He gonde ngu mfana wu a nga hulukisa wutomi wa tiyo wakwe. Ene i ti mtukulu wa Paulo. Kha hi di zivi ditina dakwe, kambe ene a ti ni txibindi. Ina khu ti lavi kuziva ti a nga ti maha?—

Paulo a ti jele ka Jerusalema. A ti khotetwe nguko a nga ti txhumayela ngu Jesu. Majaha mamwani ma henyete Paulo se me maha txikungo txo biha. Ma ti khene: ‘He kombeleni nduna ya hombe yi gela masotxhwa a yona me humisa Paulo jele e ya dibanzani. Athu hi na m’baramela, ni ku mbimo yi Paulo a no pinda ngu hawa, hi na mu daya!’

Mtukulu wa Paulo a yi pfite mhaka eyo. Se a mahile txani? Ene a to tsula jele e ya gela Paulo mhaka yi a nga yipfa. Se ngu txikuluveta, Paulo a to mu gela ti to e ya zivisa nduna ya hombe mhaka yoneyo yo biha. U pimisa ti to ti mu hehukete mtukulu wa Paulo ku ya wombawomba ni nduna ya hombe?— Ahim-him. Phela nduna yile i ti m’thu wa lisima ngutu. Kambe ngu txibindi, mtukulu wa Paulo a tsute e ya wombawomba ni nduna.

Se nduna yi ndina maha txani? Yona yi sengeletile dibutho di di ku ni masotxhwa a konamu ka 500 ti to me vhikela Paulo! Yona yi ma gete ti to me teka Paulo me mu yisa khezareya wona wusiku wule. Ina Paulo a hulukile?— Ina. Kha dawa ngu majaha ale! Makungo awe kha ma thuma.

U gonda txani ka mhaka yiya?— Nawe u nga va ni txibindi kufana ni mtukulu wa Paulo. Ti lava hi va ni txibindi mbimo yi hi bhulako ni vamwani ngu Jehovha. Ina nawe u na va ni txibindi txo gela vamwani ngu Jehovha?— Ngako u txi maha toneto, u na hulukisa wutomi wa vamwani.