Wa va wona vavamna va va ku ka mfota?— I Matewu, Marku, Luka, Johani, Pedro, Jakobe, Judha ni Paulo. Vavamna vava va hanyile mbimoni yimweyo ni Jesu ni ku vona va bhate mayelano ni nene. Konkuwa he bhuli ngu vona.

Ka vavamna vonevo, va vararu i ti vapostoli ava va nga txhumayela ni Jesu. Wa va ziva to mba mani?— I Matewu, Johani ni Pedro. Mpostoli Matewu ni Johani  va ti mu ziva kwati Jesu, ni ku vona va bhate mabhuku mayelano ni wutomi wa Jesu. Mpostoli Johani a tshumete e bhala dibhuku di di dhanwako ku Mtuletelo ni mapapilo mararu ya ma dhanwako ku i Johani wo khata, Johani wa wumbidi ni Johani wa wuraru. Mpostoli Pedro a bhate mapapilo mambidi aya ma ku mu ka Bhiblia. Ona ma dhanwa ku i Pedro wo khata ni Pedro wa wumbidi. Ka dipapilo dakwe da wumbidi, Pedro a bhate ngu mbimo yi Jehovha a nga ti wombawomba a ti nzumani mayelano ni Jesu, Jehovha a ti khene: ‘Awuwa i Mwanana wangu wo randeka ngutu, awu ni tsakiswako ngutu ngu ngene.’

Vavamna vamwani ava va ku ka mfota va tshumela ve hi gondisa ngu Jesu ka mabhuku ya va nga ma bhala. Mmweyo wawe i Marku. Ti nga maha a ti ti ho mbimo yi Jesu a nga ñolwa ni ku a ti woni totshe ti ti nga maheka. Mmwani wawe i Luka. Ene i ti dhokodhela ni ku ti nga maha a di vite Mkristu msana kova Jesu a di fite.

Vabhali vamwani va vambidi va Bhiblia ava u va wonako ka mfota i ti vananda va Jesu. Wa va ziva matina awe?— I Jakobe ni Judha. Makhatoni va si kholwi ka Jesu. Vona va ti pimisa ti to o xanga. Kambe ngu kutsimbila ka mbimo va khotwe kwakwe ve tshumela ve va Makristu.

M’bhali wo gwita wa Bhiblia awu u mu wonako ka mfota i Paulo. Na a sinze kuva Mkristu ene a ti dhanwa ku i Sawule. Ene a ti vengela ni kuxanisa Makristu. Wa ti ziva ti to ti mahisile kutxani ti to Paulo eva Mkristu?— Ditshiku dimwani a txi tsimbila ha ruwani a to pfa dipswi da m’thu di txi wombawomba di txi ta ngu nzumani. I ti Jesu! Ene a wotisile Paulo a txi khene: ‘Ngu kutxani u txi xanisa ava va kholwako kwangu?’ Msana keto, Paulo a txitxile eva Mkristu. Paulo a bhate 14 wa mabhuku a Bhiblia, kukhukhela ka Varoma kala ka Vahebheru.

Ina ha lera Bhiblia ditshiku ni ditshiku?— Phela hi txi lera Bhiblia, hi na gonda to tala ngu Jesu. Ina khu ti lavi kugonda to tala mayelano ni Jesu?—