1, 2. Mba mani vamwane va va nga va vangana va Jehovha?

IMANI wu u lavako ku eva mngana wako? Ngu wu u m’dhundako. Ngu wu u dhundako ku va nayo, nene a dhunda ku va ni nawe. Awu a kuni wunene ni tifanelo ti ti ku xamalisako.

² Jehovha Txizimu wa sawula vathu ti to ve va vangana vakwe. Ngu txikombiso, Abrahamu i ti mmweyo wa vangana va Txizimu. (Isaya 41:8; Jakobe 2:23) Jehovha a dhundile Davhidha nene. A ti khene Davhidha ‘mbwo randeka ka mbilu yakwe’. (Mithumo 13:22) Se mprofeti Dhanieli i ti “wo randeka ngutu” ka Jehovha.—Dhanieli 9:23.

3. Ngu ku txani Abrahamu, Dhavhidha ni Dhanieli va di vite vangana va Jehovha?

³ Ti mahisile ku txani ti to Abrahamu, Davhidha ni Dhanieli ve va vangana va Jehovha? Jehovha a gete Abrahamu atxi khene: “U engisile dipswi dangu.” (Genesisi 22:18) Jehovha a maha mngana wa va va mu engisako ngu ku tiveka hahatshi. Hambi matiko a vathu ma nga va vangana vakwe. Ka ditiko da Israeli Jehovha a ti khene: “Engisani dipswi dangu, ani ni na va Txizimu txanu, se anu mi na va vathu vangu.” (Jeremiya 7:23) Se nawe ti lava u engisa Jehovha i di ti to ngu ditshuri wa ti lava ku va mngana wakwe.

4, 5. Jehovha a va vhikelisa ku txani vangana vakwe?

⁴ Bhiblia yi womba ti to Jehovha a wona totshe “kasi  kutsanisa avale mbilu yawe i ku yo thembeka tatinene kwakwe. (2 Matimu 16:9) Ka Masalmu 32:8 Jehovha a thembisa tiya ka vandoni vakwe: “Ni na kugondisa ni txi kukomba nzila yi u fanelako kutsimbila ngu yona. Ni na kutsimbitisa ni si leki ku kulwela.”

⁵ Ku ni mlala wa mtamo awu a lavako kumoxa wungana wathu ni Txizimu. Kambe Jehovha a lava ku hi vhikela. (Lera Masalmu 55:23.) Kota mngana wathu , hi mthumela ngu mbilu yotshe. Ha thembeka kwakwe hambi hi di hagari ka siduko. Futshi hi ni themba ayi mpisalma a nga ti nayo. A wombile tiya ngu Jehovha: “Yotshe mbimo ni na ni Mkoma masoni kwangu, kha ni na mbi dhukiswa ngu txilo.” (Masalmu 16:8; 63:9) Sathane a duketisa ku txani kutsivela vathu ku va vangana va Txizimu?

6. Nji txani atxi Sathane a nga txi womba ngu vathu?

⁶ Ka ndima 11 hi gondile ti to Sathane a vhukile Jehovha e tshumela e mlumbeta ti to a ni makuhu ni ku a bihile a si tumeleli Adhamu ni Evha ti to ve ti sawulela ati i ku ta tinene ni to biha. Bhiblia ka dibhuku da Jobe yi womba ti to Sathane a tshumete e lumbeta ava va lavako ku va vangana va Txizimu. A khene vathu va thumela Txizimu nguko va lava so maha i singa ku Txi dhunda. Sathane a tshumete atxi khene a jikisa vathu ti to ve lwisana ni Txizimu. He woni ti to hi nga gonda txani ka Jobe ni ti to Jehovha a m’vikelisile ku txani.

7, 8. a) Jehovha a ti ni wuxaka muni ni Jobe? b) Sathane a ti khene txani ngu Jobe?

