GONDO 16
Ngu tihi ati Jesu a nga ti maha mbimo yi a nga ti ha mafuni?
Vathu vo tala va txi pimisa ngu Jesu va wona limenzana, mprofeti wo ziva ngutu mwendo m’thu wu a ku hafuhi ni kufa. Hi nga gonda to tala ngu kuxolisisa ati Jesu a nga timaha mbimo yi a nga ti hamafuni. Ka gondo yiya hi na wona timhaka to tala ta lisima ati Jesu a nga timaha ni nzila ayi ti nga kuvhunako ngu yona.
1. Ngu wuhi mthumo awu i nga ti wa lisima ngutu ka Jesu?
Mthumo wu i nga ti wa lisima ngutu ka Jesu i ti ‘kutxhumayela Evhangeli ya Mfumo wa Txizimu.’ (Lera Luka 4:43.) Ene a txhumayete mahungu a manene a ti to Txizimu txi na veka Mfumo awu wu no lulamisa sikarato sa vathu. a Jesu a txhumayete mahungu yawa a si karali kudingana malembe mararu ni hafu.—Matewu 9:35.
2. Ngu kutxani Jesu a di mahile sidiwukiso?
Bhiblia yi txhamusela to tala mayelano ni “mithumo ya mtamo ni sidiwukiso ni sikombiso si Txizimu txi nga si maha ngu [Jesu].” (Mithumo 2:22) Ngu kuthumisa mtamo awu Txizimu txi nga mninga, Jesu a sikotile kulawula matxelo, kudyisa vathu vo tala, kuhanyisa valwati hambi kuwusa va kufa. (Matewu 8:23-27; 14:15-21; Marku 6:56; Luka 7:11-17) Sidiwukiso sa Jesu si vekile hakubasani ti to ene a rumilwe ngu Txizimu. Sona si tshumete si kombisa ti to Jehovha a ni mtamo wo lulamisa sotshe sikarato sathu.
3. Hi nga gonda txani ka ti Jesu a nga ti hanyisa tona?
Jesu a engisile Jehovha ka siemo sotshe. (Lera Johani 8:29.) Ene a thembekile ka Tate wakwe hambi a txi kanetwa, e maha totshe ati a nga rumwa kala kufani kwakwe. Jesu a kombisile ti to ta koteka ku m’thu e thumela Txizimu hambi a txi kanetwa. Ngu nzila yoneyo, Jesu a ‘hi siyete txikombiso, ti to hi na sikota kulondetela mkondo wakwe.’—1 Pedro 2:21.
ENGETELA WUZIVI WAKO
Wona nzila yi Jesu a nga txhumayela ngu yona mahungu a manene ni ku maha sidiwukiso.
4. Jesu a txhumayete mahungu a manene
Jesu a tsimbite mipfhuka yo lapha ngu minenge kasiku e txhumayela mahungu a manene ka vathu vo tala. Lera Luka 8:1, mi gwita mi bhula ngu siwotiso siya:
-
Ina Jesu a ti emela ti to vathu ve ta kwakwe?
-
Ngu tihi ati Jesu a nga ti maha kasiku e mana vathu?
Txizimu txi profetile ti to Mesiya a ndi na txhumayela mahungu a manene. Lera Isaya 61:1, 2, mi gwita mi bhula ngu siwotiso siya:
-
Jesu a wu hetisisile kutxani wuprofeti wuwa?
-
Ina u alakanya ti to ni nyamsi vathu va fanete kuengisa mahungu a manene?
5. Jesu a gondisile tigondo ta lisima
Jesu kha gwitela ko txhumayela mahungu a manene a Mfumo wa Txizimu dwe, ene a tshumete e gondisa ni tigondo timwani ati ti vhunako. Wona timwani ta kona ka Gondo ya Mmangoni ayi yi ziwako ngutu. Lera Matewu 6:14, 34 ni 7:12, mi gwita mi bhula ngu siwotiso siya:
-
Ngu sihi silayelo sa kwati asi Jesu a nga si ningela ka mavhersikulo yawa?
