GONDO 19
Ina Tifakazi ta Jehovha Makristu a ditshuri?
Athu Tifakazi ta Jehovha ha kholwa to hi Makristu a ditshuri. Ngu kutxani? Ka gondo yiya hi na tumbula to tigondo tathu ti seketetwe hayi, ngu kutxani hi txi dhanwa to hi Tifakazi ta Jehovha, ni ku hi ti kombisisa kutxani to ha dhundana.
1. Tigondo tathu ti seketetwe hani?
Jesu a wombile tiya “Dipswi [da Txizimu] ngu dona ditshuri.” (Johani 17:17) Kufana ni Jesu, tigondo tathu ti seketetwe ka Dipswi da Txizimu. He wone ati ti nga maheka kukhukhela kona mu ka dilembe da 1870. Kukhukhela ka mbimo yoneyo, mtxawanyana wa vathu wu khatile kugonda Bhiblia ngu mthuthalo. Vona va txi lava kuziva ati Bhiblia yi ti gondisako. Mbimo yi va nga ti gonda mhaka yo kari ya mu ka Bhiblia ve yi pfisisa va txi kholwa ka yona, hambi ti txi hambana ni ti wukhongeli wu nga txi ti gondisa. Kukhukhela koneho va khatile kugondisa vamwani ditshuri. a
2. Ngu kutxani hi txi dhanwa ku hi Tifakazi ta Jehovha?
Jehovha a dhana vathu ava va mu khozelako ku Tifakazi takwe nguko va womba-womba ditshuri ngu ngene. (Vahebheru 11:4–12:1) Ngu txikombiso, ka mbimo ya kale Txizimu txi gete tiya vathu va txona: “Anu mi tifakazi tangu.” (Lera Isaya 43:10.) Jesu a dhanwa ku “i ku fakazi ya kuthembeka.” (Mtuletelo 1:5) Ngu toneto kukhukhela ngu dilembe da 1931 hi khatile kuthumisa ditina do hi Tifakazi ta Jehovha. Athu ha tiguleta ngu kudhanwa ngu ditina donedo.
3. Tifakazi ta Jehovha ti etetela lirando ali Jesu a nga li kombisa ngu nzila yihi?
Jesu a txi dhunda ngutu valondeteli vakwe aha koza e va teka kota vamwayani kwakwe. (Lera Marku 3:35.) Ngu ha kufanako Tifakazi ta Jehovha ti ni wumwewo hamafuni kotshe. Ngu toneto hi dhanana ku hi vanathu. (Filimoni 1, 2) Athu hi londisela mkongomiso wuwa: “Randani kuhanyelana”, mwendo ku randani votshe vanathu. (1 Pedro 2:17) Ha kombisa lirando lonelo ngu tinzila to hambana-hambana, ngutu-ngutu ngako vanathu va txi lava txivhuno.
ENGETELA WUZIVI WAKO
Gonda to tala mayelano ni matimu a Tifakazi ta Jehovha ni kuwona sikombiso simwani asi si kombisako ti to tona Makristu a ditshuri.
Makristu a ditshuri ma seketela tigondo ta ona amu ka Bhiblia me tshumela me gela vamwani ati ma ti gondako
4. Tigondo tathu ti seketetwe amu ka Bhiblia
Jehovha a wombile ti to kupfisisa kwathu Bhiblia ku ndi naya masoni ku txi anda. Lera Dhaniyeli 12:4, mi gwita mi bhula ngu txiwotiso txiya:
-
Nji txani txi ndi no “engeteleka” ka vathu va Txizimu ngako va txi simama ve xolisisa mwendo kugonda Bhiblia?
Wona nzila ayi wamwamna wo kari awu a nga ti dhanwa ku i Charles Russell a nga ti gonda ngu yona Dipswi da Txizimu. Xalela VHIDHIYO, mi gwita mi bhula ngu txiwotiso atxi txi londiselako.
-
Ngu kuya ngu vhidhiyo, Charles Russell ni vamwani va ti gondisa kutxani Bhiblia?
Ina u ti ti ziva?
Mbimo yimwani ta thuka ti laveka ti to hi lulamisa mapfisiselo athu a Bhiblia. Ngu kutxani? Nguko Txizimu kudotho-kudotho txaya txi txi junyatisa ati ti ku ka Dipswi da txona. Kufana ni kuhuma ka ditambo kuyako kuwoninga kudotho-kudotho. Di txiya ditxa hi kota kuwona mtumbuluko. (Lera Mavingu 4:18.) Ditshuri ti to Bhiblia kha yi txitxi, kambe mbimo yi hi yako hi ti pfisisa kwati ati yi ti wombako ha txitxa mapfisiselo athu.
