GONDO 10
Mitshangano ya Tifakazi ta Jehovha yi nga kuvhunisa kutxani?
Ina u khala kurambwa u ya ka mitshangano ya Tifakazi ta Jehovha? Ngako u si khali kuya ka yona ti nga maha u txi thava kutsula. U nga ti wotisa tiya: ‘Ku maheka txani ka mitshangano ya Tifakazi ta Jehovha? Ina nja lisima? Ni txi tsula na ya maha txani?’ Ka gondo yiya hi na wona to kutshangana ni vamwani ti nga kutshuketisa hafuhi ni Txizimu ni ku kuvhuna ka wutomi wako.
1. Ngu kutxani hi txi maha mitshangano?
Wona ati M’bhali mmwani wa Bhiblia a nga womba ngu mhaka yo tshangana ni vamwani: “Ni na dhumisa MKOMA misengeletanoni.” (Masalmo 26:12) Tifakazi ta Jehovha ni tona ta mana litsako ngako ti txi tshangana kumweko. Hamafuni kotshe divhiki ni divhiki tona ta dhumisa Txizimu ngu kuembelela ni kukhongela. Niku dilembe ni dilembe ta tshumela ti tshangana ngu mitxawa ya hombe kasi kukhozela Jehovha.
2. Kugondwa txani ka mitshangano?
Hi di mitshanganoni ha xolisisa, hi “junyatisa ni kutxhamusela” Dipswi da Txizimu. (Lera Nehemiya 8:8.) Ngako u txi ya ka mitshangano u na ya gonda ngu Jehovha ni tifanelo takwe to tshura. Aku u no ya pfisisa ati Txizimu txi kudhundisako tona, u na lava kutshuketa hafuhi ka txona. U na tshumela u wona to txona txi nga kuvhunisa kutxani ti to u hanya wutomi wo tsakisa.—Isaya 48:17, 18.
3. Mitshangano yi hi vhunisa kutxani?
Jehovha a hi gela ti to hi ‘vhunana, hi txi tsaniselana amu ka lirando ni ka mithumo ya yinene, hi si leki misengeletano yathu.’ (Vahebheru 10:24, 25) Ka mitshangano yathu u na ziva vathu ava ngu ditshuri va khatalako ngu vamwani, ava ni vona va lavako kugonda ngu Txizimu kufana ni nawe. U na akwa ngu tigondo ta mu ka Bhiblia. (Lera Varoma 1:11, 12.) U na tshumela u ziva vathu vamwani ava va simamako ni litsako hambiku va mananako ni sikarato ka wutomi wawe. Atiya ndimwani ta ti timahako Jehovha e lava ku hiya mitshanganoni mbimo yotshe.
ENGETELA WUZIVI WAKO
Wona nzila yi mitshangano ya Tifakazi ta Jehovha yi mahiswako tona ni ku ngu kutxani hi di fanete hi maha mizamo yo maneka ka yona.
4. Mitshangano ya Tifakazi ta Jehovha
Ka mbimo ya Makristu o khata, ona ma txi tshangana ti to me khozela Jehovha. (Varoma 16:3-5) Lera Vakolosa 3:16, mi gwita mi bhula ngu txiwotiso txiya:
-
Makristu o khata ma txi khozelisa kutxani Jehovha?
Nyamsi Tifakazi ta Jehovha ta tshangana divhiki ni divhiki ka makhalo a wukhozeli. Kasi kuwona ati yi mahiswako tona, xalela VHIDHIYO. U wona mfota awu wu kombisako mitshangano mi gwita mi bhula ngu siwotiso asi si londiselako.
-
Ngu kuhi kuyelana ka ti u nga ti wona ka vhidhiyo ni ti u nga ti gonda ka Vakolosa 3:16?
-
Ka vhidhiyo yiya ni ka mfota ngu tihi timwani u nga ti wona ti kutsakisako mayelano ni mitshangano?