⁷ I ti mani Jobe? Ene ive wamwamna wa mnene a nga hanya kona mu ka 3.600 wa malembe aya ma nga pinda. Jehovha a di khene ka mbimo yoneyo ku singa ni m’thu wo fana ni nene. Jobe a ti ni txixonipho txa hombe ka  Txizimu, ni ku a ti nyenya to biha. (Jobe 1:8) Ngu ditshuri Jobe i ti mngana wa hombe wa Jehovha.

⁸ Sathane a ti khene Jobe a thumela Txizimu ngu kulava so maha. A gete Jehovha atxi khene: “Ina khwa aka diguma da ku m’vhikela di txi m’ranganyeta ni m’ti wakwe wotshe ni sotshe simaha sakwe kani? U katekisile mthumo wa manza akwe ni mitxhambi yakwe ya sifuyo yi andile amu ditikoni. Aniko ngako u txi nawuluta diwoko dako, u txi gwesa simaha sakwe, u na wona ti to a na wombawomba siruko khoheni kwako.”—Jobe 1:10, 11.

9. Ngu tihi ati Jehovha a nga tumelela ti to Sathane e ti maha?

⁹ Sathane a lumbetile Jobe ti to a thumela Jehovha ngu mhaka ya si a ndino si mana kwakwe. A tshumete a txi khene ati to Jobe e thumela Jehovha a nga titxhipisa. Jehovha kha nga tumela toneto, kambe a tumelete Sathane ti to e duka Jobe ku na ti wona ngu ditshuri ti to Jobe o mu randa Jehovha.

10. Sathane a xaselisisile ku txani Jobe, se Jobe a mahile txani?

¹⁰ Sathane a khatile ngu kupa mwendo ku dayela sihari sa Jobe. Se e gwita e daya ni sithumi sa Jobe. Jobe a sate i di ene basi. Se ngu ku gwitisa, Sathane a date digume da vanana va Jobe ngu txingulo. Kambe Jobe a zumbile a di thembekile. “Ka totshelele tiya, Jobe kha nga za a di onhile, kambe kha nga za a di rukile Mkoma.”—Jobe 1:12-19, 22.

11. a) Ngu tihi timwane ati Sathane a nga mahela Jobe? b) Jobe a angulisile ku txani?

¹¹ Sathane kha nga karala. A vhukile Txizimu ngu ku khene: “Gwesa marambu ni nyama yakwe, u na mu wona a na kuruketela masoni kwako.” Sathane a xanisile Jobe ngu wulwati wo panda ngutu. (Jobe 2:5, 7) Hambi keto,  Jobe a thembekile ka Jehovha. Ati khene: “Kala ku za ni fa ni na tsanisa ti to kha ni nga ni mnando [mwendo kwa mbi leka kuthembeka]!”—Jobe 27:5.

12. Jobe a ti kombisisile ku txani ti to Sathane a ni makuhu?

¹² Jobe nem a si zivi txilo ngu ta mhaka ya Sathane mwendo ti to ngu ku txani a txi xaniseka ngutu. Ene a ti pimisa ti to sixanisa sakwe si vangwa ngu Txizimu. (Jobe 6:4; 16:11-14) Hambi keto, Jobe a simamile e thembeka ka Jehovha. Se konkuwa ti ti ha ku basani. Jobe a singa ni wutialakanyi. Ene i ti mngana wa Txizimu nguko a nga ti txi randa. Sotshe siduko sa Sathane i ti makuhu!

13. Yi ve yihi wuyelo ya kuthembeka ka Jobe?

¹³ Hambiku Jobe a nga ti si tizivi ti ti nga ti humelela nzumani, ene a thembekile ka Txizimu se e kombisa ti to Sathane i m’bihi. Jehovha a hakete Jobe ngu wungana wakwe wo thembeka.—Jobe 42:12-17.

14, 15. Ngu tihi ati Sathane a lumbetako vathu votshe ngu tona?

