GONDO 07

Jehovha a zumbisile kutxani?

TXHAYA

U txi pimisa ngu Jehovha u wona txani? Ina u m’wona a di ni mtamo ngutu, awu a ku kule ni nawe kufana ni tinyeleti? Mwendo u m’wona i di txo kari txi ku ni mtamo ngutu kufana ni txingwala-ngwanda? Kasi Jehovha a zumbisile kutxani? Jehovha wa womba apune timwani ta tifanelo takwe amu ka Bhiblia ni kutshumela e womba ti to wa khatala ngu ngawe.

1. Ngu kutxani ti si koteki kuwona Txizimu?

“Txizimu i moya.” (Johani 4:24) Jehovha kha nga ni mmidi wa nyama. Ene i moya ni ku a hanya nzumani i ku wukhalo awu ti si kotekiko ku wu wona.

2. Ngu tihi tifanelo ta Jehovha?

Athu kha hi na kusikota kuwona Jehovha, kambe hi nga sikota kuziva ti to m’thu wo zumbisa kutxani. Bhiblia yi khene: “MKOMA a randa kululama ene kha leki vathu va va mthembako.” (Masalmo 37:28) Ene kambe “ana ni wumbilu ni divalelo” ngutu-ngutu ka va va xanisekako. (Jakobe 5:11) “MKOMA a hafuhi ka vale va ku kupandisekani ka mbilu; Ene wa hanyisa a vale va si swiko va di ni kuthemba.” (Masalmo 34:18) Ina u txi tiziva ti to Jehovha wa tsaka mwendo kuhenya ngu ti hi ti mahako kani? Ngako m’thu a txi sawula kumaha timhaka to biha, Jehovha wa henya. (Masalmo 78:40, 41) Kambe ngako m’thu a txi sawula kumaha ta tinene, Jehovha wa tsaka.—Lera Mavingu 27:11.

3. Jehovha a ti kombisisa kutxani ti to wa hi dhunda?

Fanelo ya hombe ayi Jehovha a ku nayo, lirando. Phela Bhiblia yi khene: “Txizimu, Lirando.” (1 Johani 4:8) Ati ti nga bhalwa mu ka Bhiblia ti kombisa ti to Jehovha ngu ditshuri wa hi randa kambe kha gwitela eho dwe, ene a tshumela e kombisa ti to a ni lirando ni ka silo asi a nga si vanga. (Lera Mithumo 14:17.) Hi nga wona ati a nga hi vangisa tona! Ene a hi vangile kasiku hi sikota kuwona tikori to tshura kuengisa wutxenje ni kupfa kutshamba ka sakudya. Ene a lava ku hi tidila ngu wutomi.

ENGETELA WUZIVI WAKO

Wona to Jehovha a thumisa txani ti to e maha timhaka to xamalisa. Tshumela u wona nzila yi Jehovha a kombisako ngu yona tifanelo takwe to tshura.

4. Moya wo sawuleka i mtamo wa Txizimu

Kufana ni vathu va thumisako mawoko kasi kumaha to maha, Jehovha a thumisa moya wo sawuleka. Bhiblia ya womba ti to moya wo sawuleka hi nga m’thu, kambe mtamo awu Txizimu txi wu thumisako kasi ku txi maha mithumo ya txona. Lera Luka 11:13 ni Mithumo 2:17, mi gwita mi bhula ngu siwotiso siya:

Ngako hi txi kombela moya wo sawuleka, Txizimu txi na wu “thela txitimwi” kwathu. Ina u pimisa ti to moya wo sawuleka m’thu mwendo mtamo wa Txizimu? Ngu kutxani u txi womba toneto?

Jehovha a thumisa moya wo sawuleka kasi kumaha mithumo yo xamalisa. Lera Masalmo 33:6 ni 2 Pedro 1:20, 21, mi gwita mi bhula ngu txiwotiso txiya:

Jehovha a thumisile moya wakwe wo sawuleka kasi kumaha txani?

5. Jehovha a ni tifanelo to tshura

Mosi a txi khozela Jehovha ngu kuthembeka, kambe atxi lava kuziva to tala ngu M’vangi wakwe. Se Mosi a kombete tiya ka Jehovha: “Ni kombise tinzila tako, ni na kuziva.” (Eksodha 33:13) Jehovha a xamute Mosi ngu ku mu gela to a zumbisile kutxani. Lera Eksodha 34:4-6, mi gwita mi bhula ngu siwotiso siya:

Ngu tihi tifanelo ati Jehovha a nga gela Mosi?
Ngu tihi tifanelo ta Jehovha ati ti ku tsakisako ngutu?

6. Jehovha wa khatala ngu vathu

Vaisrayeli i nga ti vathu va Txizimu i ti sibotxhwa khe Egipta. Jehovha a tipfisile kutxani mbimo yi va nga ti xupheka? Engiselani AUDHIYO motshe mwendo mi lera Eksodha 3:1-10. Mi gwita mi bhula ngu siwotiso asi si londiselako.

AUDHIYO: Jehovha a ti karateka ngu kuxaniseka ka vathu kwawe (2:45)

Ngu kuya ngu audhiyo yiya, u pimisa to Jehovha a ti pfisa kutxani ngako vathu va txi xaniseka?—Wona vhersikulo 7 ni 8.
U pimisa to Jehovha wa tilava kuvhuna vathu? Ina a na ti kota? Ngu kutxani?

7. Mtumbuluko wu kombisa tifanelo ta tinene ta Jehovha

Jehovha wa kombisa tifanelo takwe ta tinene ka silo asi a nga si vanga. Xalela VHIDHIYO. Mi lera Varoma 1:20, mi gwita mi bhula ngu txiwotiso atxi txi londiselako.