1, 2. Ngu sihi siwotiso asi hi nga tiwotisako sona?

VANANA va tolovela kumaha siwotiso. Mbimo yi hi duketako ku va txhamusela to kari, va nga wotisa tiya: ‘Ngu ku txani?’ Ni ku mbimo yi hi duketako ku va xamula kambe txiwotiso txiya, ti nga maha ve tshumela ve wotisa ti: ‘Kambe ngu ku txani?’

² Ti singa ni mhaka ni ti to hi ngadi vaphya mwendo se hi kute, hotshethu hi nga va ni siwotiso. Ti nga maha hi va ni siwotiso mayelana ni ku, hi nadya txani, hi na ambala txani mwendo ku hi na xava txani. Mwendo hi ni siwotiso sa lisima ngutu ngu wutomi wathu ni ngu wumangwana. Kambe ku nga ti tixamulo ti txi hi kanakanisa, mbimo yimwane ti nga hi maha hi godhola ku lavetela tixamulo ta kona.

3. Ngu tihi ti vathu va ti alakanyako mayelana ni ku lavetela tixamulo ta mu ka Bhiblia?

³ Ina Bhiblia yi ni tixamulo ta siwotiso sa lisima si hi si mahako? Vamwane va alakanya ti to yi nato, kambe vona va alakanya ti to Bhiblia ya karata ku yi pfisisa. Kutilava va alakanya ti to, vagondisi ni vathangeli va wukhongeli ngu vona va nga ningelako tixamulo. Vamwane kha va tumeli ti to kha va tizivi tixamulo ngu ku thava kusekwa. Awe ko, u khawe txani?

4, 5. Ngu sihi siwotiso sa lisima si u ku naso? Ngu ku txani u di fanete ku simama u lavetela tixamulo?

⁴ Kutilava u ta nga ti wotisa tiya: Ngu ku txani ni di ho ha mafuni? Ku na maheka txani ngu ngani ku nga ti ni txi fa? Txizimu txi zumbisile ku txani? Kha ti kanakanisi ti to wa ti lava kuziva tixamulo ta kona; Jesu Mgondisi wa hombe a ti khene: “Kombelani, mi na ningwa; lavani, mi na simana; gogotani, mi na tulelwa.”  (Matewu 7:7) U nga karali ngu kulava kala u mana tixamulo ta kona.

⁵ Tsaniseka ti to ku nga ti u txi “simama u lava” tixamulo u na ti mana mu ka Bhiblia. (Mavingwa 2:1-5) Tixamulo ta kona kha ti karati ngutu ku ti pfisisa. Tona ti na kumaha ti to u tsaka konku ni ku u na tumbula ti to u nga va ni wumangwana wu wu tsakisako. He khate ngu ku xolisisa txiwotiso txi txi nzolonganisako mapimo a vo tala.

6. Ngu ku txani vamwane va txi alakanya ti to Txizimu kha txi khatali loko vathu va txi xaniseka?

⁶ Vo tala va alakanya ti to Txizimu kha txi nga ni mhaka ni vathu. Vamwane va alakanya ti to, i di ku Txizimu ngu ditshuri txa khatala, ditiko di sa nga zumbisa tiya. Nguko ku ni tiyimbi, livengo ni wusiwana ka otshe madhawa. Vathu va lwala, va xaniseka ni ku va fa. Vona va ti wotisa ti: ‘I di ti to Txizimu txa khatala ngu ngathu ngu ku txani txi si gumisi kuxaniseka?’

7. a) Ti mahisa ku txani ti to vathangeli va wukhongeli ve gondisa vathu ti to Txizimu txi ni tshofu? b) Ngu ku txani hi txi tsaniseka ti to Txizimu hi nga txona txi vangako ku xaniseka?

⁷ Vathangeli vamwane va wukhongeli va maha vathu ve kholwa ti to Txizimu txi ni tshofu. Ku txi maheka to biha, vona va womba ti to ngu dhunda ka Txizimu. Vona vawomba ti to txi ti lavisile toneto. Mbimo yi vona va wombako toneto va ninga mnando Txizimu. Kambe Bhiblia yi gondisa ti to Txizimu kha txi vangi to biha. Ka Jakobe 1:13 Bhiblia yi womba ti to, Txizimu kha txi duki m’thu ngu ta ku biha. Mbhalo wu khene: “Ni wammwe-yo a dukwako a nga thuki a txi khene: ‘Txiduku txangu txita ngu ka Txizimu.’ Nguko Txizimu kha txi na ku si kota ku dukwa ngu wubihi, se kambe kha txi duki m’thu.” Eto ti womba ti to hambiko Txizimu  txi si tsiveliko ti to ku va ni wubihi, kambe hi nga txona txi wu mahako. (Lera Jobe 34:10-12.) He alakanyisiseni ngu txikombiso txo kari.