¹⁴ Awe u nga gonda gondo ya lisima kati ti nga humelela Jobe. Nyamsi, Sathane a khene athu hi thumela Jehovha ngu mhaka ya si hi no simana. Ka Jobe 2:4, Sathane a wombile tiya: “M’thu a nga sikota kuleka sotshe asi a ku naso, kufela kuxayisa wutomi wakwe.” Sathane a lumbetile vathu votshe ti to va ni wutialakanyi, I singa Jobe basi. Ka mazana zana a malembe msana ka kufa ka Jobe, Sathane aya masoni e ruka Jehovha ni kulumbeta malanda akwe. Ngu txikombiso, ka Mavingwa 27:11 hi mana tiya: “Ziva mwanangu kasiku u na tsakisa mbilu yangu, ngu kota yeto, ni na si kota kuxamula m’thu wule a ni rukako.”

¹⁵ Awe u nga sawula ti to u engisa Jehovha ni ku va  mngana wo thembeka, se u kombisa ti to Sathane i m’hembi. Hambi ti txi lava ti to u maha sisungo sa hombe ka wutomi wako ti to u va mngana wa Jehovha, nda tinene ku timaha. Txisungo txonenetxo nja lisima. Sathane a khene awe khu nambi thembeka ka Jehovha ngako u txi manana ni sikarato. Ene a duketa ku hi xasela ku na hi emisa ku va vangana va Txizimu. Ti mahisa ku txani eto?

16. a) Ngu tihi tinzila ati Sathane a ti thumisako ti to e lekisa vathu kuthumela Jehovha? b) Sathane a nga mahisa ku txani ti to e kuemisa kuthumela Jehovha?

¹⁶ Sathane a thumisa tinzila to hambana hambana ti to e hi lekisa ku va vangana va Txizimu. Ene a mahisa ku “nga ngonyamu yi yi bhongako yi txi lava wo mu kakatxula”. (1 Pedro 5:8) Ti nga ku xamalisi ngako vangana, maxaka mwendo vamwane va txi duketa ku kuemisa kugonda Bhiblia ni kumaha ti i ku taninene. Ti nga maha u ti pfa u txo xaselwa. * (Johane 15:19, 20) Sathane wa titxitxa e timaha “ngelozi ya liwonigo”. Kambe ene o duketa ku hi riyela ti to hi si engisi Jehovha. (2 Vakorinto 11:14) Nzila yimwane ayi a riyako ngu yona ngu hi maha hi pimisa ti to athu kha hi nga va txilo ti to hi thumela Txizumu.—Mavingwa 24:10.

17. Ngu ku txani hi txi engisa Jehovha?

¹⁷ Ngako hi txi engisa Jehovha, hi kombisa ti to Sathane i m’hembi. Nji txani txi txi no hi vhuna kuengisa? Bhiblia yi khene: “U na randa Mkoma Txizimu txako ngu yotshe mbilu yako, ngu wotshe moya wako, ni wotshe  mtamo wako.” (Dheuteronome 6:5) Hi engisa Jehovha nguko hi m’randako. Ngako lirando lathu ka Jehovha li txi kula, hi na lava kumaha totshe ati a hi kombelako tona. Mpostoli Johane ati khene: “Nguko kuranda Txizimu ti womba kuveketa milayo ya txona; futshi milayo ya txona khayi nemeli.”—1 Johane 5:3.

18, 19. a) Ngu sihi silo simwane asi Jehovha a wombako ti to si bihile? b) Hi tizivisa ku txani ti to Jehovho kha hi kombeli ati hi nga ti tandako ku ti maha?

