GONDO 11

U nga maha txani ti to u yi pfisisa kwati Bhiblia?

TXHAYA

Ina u khala kutipfa u di nemeletwe ngu mthumo wa hombe awu ti lavako u wu maha? Ti to wu ku hehukela ti nga maha u di wu abanisete kasiku u wu maha kudotho-kudotho. Kumaheka ati ti fanako ngu kulera Bhiblia. Ti nga maha u txi tiwotisa tiya: ‘Na yi khatela hayi?’ Gondo yiya yi na kombisa tinzila ati ti nga kuvhunako ti to u dhunda kulera ni kugonda Bhiblia.

1. Ngu kutxani hi di fanete kulera Bhiblia ditshiku ni ditshiku?

M’thu wu a lerako Bhiblia, mwendo “Mlayo wa MKOMA,” a na tsaka e tshumela e eneliseka. (Lera Masalmo 1:1-3.) Ti to u khata, zama ku yi lera mbimo ya yidotho ditshiku ni ditshiku. Ngako u txi ya u tolovelana ni Dipswi da Txizimu u na ya u pfa kutshamba ko lera Bhiblia.

2. Nji txani txi nga kuvhunako ti to u yi pfisisa kwati Bhiblia?

Ti to hi vhuneka mbimo yi hi lerako Bhiblia, hi fanete kuema hi alakanyisisa ngu ti hi ti lerako. I ku ti to hi fanete kumaha timhaka timbidi: Kulera ni ‘kualakanyisisa’ ngu ti hi ti lerako. (Joxuwa 1:8) Mbimo yi u lerako ti mahe siwotiso so fana ni siya: ‘Atiya ti ni gondisa txani ngu Jehovha? Ni nga ti thumisisa kutxani ka wutomi wangu? Ni nga ma thumisisa kutxani ma vhersikulo yawa ti to ni vhuna vamwani?’

3. U nga maha txani ti to u mana mbimo yo lera Bhiblia?

Ina ta kukaratela kumana mbimo yo lera Bhiblia? Wungi wathu ta hi karatela. Hambi keto zama ‘kulondola mbimo yi u ku nayo.’ (Vaefesu 5:16) U nga mana mbimo ngu kuvekisa mkama wo kari ditshiku ni ditshiku ti to u lera Bhiblia. Vamwani va lera Bhiblia va di ngadi kuwuka ni mixo. Vamwani va lera ni mitshikari mbimo yi va susulako. Kasi vamwani va lera Bhiblia ni wusiku mbimo yi va lavako kuotela. Ani awe ko, u nga lera ngu mbimo muni?

ENGETELA WUZIVI WAKO

Wona to u nga mahisa kutxani kasiku u pfa kutshamba u txi lera Bhiblia. Tshumela u wona to u nga ti lulamiselisa kutxani ti to u yi pfisisa kwati.

Kufana ni ku hi nga gondelako kudhunda kudya sakudya asi hi si khaliko ku sipfa, hi nga sikota kugondela kudhunda kulera Bhiblia

4. Wona tinzila to tsakela kulera Bhiblia

Ti nga maha ti si ku hehukeli kukhata kulera Bhiblia. Kambe u nga sikota ‘kunavela’ kumaha toneto, kufana ni m’thu awu a nga gondelako kudhunda kudya sakudya asi a si khaliko kudya. Lera 1 Pedro 2:2, mi gwita mi bhula ngu txiwotiso txiya:

Ngako u txi lera Bhiblia ditshiku ni ditshiku, u wona ti to eto ti nga kumaha u tsakela kusimama u yi lera?

Xalela VHIDHIYO ti to u wona to vamwani va khatisile kutxani kudhunda kulera Bhiblia. Mi gwita mi bhula ngu siwotiso asi si londiselako.

VHIDHIYO: Vaphya va gonda kudhunda dipswi da Txizimu (5:33)

Ngu sihi sikarato asi vaphya vamwani va nga si xula?
Nji txani txi nga va vhuna ti to ve hokelela makungo awe o lera Bhiblia?
Va mahile txani ti to kulera kwawe ka Bhiblia kuva ko tsakisa?

Tinzila ati ti nga kuvhunako ti to u khata kulera Bhiblia:

Sawula tradhusawu yo thembeka ya mapswi o hehuka. Duketa Tradução do Novo Mundo ngako yi diho ngu lidimi lako mwendo limwani ali u li pfisisako kwati.
Khata ngu kusawula sienge asi si ku tsakisako ngutu. Ti to u wona to u nga mahisa kutxani wona dibhokiso adi di ku: “Khata kulera Bhiblia.”
Alakanyisisa ngu ti u nga lera. Thumisa dibhokiso adi di ku ka dibhuku diya adi di ku: “Aha ni nga gwitela kona”.
Thumisa aplikativho ya JW Library^®. Ka yona u nga lera Bhiblia mwendo kuengisela o va hani aha u ku kona ngu kuthumisa fone mwendo txithumiswa tximwani.
Thumisa ma apêndice aya ma ku ka Tradução do Novo Mundo. Ka ona ku ni mimapa, magrafiko ni glosariyo asi si mahako to leyitura ya Bhiblia yi tsakisa.

5. U txi lava kugonda ti lulamisele

Lera Masalmo 119:34, mi gwita mi bhula ngu txiwotiso txiya:

Ngu kutxani i di ta lisima kumaha mkombelo u si se lera Bhiblia mwendo kukhata kululamisela gondo?

U nga maha txani ti to u wuyelwa mbimo yi u gondako? Mbimo yi u lulamiselako gondo ya dibhuku diya, zama kumaha ati ti londiselako:

Lera maparagrafu o khata a gondo yimwani ni yimwani.
Lera yotshe mibhalo, u zama kuwona to yi yelanisa kutxani ni mhaka yi u yi gondako.
Markara tixamulo ta siwotiso. Eto ti na kuvhuna ku ta bhula kwati ni wu a ku gondelako.

Ina u ti ti ziva?

Tifakazi ta Jehovha ti thumisile Mabhiblia o hambana-hambana. Kambe tona ti dhunda kuthumisa Tradução do Novo Mundo da Bíblia Sagrada nguko Bhiblia yiya kha yi jika-jiki, ta hehuka ku yi pfisisa, ni ku ya thumisa ditina da Txizimu.—Wona msungo mhaka wu ku ka site “Ina Tifakazi ta Jehovha ti ni Bhiblia yo hambana ni Mabhiblia mamwani?”

NGAKO VATHU VA TXI KHONA: “Kugonda Bhiblia ta karata ngutu. Kha ni nga ni mbimo mwendo ni zumba ni di karate.”