8, 9. Ngu ku txani i di txidhelelo kulumbeta Txizimu ngu sikarato si hi tshanganako naso? Ningela txikombiso.

⁸ Alakanya ngu dizambi di di zumbako ni va veleki va dona. Tate wa dona wa di dhunda ngutu, se a di gondisile kumaha sisungo ngu nzila ya yinene. Kambe, di eyisa m’layo wa tate wa dona se di khukha m’tini. Dona di khata kumaha to biha, se di khata kuxaniseka. U alakanya ti to ku nga solwa tate wa dona ngu kuva a di tumelete mwanana wakwe ku huma m’ti? Ni kudotho! (Luka 15:11-13) Kufana ni tate wuwa, Txizimu kha txa tsivela vathu mbimo yi va nga sawula ku txi tshuralela ni kumaha to biha. Kambe mbimo yi ku humelelako to kari to biha, hi fanete hi khumbula ti to Txizimu hi nga txona txi ti vangako. Ngu toneto njidhelelo kulumbeta Txizimu.

⁹ Ku ni txivangelo txo pfala atxi txi mahako ti to Txizimu txi tumelela wubihi wu ya masoni wu humelela. Ka ndima 11, u na ziva ti Bhiblia yi ti wombako ngu mhaka yoneyo. Kambe tsaniseka ngu tiya, Txizimu txa hi randa ni ku txona kha txi na mnando ngu sikarato si hi tsanganako naso. Ditshuri ngu ti to, ngu Txona basi atxi txi nga si gumisako.—Isaya 33:2.

10. Hi nga tsanisekisa ku txani ti to Txizimu txi na gumisa wubihi wotshe wu wu vangwako ngu vathu vo biha?

¹⁰ Txizimu txi sawulekile. (Isaya 6:3) Eto ti womba ti to totshe ati txi ti mahako ndinene ni ku ti basile. Ngu toneto, hi nga txi themba. Kambe vathu kha va fani natxo nguko va thuka ve maha to biha. I singeto basi, hambi mkoma wa mnene wa ditiko kha na ku ti kota kululamisa wubihi wu vathu va wu mahako. Txizimu ngu txona basi txi ku ni mtamo wo maha toneto. Txona txi na gumisa wubihi wotshe da magwito.—Lera Masalmu 37:9-11.

11. Txizimu txi ti pfisa ku txani mbimo yi u xanisekako?

¹¹ Txizimu txi ti pfisa ku txani mbimo yi txi wonako ati ti humelelako ha mafuni? Awe ko, u ti pfisa ku txani? Bhiblia yi gondisa ti to Txizimu txi “dhunda wululami”. (Masalmu 37:28) Eto ti kombisa ti to Txizimu txa khatala ngu ta tinene ni ku txa karateka ngu to biha. Txona kha txi tsaki mbimo yi vathu va xanisekako. Bhiblia yi khene, ka mbimo yi yi nga pinda “mbilu ya txona yi ti pandisekile” mbimo yi txi nga wona mafu ma di tate ngu wubihi. (Genesisi 6:5, 6) Txizimu kha txa txitxa. (Malakiya 3:6) Bhiblia yi womba ti to Txizimu txa khatala ngu ngawe.—Lera 1 Pedro 5:7.

12, 13. a) Ngu ku txani hi di ni lirando, ni ku hi ti pfisa ku txani ngu ku xaniseka? b) Nji txani txi nga hi tsanisako ti to Txizimu txi na gumisa wotshe wubihi ni ku xaniseka?

¹² Bhiblia yi womba ti to Txizimu txi hi mahile ngu mfananiso wa txona. (Genesisi 1:26) Eto ti womba ti to Txizimu txi hi ningile tifanelo ta tinene to fana ni ta txona. Ngu koneho tsaniseka ti to a ku awe u ku si tsaki u txi wona vathu vo mbi na mnando va txi xaniseka, Txizimu txa pandiseka ngutu ku hi pinda. Hi ti zivisa ku txani toneto?

