GONDO 17

Jesu m’thu wo zumbisa kutxani?

TXHAYA

Ngako hi txi gonda ngu ti Jesu a nga ti maha ni ku ti womba hamafuni, hi nga tumbula tifanelo takwe. Eto ti hi tshuketisa hafuhi kwakwe ni ka Tate wakwe Jehovha. Ngu tihi timwani ta tifanelo toneto? Hi nga mu etetelisa kutxani Jesu ka wutomi wathu?

1. Ngu yihi nzila ayi Jesu a fanako ngu yona ni tate wakwe Jehovha?

Jesu a hanyile timiliyoni ta malembe nzumani a di didhawani ka Tate wakwe wa lirando, ni ku a gondile to tala kwakwe. Ngu toneto Jesu a tekelete Jehovha ngu mithumo yakwe, ati a ti pimisako ni ti a tipfisako tona. (Lera Johani 5:19.) Ngu ditshuri Jesu a etetela tifanelo ta tate wakwe, ngu toneto a nga womba tiya: “Awule a ni wonako, a woni Tate.” (Johani 14:9) Mbimo yi hi yako hi txi gonda ngu tifanelo ta Jesu, hi naya hi mu ziva kwati Jehovha. Ngu txikombiso, nzila yi Jesu a nga ti khatalela ngu yona vathu yi kombisa ti Jehovha a khatalisako tona ngu ngawe.

2. Jesu a ti kombisisile kutxani ti to wa mranda Jehovha?

Jesu a wombile tiya: “Kasiku ditiko di txi tiziva ti to na mranda Tate, . . . ni mahisa ti ene Tate a nga ni leletisa tona.” (Johani 14:31) Mbimo yi a nga ti hamafuni, Jesu a kombisile ti to wa mranda Tate wakwe ngu ku mu engisa ka totshe ati a nga txi m’gela, hambiku mbimo yimwani ti nga txi karata kumaha toneto. I si nga eto dwe, Jesu a txi ti dhunda kugela vamwani ngu Tate wakwe Jehovha ni ku va vhuna ti to ve va vangana Vakwe.—Johani 14:23.

3. Jesu a ti kombisisile kutxani ti to wa va dhunda vathu?

Bhiblia yi womba ti to Jesu wa ‘mana kutsaka ngu vanana va vathu.’ (Mavingu 8:31) Jesu a kombisile ti to wa varanda vathu ngu ku va tsanisa ni ku ti karata ti to e va vhuna. Sidiwukiso asi Jesu a nga si maha kha si kombisi ti to a ni mtamo dwe, kambe si tshumela si komba ti to a ni wumbilu. (Marku 1:40-42) Ene a txi hanyisana kwati ni votshe ni ku a si khedhi m’thu. Mapswi akwe ma thavelete ni kuninga themba ka vathu va timbilu ta tinene. Jesu a ti ti emisete kuxaniseka ni kufela vathu ngu ku a va dhundako. Kambe ene a dhunda ngutu avale va engisako tigondo takwe.—Lera Johani 15:13, 14.

ENGETELA WUZIVI WAKO

Gonda to tala ngu tifanelo ta Jesu. Wona nzila yi u nga mu etetelako ngu yona ko kombisa lirando ni wuha.

4. Jesu wa mranda Tate wakwe

Txikombiso txa Jesu txi hi gondisa nzila yi hi nga kombisako ngu yona ti to ha txi randa Txizimu. Lera Luka 6:12 ni Johani 15:10; 17:26. Msana ko lera ndimana yimweyo ngu yimweyo bhulani ngu txiwotiso txiya:

Hi nga mu etetelisa kutxani Jesu ni kukombisa ti to ha mranda Jehovha?

Jesu a txi mdhunda ngutu Jehovha se mbimo yotshe a ti womba-womba nayo ngu mkombelo

5. Jesu wa khatala ngu vathu ava va lavako txivhuno

Jesu a txi khatala ngutu ngu vathu kupinda kukhatalela timhaka takwe. Jesu a thumisile mbimo yakwe ni mtamo wakwe kasi kuvhuna vathu hambi a di karate. Lera Marku 6:30-44, mi gwita mi bhula ngu siwotiso siya:

Jesu a ti kombisisile kutxani ti to wa khatala ngu vathu?—Wona vhersikulo 31, 34, 41 ni 42.
Ngu kutxani Jesu a nga ti lava kuvhuna vathu? —Wona vhersikulo 34.
Hi woni ti to Jesu a etetela tifanelo ta tate wakwe. Eto ti hi gondisa txani ngu Jehovha?
Kufana ni Jesu hi nga ti kombisa ngu nzila yihi ti to ha khatala ngu vathu?

6. Jesu a ni wuha

Hambiku a nga si nga ni silo sa singi, Jesu a ti abana ni vamwani asi a nga ti naso. Ene wa hi kuzeta kumaha ati ti fanako. Lera Mithumo 20:35, mi gwita mi bhula ngu txiwotiso txiya:

Ngu kuya ngu mapswi a Jesu, nji txani txi nga hi tiselako litsako?

Xalela VHIDHIYO, mi gwita mi bhula ngu txiwotiso atxi txi londiselako.

VHIDHIYO: Kuha ta tisa litsako la hombe—Txienge (4:00)

Ngu tihi tinzila timwani to kombisa wuha hambi hi si nga ni so tala?

Ina u ti ti ziva?

Bhiblia yi hi gondisa kumaha mkombelo ka Jehovha ngu kuthumisa ditina da Jesu. (Lera Johani 16:23, 24.) Ngako hi txi maha toneto, hi kombisa ti to ha ninga lisima ati Jesu a nga hi mahela kasiku hi va vangana va Jehovha.

NGAKO VATHU VA TXI KHONA: “Txizimu kha txi na mhaka ni kuxaniseka ka vathu.”