¹⁸ Kambe ngu tihi ati Jehovha a hi gelako ti to ti bihile? Ndite timwane ka dibhokiso di di ku “ Ati Jehovha a ti vengelako”. Txo khata, ti nga maha u alakanya ti to timwane ka timhaka tiya kha ta biha ngutu. Kambe ngako u txi lera kha kwati tindimana ta Bhiblia u tshumela u alakanyisisa ngu tona, u na pfisisa wuzivi wo engisa milayo ya Jehovha. Ti nga maha u ti pfa u txi lava kutxitxa to kari ka wutomi wako. Hambiku wumwane mkama ti nga  karatako, u txo txitxa, u na va ni khudikha ni litsako ali li tako ngu ku va u ti mngana wo thembeka wa Txizimu . (Isaya 48:17, 18) Hi ti zivisa ku txani ti to ta koteka ku txitxa?

¹⁹ Jehovha ka hi geli ti to hi maha timhaka ati hi si tikotiko. (Dheuteronome 30:11-14) Kota ku i ku mngana wa ditshuri, wa ti ziva ta tinene kwakwe ku pinda ati hi tizivisako tona. Wa tiziva ti to hi tsani hani ni ha hi nga mbi tsana kona. (Masalmu 103:14) Mpostoli Paulo a hi tsanisile a txi khene: “Txizimu txi thembekile, kha txi na kutumela ti to mi txi dukwa ngu si si ku txitimwi ka mtamo wanu, aniko ngako txiduko txi txi mi tela, a na mi ninga nzila ya ku pona ka txona, ni mtamo wa ku txi rwala.” (1 Vakorinto 10:13) Hi nga tsaniseka ti to Jehovha mbimo yotshe a na hi ninga mtamo wo maha ti i ku ta tinene. Ene a ku ninga “mtamo wa hombe” ti to e kuvhuna kutsanisela siduko. (2 Vakorinto 4:7) Msana ko pfa txivhuno  txa Jehovha ngu mbimo ya sikarato, Paulo a bhate tiya: “Totshe na ti kota ngu kutsaniswa ngu wule a ningako mtamo.”—Vafilipiya 4:13.

20. Ngu tihi tifanelo ati awe u nga ti tekelelako, ni ku ngu txani?

²⁰ Ngako hi txi lava ku va vangana va Jehovha, hi fanete hi leka kumaha ati Jehovha a wombako ti to ti bihile, kambe hi fanete hi maha to tala. (Varoma 12:9) Vangana va Txizimu va randa ati txi ti randako. Eto ti txhamusetwe ka Masalmu 15:1-5. (Yi lere.) Vangana va Jehovha va etetela tifanelo takwe ni ku kombisa “lirando, litsako, kudikha, kutimisela, wunene, kutshambisa, kuthembeka likholo, kuthutha, kutipimela.”—Vagalatiya 5:22, 23.

21. U nga mahisa ku txani ti to u gonda kukombisa tifanelo ti Txizimu txi ti dhundako?

²¹ Hi nga ti kombisa ngu nzila yihi tifanelo toneto to tshura? U fanete u gonda ati Jehovha a ti dhundako ngu kulera ni kugonda Bhiblia mkama ni mkama. (Isaya 30:20, 21) Se ngako u txi maha tiya, lirando lako ngu Jehovha li na kula, se mbimo yi li kulako u na lava ku mu engisa.

22. Nji txani u no wuyelwa ngu txona ngako u txi engisa Jehovha?

²² Ku txitxa ku u fanelako ku kumaha ka wutomi wako ku nga fananiswa ni ku xivila dibhaji da kale se u ambala da diphya. Bhiblia yi khene u fanete u “xivila m’thu wa kale” se u ambala “m’thu wa mphya”. (Vakolosa 3:9, 10) Hambiku atiya ti no mbi hehuka, mbimo yi hi txitxako se hi kengisa Jehovha, ene a hi thembisa ku hi ninga “hakelo”. (Masalmu 19:11) Ngu koneho, sawula ku engisa Jehova, se u kombisa ti to Sathane i mu hembi. Thumela Jehovha, i singa ngu mhaka ya si u no ningwa mbimo yi yi tako, kambe ngu lirando li li singako ni wukanganyisi. Se u na va mngana wa ditshuri wa Txizimu!