GONDO 09

Tshuketa hafuhi ka Txizimu ngu mkombelo

TXHAYA

Ina u lava wo ku kongomisa ka wutomi? Ina ku ni siwotiso sa wutomi asi u lavako xamulo ya sona? Ina u lava kuthavelelwa ni kutsaniswa? Ina wa tilava kutipfa u di hafuhi ni Jehovha? Mkombelo wu nga kuvhuna ka timhaka tiya. Kambe u fanete u khongelisa kutxani? Ina Txizimu txa engisa yotshe mikombelo? U nga maha txani ti to mikombelo yako yi engiswa? He tiwone kumweko.

1. Hi fanete kumaha mkombelo ka mani? Hi nga kombela txani?

Jesu a hi gondisile ti to hi fanete kukombela ka Tate wathu wa nzumani. Hambi ene Jesu a mahile mkombelo ka Jehovha. Ene a ti khene: “Anu mi na khongelisa tiya: ‘Tata wathu, u ku nzumani . . .’” (Matewu 6:9) Ngako hi txi maha mkombelo ka Jehovha, wungana wathu ni nene wu na kula.

Hi nga kombela txihi ni txihi atxi txi si lwisaniko ni kudhunda ka Txizimu, txona txi na hi xamula. “Ngako hi txi txi kombela txo maha, madingano ni kuranda ka Txizimu, txa hi engisa.” (1 Johani 5:14) Jesu a hi vekete txikombiso txa si hi nga si kombelako. (Lera Matewu 6:9-13.) Mbimo yi hi mahako mkombelo hi nga womba-womba ngu ti ti hi karatako, kambe kha ha fanela kudivala kubonga Txizimu ngu ti txi nga hi mahela ni ku txi kombela ku txi vhuna vamwani.

2. Hi fanete kumahisa kutxani mkombelo?

Bhiblia yi hi kuzeta ku hi ‘tshakunuta sotshe si si ku mbiluni kwathu ka [Txizimu].’ (Sidilo 2:19) Se mikombelo yathu yi fanete yi khukhela mbiluni. Hi nga khongela ngu dipswi do guleka mwendo mbiluni. Hi nga khongela hi di emile, hi di khizamile, hambi hi di khalahatshile, ti txa ngava ti txi kombisa txixonipho. Hi nga khongela mbimo yimwani ni yimwani ni wukhalo wumwani ni wumwani.

3. Txizimu txi xamulisa kutxani mikombelo yathu?

Txizimu txi xamula mikombelo yathu ngu tinzila to hambana-hambana. Jehovha a hi ningile dipswi dakwe i ku Bhiblia amu hi nga manako kona tixamulo ta siwotiso sathu. Kulera Bhiblia ta “ninga wuzivi ka m’thu wo divala.” (Masalmo 19:7; lera Jakobe 1:5.) Ene a nga hi vhuna ti to hi si karateki ngako hi di ni sikarato. Ene a nga thumisa vakhozeli kulothi ti to ve ta hi vhuna.

ENGETELA WUZIVI WAKO

Wona nzila yi u nga mahako ngu yona mkombelo wo huma mbiluni awu wu tsakisako Txizimu. Tshumela u wona to mkombelo wu nga kuvhunisa kutxani.

4. Kulaveka txani ti to Txizimu txi xamula mikombelo yathu?

Ti to Txizimu txi xamula mikombelo yathu ngu tihi ati txi khatako ngu kutiwona kwathu? Xalela VHIDHIYO.

VHIDHIYO: Ina Txizimu txa yi engisa yotshe mikombelo?—Txienge (2:42)

Jehovha a lava ti to hi maha mkombelo kwakwe. Lera Masalmo 65:2, mi gwita mi bhula ngu siwotiso siya:

Ina u pimisa ti to awu ‘a engisako mikombelo’ a lava ti to u maha mkombelo kwakwe? Ngu kutxani?

Ti to Txizimu txi engisa mikombelo yathu hi fanete hi hanya ngu milayo ya txona. Lera Mika 3:4 ni 1 Pedro 3:12, mi gwita mi bhula ngu txiwotiso txiya:

Hi nga tsanisekisa kutxani ti to Txizimu txa engisa mikombelo yathu?

Mitxawa yimbidi ayi yi lavako ku ya manana yi lwa, yotshe yi thanga ngu kumaha mkombelo ti to yi ya xula, u pimisa ti to Txizimu txi na xamula mkombelo ya vamani?

5. Mikombelo yathu yi fanete yi khukhela mbiluni

Vathu vamwani va gondiswa ti to va fanete kuwuyeletela mapswi ona ya a mamwewo ka mkombelo wumwani ni wumwani. Kambe ina Txizimu txi lava hi mahisa toneto mkombelo? Lera Matewu 6:7, mi gwita mi bhula ngu txiwotiso txiya:

Hi fanete hi maha txani ti to hi vayilela kuwuyeletela mapswi ka mikombelo yathu?

Ditshiku dimwani ni dimwani alakanya ngu to kari to tsakisa ati Jehovha a nga kumahela ka wutomi wako, se u m’bonga ngu toneto. U txi maha tiya ditshiku ni ditshiku, ngu divhiki u nava u di khongete ngu 7 wa silo so hambana, u si wuyeleteli timhaka ta timweto.

Tate wa mnene wa tsaka ngako mwanana wakwe a txi m’gela ta mbiluni. Jehovha nene a lava hi m’gela ta mbiluni ngu mkombelo

6. Mkombelo i ningo ayi yi tako ngu ka Jehovha

Mkombelo wu nga hi ningisa kutxani mtamo ka timbimo ta tinene ni ka timbimo to karata? Xalela VHIDHIYO.

VHIDHIYO: Mkombelo wa hi vhuna kuwonisana ni sikarato (1:32)

Bhiblia ya thembisa ti to mkombelo wu nga hi vhuna ku hi si karateki. Lera Vafilipiya 4:6, 7, mi gwita mi bhula ngu siwotiso siya:

Ha tiziva ti to hambi hi txi maha mkombelo sikarato kha si nyamalali, se wu hi vhunisa kutxani?
Ngu tihi ati u nga ti kombelako ka Jehovha?

Ina u ti ti ziva?

Dipswi adi di ku “amen” di womba to “ti na mahise toneto” mwendo “ngu ditshuri.” Kukhukhela kale “amen” wa thumiswa magwito ka mikombelo.—1 Makronika 16:36.

7. Tihe mbimo yo maha mkombelo

Mbimo yimwani hi nga thuka hi va bhisi hi divala ni kumaha mkombelo. Mkombelo i ti wa lisima ngutu ka Jesu. Lera Matewu 14:23 ni Marku 1:35, mi gwita mi bhula ngu siwotiso siya: