GONDO 03

Ina wa kholwa ti to ati Bhiblia yi ti wombako ditshuri?

TXHAYA

Bhiblia ya womba timhaka to tala ati ti no maheka mbimo ayi yi tako, ni ku ya ninga sileletelo ka wutomi. Ti nga maha awe u txi la kuziva ti to Bhiblia yi gondisa txani, hambiketo ti nga maha u txi kana-kana. Aku Bhiblia i ku dibhuku da kale ngutu, ina u nga kholwa ka ti di ti wombako? Ina awe u nga kholwa ti to ati Bhiblia yi ti wombako ti nga kuvhuna konku ni mbimo ayi yi tako? Vathu vo tala va kholwa. Konkuwa he wone ti to ina nawe u nga kholwa kani?

1. Ina Bhiblia yi womba ditshuri mwendo dibhuku da tikaringani?

Bhiblia yi womba ti to totshe ati ti nga bhalwa ka yona, “mapswi a ditshuri.” (Ekleziyaste 12:10) Vathu ava Bhiblia yi womba-wombako ngu vona mbathu ava va nga vaho ngu ditshuri. (Lera Luka 1:3; 3:1, 2.) Vaxolisisi va ta matimu ni vaphandi va silo sa txikale, va tumbute silo asi si kombisako timbimo, vathu, makhalo, ni simahakalo asi si wombwako amu ka Bhiblia.

2. Hi tizivisa kutxani ti to Bhiblia kha ya pindelwa?

Yona yi womba-womba ngu timhaka ati ti nga si ziwi mbimo yi ti nga bhalwa ngu yona. Purezemplo, yona ya womba-womba ngu ta siyensia. To tala ati yi ti wombako ti txi kanetwa mbimo yi ti nga bhalwa ngu yona. Hambiketo vamwasiyensia va tumbute ti to ati Bhiblia yi nga ti womba kukhukhela kale, ditshuri, nguko yona “yi tsanisilwe kala kupinduka.”—Masalmo 111:8.

3. Ngu kutxani hi txi themba ati Bhiblia yi ti wombako ngu wumangwana?

Bhiblia yi ni wuprofeti a awu wu womba-wombako ngu “atile ti sanziko kumaheka.” (Isaya 46:10) Bhiblia yi profetile timhaka to tala na ti si se maheka. Yona yi wombile ati wutomi wa nyamsi wu ndi no zumbisa tona. Ka gondo yiya hi na xolisisa wuprofeti wungahyana. Wuprofeti wonewo wa xamalisa!

ENGETELA WUZIVI WAKO

Xolisisa nzila ayi Bhiblia yi yelanako ngu yona ni siyensia u tshumela u xolisisa wuprofeti wo xamalisa wa mu ka Bhiblia.

4. Bhiblia ya tumelelana ni siyensia

Kale vathu vo tala va ti kholwa ti to mafu ma txitimwi ka txomaha. Xalela VHIDHIYO.

VHIDHIYO: Mafu kha ma nga txitimwi ka txilo (1:13)

Wona ati dibhuku da Jobe di nga womba 3.500 wa malembe aya ma nga pinda. Lera Jobe 26:7, mi gwita mi bhula ngu txiwotiso txiya:

Ngu kutxani mapswi aya ma ku khene mafu ma ha “ko mbi na txilo” ma txi xamalisa?

Kona mu ka ma 1800, ngu kona vathu va nga ta pfisisa mathumelo a mati. Kambe ngale Bhiblia yi di wombile eto. Lera Jobe 36:27, 28, mi gwita mi bhula ngu siwotiso siya:

Ngu kutxani ati Bhiblia yi ti wombako mayelano ni mathumelo a mati ti txi xamalisa?
Ina mibhalo yi u nga yi lera ya kumaha u kholwa ti to ati Bhiblia yi ti wombako ditshuri?

5. Bhiblia yi profetile ati ti nga gwita ti maheka

Lera Isaya 44:27–45:2, mi gwita mi bhula ngu txiwotiso txiya:

Ngu tihi ati Bhiblia yi nga ti profeta ngu Bhabhilona ati ti nga gwita ti maheka ku di pindile 200 wa malembe?

Xalela VHIDHIYO.

VHIDHIYO: Bhiblia yi profetile ngu ku loviswa ka Bhabhilona (0:58)

Vaxolisisi va ta matimu va tsanisekisa ti to Siro ni mabutho akwe va xute Bhabhilona ngu 539 A.C. b Vona va jikisile mati a m’nambo awu wu nga ti vhikete didhoropa. Msana kova va di bete didhoropani ngu kuthumisa matimba aya ma nga ti sa vhalwa va xute didhoropa ti sa lava ku velwa. Nyamsi se kupinda 2.500 wa malembe Bhabhilona i di marumbi. Wona ati Bhiblia yi nga ti profeta mayelano ni mhaka yiya.

Lera Isaya 13:19, 20, mi gwita mi bhula ngu txiwotiso txiya:

Wuprofeti mayelano ni Bhabhilona wu hetisekile ngu nzila yihi?

Marumbi a Bhabhilona khe Iraque

6. Bhiblia yi profetile ngu i ti mahekako nyamsi

Bhiblia yi womba ti to hi hanya “ka masiku a kugwitisa.” (2 Timoti 3:1) Wona ati Bhiblia yi nga ti profeta mayelano ni masiku a ngweno.

Lera Matewu 24:6, 7, mi gwita mi bhula ngu txiwotiso txiya:

Ngu tihi ati Bhiblia yi nga profeta to ti na ta maheka ka masiku a nyamsi?

Lera 2 Timoti 3:1-5, mi gwita mi bhula ngu siwotiso siya:

Ngu yahi mahanyelo aya vathu nyamsi va ku nawo aya ma nga wombwa amu ka Bhiblia?
Ka mahanyelo aya ma nga wombwa amu ka Bhiblia, ngu yahi aya u ma wonako?

NGAKO VATHU VA TXI KHONA: “Bhiblia dibhuku da tikaringani ni sitoriya.”