Kukhukhela i ti ngadi mwanana Timoti a ti tsakela kuvhuna vathu. Ene a tsimbite makhalo a mangi ti to e vhuna vamwani. Ngu toneto, ene a vite ni wutomi wo tsakisa. Ina khu ti tsakeli kupfa to tala ngu ngene?—

Timoti a kulete ka didhoropa da Listra. Mbimo yi i ngadi mwanana, kokwane wakwe Loyidhe ni mame wakwe Eunise va mu gondisile ngu Jehovha. Mbimo yi a nga ti ya e kula, ene a ti lava kuvhuna vamwani ti to ve gonda ngu Jehovha.

Mbimo yi Timoti i nga ti ngadi mfana, Paulo a mu kombete ti to e tsula nayo ka makhalo mamwani ti to ve ya txhumayela. Se Timoti a ti khene: ‘Ina!’ Ene a ti tiemisete kutsula e ya vhuna vamwani.

 Timoti a tsute kumweko ni Paulo ka didhoropa da Makedhoniya khe Tesalonika. Kasiku ve kota kuhoka kheya, ti lavile ve tsimbila mpfhuka wa hombe ni kutxhatuka ngu ngalava. Se mbimo yi va nga hoka, vona va vhuni vathu vo tala ti to ve gonda ngu Jehovha. Kambe vamwani va si ti lavi se va va henyete ni ku va ti lava ku va xanisa. Ngu toneto, Paulo ni Timoti va khukhile ve ya txhumayela wukhalo wumwani.

Msana ka mitximanyana, Paulo a kombete Timoti to e tshumela e ya Tesalonika ti to eya wona vanathu. Ti txi lava likholo ni txibindi ti to e tshumela ka didhoropa di di nga ti ni vathu vo biha! Kambe Timoti a tshumete nguko a ti karateka ngutu ngu vanathu vale. Ene a ti ta gela Paulo mahungu o tsakisa. Vanathu va txi maha ta tinene!

Timoti a thumile malembe o tala ni Paulo. Paulo a bhate ti to Timoti i ti m’thu wa mnene awu a ndino m’ruma ti to eya vhuna mabanza. Timoti a ti dhunda Jehovha ni vathu.

Ina wa va dhunda vathu ni ku u lava ku va vhuna ti to ve gonda ngu Jehovha?— Mbimo yi u mahako eto, u na va ni wutomi wo tsakisa awu wu tangalisako kufana ni wa Timoti!