa he bhuli ngu ngene.

Elija a ti zumba Israyeli kale Jesu a si se velekwa. Akabe Mkoma wa Israyeli, a si khozeli Jehovha, Txizimu txa ditshuri. Ene ni msikati wakwe Jezabheli va ti khozela Bhahali txizimu txa makuhu. Se Vaisrayeli vamwani va khatile kukhozela Bhahali. Mkoma wa txisikati Jezabheli a ti henyile ngutu ni ku a ti lava kudayela votshe va nga ti khozela Jehovha kupata ni Elija! Wa tiziva a ti Elija a nga maha?—

 Elija a to thava e pfhuka! Ene a to tsula txiwulani ngu kuthava eya barama mu ka diphala. U pimisa ti to ngu kutxani a di pfhukile?— Ina, nguko a nga ti thava. Kambe Elija a sa fanela kuthava. Ngu kutxani? Nguko a ti ti ziva ti to Jehovha a ndina mvhuna. Dikhambi dimwani Jehovha a kombisile mtamo wakwe ka Elija .Ene a xamute mkombelo wa Elija ngu kurumela mmdilo wu ta ngu nzumani. Se ni konkuwa Jehovha a ndina vhuna Elija!

Mbimo yi Elija a nga ti diphalani, a to pfa dipswi da Jehovha di txi mu wotisa tiya: ‘U maha txani muwa?’ Elija a to xamula a txi: ‘No thava kudawa, nguko ngani nokha ni kuthumelako.’ Phela Elija a ti pimisa ti to votshe va va nga ti thumela Jehovha va datwe. Kambe Jehovha a m’gete tiya: ‘Eto hi nga ditshuri. Ku ni 7.000 wa vathu ava va ni thumelako. U nga thavi. Ku ni mthumo wa wungi awu ni lavako ti to u wu maha!’ U pimisa to Elija a tsakile mbimo yi a nga pfa ti a nga gelwa?—

U gonda txani ka ti ti nga humelela Elija?— Khwa fanela ku va ni txiwunda mwendo kuthava. Phela u ni vangana va va dhundako Jehovha ni va va kudhundako. I singeto dwe, Jehovha a ni mtamo wa hombe ni ku mbimo yotshe a na kuvhuna! Ina khu tsaki kuziva ti to mbimo yotshe khu nga wekha?—