¹³ Bhiblia yi hi gondisa ti to “Txizimu i lirando”. (1 Johane 4:8) Lirando li thangela totshe ti Txizimu txi ti mahako. A nathu hi ni lirando nguko Txizimu i lirando. Alakanya ngu tiya: I di ku u ni mtamo, ina u si na ku gumisa kuxaniseka ni wubihi wotshe awu wu ku ho ha mafuni? Ditshuri, u ndina ti maha ngu ku u dhunda vathu. Ku wombwa txani ngu Txizimu? Txona txi ni mtamo wo maha toneto ni ku txa hi dhunda, txona txi na gumisa kotshe ku xaniseka ni kwa mbi lulama. U nga tsaniseka ti to sithembiso sotshe sa Txizimu si si nga kombiswa makhatoni khe ka dibhuku diya si na  hetiseka! Kambe ti to u kota ku si themba ti lava u khata ngu ku txi ziva kwati Txizimu.

14. I mani ditina da Txizimu? Ngu ku txani hi fanete ku di thumisa?

¹⁴ Nji txani txi u txi mahako ku khata, ku nga ti u txi lava kukhata wungana ni m’thu wo kari? Wo m’gela ditina dako. Ina Txizimu txi ni ditina? Titxhetxhe to tala ti womba ti to ditina da txona i Txizimu mwendo Mkoma, kambe eyo hi nga matina. Eso yo va sithopo basi, so fana ni mapswi ya ma ku “mthangeli” mwendo “mfumeli”. Txizimu se txi hi gete ti to ditina da txona i Jehovha. Masalmu 83:18 yi khene: “Va na zive ti to ditina dako ngawe wekha u ku [Jeová, Tradução do Novo Mundo], ngawe wekha u ku Nyatxitimwi ha mafuni kotshe.” Vabhali va Bhiblia va thumisile ditina da Txizimu makhambi o tala. Jehovha a lava ti to u di ziva u tshumela u di thumisa. Ene a ku gela ditina dakwe ti to u kota kumaha m’ngana wakwe.

15. Ditina di di ku Jehovha di womba txani?

¹⁵ Ditina da Txizimu di di ku Jehovha, di ni txhamuselo ya hombe ngutu. Dona di womba ti to Txizimu txi na maha totshe ti txi nga tithembisa ni ku hetisisa txikongomelo txa txona. Txiwalo  txi txi nga txi tsivelako. Ngene dwe a fanelwako ngu ditina di di ku Jehovha. *

16, 17. Ti womba txani ku: a) “Wa Mtamo wotshe”? b) “Mkoma wa kala kupinduka”? c) “M’vangi”?

¹⁶ Ngako se hi nga lera, Masalmu 83:18 yi womba tiya mayelana ni Jehovha: “Ngawe wekha u ku Nyatxitimwi ha mafuni kotshe.” Ni ku, ka Mtuletelo 15:3 yi khene: “Mithumu yako nja hombe kambe ya xamalisa,  awe Mkoma Txizimu txa mtamo wotshe. Tinzila tako ndo lulama ni ta ditshuri awe mfumeli wa otshe matiko.” Txithopo txi txi ku, “wa Mtamo wotshe” txi womba txani? Txi womba ti to Txizimu txi ni mtamo kupinda mmwane ni mmwane ha mafuni. Ni ku txithopo txi txi ku, “Mkoma wa kala kupinduka” txi womba ti to Txizimu kha txi na makhato nem kha txi na magwito. Masalmu 90:2 yi womba ti to txona i Txizimu ku khukhela kale kala kupinduka. Ina eto kha ti xamalisi?

¹⁷ I singeto basi, Jehovha ngene M’vangi. Mtuletelo 4:11 yi khene: “Ngawe u ku ni fanelo Mkoma Txizimu txathu ya kuamukela kupfaliswa, wudhumo ni mtamo, nguko ngawe u nga vanga sotshe simaha, se ngu kuranda kwako sona si tumbulukile si mana kuhanya.” Ku khukhela ka tingelozi, tinyeleti, mihando ya mindonga  ni sihaka lineneni—Sotshe si u nga si alakanyako si vangilwe ngu Jehovha!

18. Ngu ku txani vamwane va txi alakanya ti to kha ti koteki ku ve va vangana va Txizimu? Bhiblia yi khene txani ngu mhaka yoneyo?