Lera 2 Vakorinto 9:7, mi gwita mi bhula ngu txiwotiso txiya:
-
Ngu kutxani ku si mahwi misengo ka mitshangano ya Tifakazi ta Jehovha?
Wonani ati ti no ta gondwa ka mitshangano ya divhiki donedo.
-
Ngu yihi parte ya mitshangano ayi yi nga kutsakisa ngutu?
Ina u ti ti ziva?
Ka site ya jw.org, u nga mana amu yi mahelwako kona mitshangano ha mafuni kotshe.
-
Mitshangano ya Tifakazi ta Jehovha yi pata miwombawombo, mikombiso ni mavhidhiyo, yona yi khata ni kugwita ngu ndando ni mkombelo
-
Ka maparte mamwani a mitshangano ava va tilavako va nga xamula
-
Votshe va rambwa, timwaya, majovem vo kumba ni vanana
-
Kubelwa mahala. Tifakazi ta Jehovha kha ti mahi misengo
5. Ti lava mizamo ti to u xalela mitshangano
Wona txikombiso txa mwaya wa Jesu. Vona va txi xalela mtshangano wa hombe awu wu nga ti mahwa dilembe ni dilembe khe Jerusalema, kukhukhela Nazareta kala Jerusalema i ti mpfhuka wo dingana 100 wa makilometro ka nzila ayi yi nga ti ni situnga ni sivhunye. Lera Luka 2:39-42, mi gwita mi bhula ngu siwotiso siya:
-
Ina u pimisa ti to liendo lo khukhela Nazareta kala Jerusalema li ti hehuka?
-
Ngu kutxani u di fanete kumaha mizamo yo kari ti to u xalela mitshangano?
-
Ina u pimisa ti to kuya mitshanganoni ti ni lisima? Ngu kutxani?
Bhiblia yi womba ti to kuxalela mitshangano ti ni lisima ngutu. Lera Vahebheru 10:24, 25, mi gwita mi bhula ngu txiwotiso txiya:
-
Ngu kutxani u sa fanela kulovha mitshanganoni?
NGAKO VATHU VA TXI KHONA: “Kha ti sungi to u ya tshangana ni vamwani. Txizimu u nga txi khozela hambi u di mtini.”
-
Ngu wuhi M’bhalo mwendo timwani ta mu ka Bhiblia ti kombisako ati Jehovha a ti lavako?
ATI HI NGA TI WONA
Ngako u txi xalela mitshangano yi na kuvhuna to u gonda to tala ngu Jehovha, u kulisa wungana wako ngu ngene ni kutshumela u mkhozela kumweko ni vamwani.
Ngu tihi ti u nga ti gonda
-
Ngu kutxani Jehovha a txi lava hi ya mitshanganoni?
-
U na ya gonda txani ka mitshangano ya Tifakazi ta Jehovha?
-
Ina u pimisa ti to mitshangano yi nga kuvhuna ka siemo simwani?
XOTA TIMWANI
U nga maha txani ngako u txi thava kuya mitshanganoni? Wona to ngu kutxani dijaha dimwedo adi di nga ti thava kuya mitshanganoni konku di txi kudhunda.
Kha hi na ku yi divala nzila yi va nga hi amukela ngu yona (4:16)
Wona to dijaha dimwani di mahile txani ti to di dhunda mitshangano ni ku di maha txani ti to di simama diya.
Wona ati vamwani va ti pfisako tona ngu kuxalela mitshangano.
“Ngu kutxani i di tinene kuxalela mitshangano Nyumbani ya Mfumo?” (Msungo mhaka wu ku ka site)
Wona nzila yi dijaha dimwani adi i nga ti txigevenga di nga txitxa ngu yona dihanyo msana kova di di khatile kuxalela mitshangano ya Tifakazi ta Jehovha.
“Ni si khukhi ni singa ni txibhamu txangu” (Muwoneleli wa 1 ka Julho wa 2014)