-
U alakanya ti to silayelo soneso si ngadi si txi vhuna ni nyamsi?
6. Jesu a mahile sidiwukiso
Jehovha a ningile mtamo Jesu wo maha sidiwukiso so tala. Ti to u wona tximwani txa sikombiso lera Marku 5:25-34 mwendo kuxalela VHIDHIYO. Mi gwita mi bhula ngu siwotiso asi si londiselako.
-
Ngu kuya ngu vhidhiyo, ngu tihi ati wa msikati awu a nga ti lwala a nga ti tsaniseka ngu tona?
-
Nji txani txi ku tsakisako ka sidiwukiso sa Jesu?
Lera Johani 5:36, mi gwita mi bhula ngu txiwotiso txiya:
-
Sidiwukiso sa Jesu si ningete “wufakazi” wa txani mwendo si ti womba txani ngu ngene?
Ina u ti ti ziva?
Wungi wa ti hi tizivako mayelano ni Jesu, ti bhatwe ka mune wa mabhuku a Bhiblia, i ku Matewu, Marku, Luka ni Johani aya ma dhanwako ku Tievhangeli. M’bhali mmwani ni mmwani wa mabhuku yawa, a bhate ni timwani ati vamwani va nga mbi bhala. Se ku txi tshanganiswa otshe mabhuku awa ti nga hi vhuna ku hi kota kuwona wutomi wa Jesu mbimo yi a nga ti hamafuni.
-
MATEWU
adiya dibhuku do khata ka Tievhangeli dona di hi vhuna kuwona tigondo ta Jesu ngutu-ngutu ati ti womba-wombako ngu Mfumo wa Txizimu.
-
MARKU
dibhuku do koma ka Tievhangeli. Dona di ni mawomba-wombelo a mtamo ni kuhiseka.
-
LUKA
dibhuku diya di kombisa nzila ayi Jesu a nga ti wona mkombelo i di wa lisima ngu yona, ni nzila yi a nga ti hanyisana ngu yona ni vavasikati.
-
JOHANI
adiya di kombisa mabhulo aya Jesu a nga va nawo ni vathu vamwani, eto ti hi vhuna kuwona tifanelo ta Jesu.
NGAKO VATHU VA TXI KHONA: “Jesu i ti kova m’thu wa mnene dwe i si nga Mwanana wa Txizimu.”
-
U nga khawe txani?
ATI HI NGA TI WONA
Jesu a txhumayete mayelano ni Mfumo wa Txizimu, e maha sidiwukiso e tshumela e engisa Jehovha ka totshe.
Ngu tihi ti u nga ti gonda
-
Ngu wuhi mthumo awu i nga ti wa lisima ka Jesu hamafuni?
-
Sidiwukiso sa Jesu si hi kholwisa to ene i mani?
-
Ngu tihi tigondo ta lisima ati Jesu a nga gondisa?
XOTA TIMWANI
Ngu tihi ati Jesu a nga ti dhunda kuwomba-womba ngutu ngu tona?
“Ngu kutxani Mfumo wa Txizimu i nga ti wa lisima ka Jesu?” (Muwoneleli wa 1 ka Outubro wa 2014)
Wona to nji txani txi hi kholwisako ti to Jesu a mahile sidiwukiso.
“U nga gonda txani ka sidiwukiso sa Jesu?” (Muwoneleli wa 15 ka Julho wa 2004)
Gonda ngu nzila yi dijaha do kari di nga txitxa ngu yona wutomi wa dona msana ko wona nzila yi Jesu a nga ti hanyisana ngu yona ni vathu.
“Ani ni txo tihanyela ni si pimisi ngu vamwani” (Muwoneleli wa 1 ka Outubro wa 2014)
Wona mithumo ya Jesu ayi yi nga xaxametwa ngu kuya ngu mbimo yi yi nga maheka ngu yona.
a Ka gondo 31-33 hi na ta gonda to tala mayelano ni Mfumo wa Txizimu.