¹⁸ Vamwane va telwa ngu kuthava mbimo yi va lerako mayelana ni tifanelo ta Jehovha to xamalisa, va alakanya tiya: Txizimu txi ni mtamo wa hombe ni ku txi gulekile ngutu, ni ku txi kule ngutu ni nathu, se txi nga khatalisa ku txani ngu ngani? Kambe ina Txizimu txi lava hi ti pfisa toneto? Ahim-him. Jehovha a lava ku tshuketa ha fuhi ni nathu. Bhiblia yi womba ti to Txizimu ‘kha txi nga kule ni mmweyo ni mmweyo wathu’. (Mithumo 17:27) Txizimu txi lava ti to u tshuketa ka txona. Txona txi thembisa ti to “txi na tshuketela hafuhi kwanu.”—Jakobe 4:8.

19. a) U nga mahisa ku txani ti to u va mngana wa Txizimu? b) Ngu tihi tifanelo ta Jehovha ati u ti dhundako ngutu?

¹⁹ U nga ti kotisa ku txani ku va mngana wa Txizimu? Jesu a ti khene: “Se wutomi wo mbi guma ngu kuva va txi ziva awe u ku Txizimu txa tximwetxo txa ditshuri ni Jesu Kristu awu u nga mu ruma”. (Johane 17:3) Simama u gonda, u na ziva kwati Jehovha ni Jesu. Ngu magwito u nga mana wutomi wo mbi guma. Ngu txikombiso, hi gondile ti to “Txizimu i lirando”. (1 Johane 4:16) Kambe txona txi ni tifanelo timwane to tshura. Bhiblia yi khene Jehovha a “ni wuxinji ni wumbilu, wa swela ku henya a tate ngu lirando ni ku thembeka ni ditshuri.” (Eksodha 34:6) Jehovha mbwa mnene ni ku a ti emisete “kutsetselela.” (Masalmu 86:5) Txizimu txi ni kutimisela ni ku txi lulamile. (2 Pedro 3:9; Mtuletelo 15:4) Awe u na gonda to tala ngu tifanelo ta txona to tshura ku nga ti u txi simama u lera Bhiblia.

20-22. a) U nga tshuketisa ku txani ka Txizimu hambiku ti si kotekiko ku txi wona? b) U nga maha txani ngako vamwane va txi ku tsivela kugonda Bhiblia?

 ²⁰ Aku ti si kotekiko ku wona Txizimu, ti nga kotekisa ku txani ku tshuketa ka txona? (Johane 1:18; 4:24; 1 Timoti 1:17) Awe u nga tshuketa ka Txizimu ngu ku txi ziva kota M’thu wa ditshuri ni ngu kulera mayelana ni txona amu ka Bhiblia. (Masalmu 27:4; Varoma 1:20) Mbimo yi u yako u txi m’ziva kwati Jehovha u naya u txi m’dhunda ni ku u naya u txi tshuketa hafuhi ni nene.

²¹ U na pfisisa ti to Jehavha i Tate wathu. (Matewu 6:9) Ene a hi ningile wutomi ni ku a lava ti to hi tsaka ni kuva ni wutomi wa wunene ngutu. Ngu toneto tate wa mnene ati navelelako vanana vakwe. (Masalmu 36:10) Bhiblia yi gondisa ti to ta koteka ngu ditshuri ti to u va mngana wa Jehovha. (Jakobe 2:23) Alakanya ngu tiya. Jehovha Mvangi wa wuako wotshe a lava ti to u va mngana wakwe.

²² Ti nga maha vamwane ve kugela ti to leka kugonda Bhiblia. Kutilava va thava ti to u leka wukhongeli wako. Kambe u nga tumeleli m’thu ti to e kutsivela kuva mngana wa Jehovha. Ngene wu a nga vako Mngana wako wa hombe.

23, 24. a) Ngu ku txani u di fanete kusimama u maha siwotiso? b) Nji txani atxi hi no txi gonda ka ndima ayi yi londiselako?

²³ Mbimo yi u gondako Bhiblia, ku na va ni ti u no mbi ti pfisisa. U nga thavi kumaha siwotiso mwendo ku kombela txivhuno. Jesu a ti khene hi fanete ku tiveka hahatshi kufana ni vanana. (Matewu 18:2-4) Nguko vanana va maha siwotiso so tala. Txizimu txi lava ti to u mana tixamulo ta kona. Ngu koneho, gonda kwati Bhiblia ti to u tsaniseka ngu ti to ati u ti gondako ditshuri.—Lera Mithumo 17:11.

²⁴ Nzila ya tshuko yo ziva Jehovha ngu gonda Bhiblia. Ka ndima yi yi londiselako, hi na gonda ti to ngu ku txani Bhiblia yi txi hambana ni mabhuku mamwane.