5. Athu hi hanya ngu kutumelelana ni ti ditina do Tifakazi ta Jehovha di txhamuselako tona
Ngu kutxani hi txi dhanwa ku hi Tifakazi ta Jehovha? Xalela VHIDHIYO, mi gwita mi bhula ngu txiwotiso atxi txi londiselako.
-
Ngu kutxani ditina do Tifakazi ta Jehovha di txi fanela?
Ngu kutxani Jehovha a di sawute vathu ti to ve va tifakazi takwe? Nguko tifakazi toneto ti ndi na kaneta makuhu aya vathu va ma wombako mayelano ni Jehovha. Ka makuhu oneyo, he wone mambidi a kona.
Titxhetxhe timwani ti womba ti to Txizimu txi lava ti to vathu ve thumisa sithombe va txi txi khozela. Ina toneto ditshuri? Lera Levhi 26:1, mi gwita mi bhula ngu siwotiso siya:
-
Ina Txizimu txi lava hi thumisa sithombe hi txi txi khozela? Jehovha a ti khene txani ngu sithombe?
Titxhetxhe timwani ti gondisa ti to Jesu Txizimu. Ina toneto ditshuri? Lera Johani 20:17, mi gwita mi bhula ngu siwotiso siya:
-
Ina Jesu ni Txizimu m’thu mmweyo?
-
U ti pfisa kutxani ngu kuva Txizimu txi di sawute vathu ti to ve gela vamwani mayelano ni txona kumweko ni mwanana wa txona?
6. Athu ha dhundana
Bhiblia yi fananisa Makristu ni siro so hambanelana sa mmidi wa m’thu. Lera 1 Vakorinto 12:25, 26, mi gwita mi bhula ngu siwotiso siya:
-
Mkristu wa ditshuri a maha txani ngako Makristu mamwani ma txi xaniseka?
-
U pfisisa txani ngu lirando ali li ku ni Tifakazi ta Jehovha?
Ngako Tifakazi ta Jehovha ta matiko mamwani ti txi lava txivhuno, vanathu va hamafuni kotshe va ti vhuna ngu txikuluveta. Ti to u wona txikombiso tximwetxo txa toneto, xalela VHIDHIYO. Mi gwita mi bhula ngu txiwotiso atxi txi londiselako.
-
Tifakazi ta Jehovha, ti li kombisisa kutxani lirando ngako ku txi humelela phango ka ditiko do kari?
Makristu a ditshuri ma kombisa lirando ka vale va ku ka sikarato
NGAKO VATHU VA TXI KHONA: “Tifakazi ta Jehovha yimweyo ya titxhetxhe ta tiphya to ngadi kutumbuluka.”
-
U nga khawe Jehovha a khatile mbimo muni kudhana vathu vakwe to ndifakazi?
ATI HI NGA TI WONA
Tifakazi ta Jehovha Makristu a ditshuri. Athu hi mwaya wa hamafuni kotshe wa malanda a Txizimu. Hi seketela tigondo tathu ka Bhiblia, ni kutshumela hi gondisa vamwani ditshuri mayelano ni Jehovha.
Ngu tihi ti u nga ti gonda
-
Ngu kutxani hi txi dhanwa ngu ditina adi di ku Tifakazi ta Jehovha?
-
Hi ti kombisa ku nzila yihi ti to ha dhundana?
-
U pimisa ti to Tifakazi ta Jehovha Makristu a ditshuri?
XOTA TIMWANI
Gonda to tala mayelano ni matimu athu.
Tifakazi ta Jehovha —Ti kombisa likholo, Txienge 1: Kuhuma mtemani (1:00:53)
Wona nzila yi Tifakazi ta Jehovha ti nga mbi thava ngu yona kuveka hakubasani tigondo ta makuhu.
Wona simwani sa siwotiso asi vathu va si mahako mayelano ni Tifakazi ta Jehovha.
“Siwotiso asi si tolovelako kumahwa mayelano ni Tifakazi ta Jehovha” (Msungo mhaka wu ku ka site)
Stephen a sengete ka mazunga o wukela vathu va tixaka timwani. Wona atxi txi nga m’vhuna ku e txitxa mawonelo akwe msana ka kuva a di zivile Tifakazi ta Jehovha.
“Wutomi wangu wu txo ya wu onheka” (Muwoneleli wa 1 ka Julho wa 2015)
a Kukhukhela ngu 1879, Tifakazi ta Jehovha ta humisa direvhista da Muwoneleli adi di txhamuselako tigondo ta Bhiblia.
