Jehovha hi nga Txizimu txa vhilinganya. (1 Vakorinto 14:33) Ta pfisiseka to vathu vakwe ni vona va si vi ni vhilinganya. Se di zumbisile kutxani dibanza da Wukristu? Hi nga di seketelisa kutxani?

1. I mani mthangeli wa dibanza?

Kristu i “msungo wa dibanza.” (Vaefesu 5:23) Ene a di nzumani a wonelela mthumo wa vathu va Jehovha ha mafuni kotshe. Ene a sawute “txithumi txo thembeka na txi di ni wutxhari” i ku mtxawanyana wa wudotho wa madhota awu wu dhanwako ku Mmidi wu wu Fumako. (Lera Matewu 24:45-47.) Ka mbimo ya Makristu o khata vapostoli ni madhota kheya Jerusalema ma ti ningela mkongomiso ka mabanza a mbimo yileya. Ngu ha kufanako, nyamsi Mmidi wu wu Fumako wa ningela mkongomiso ka mabanza a hamafuni kotshe. (Mithumo 15:2) Kambe madhota oneyo hi nga vathangeli va sengeletano. Ona ma gonda Bhiblia kasi ku me ziva ati Jehovha a ti lavako ti to me ti maha ni ku ma londeta mkongomiso wa Jesu.

2. Ngu wuhi mthumo wa madhota?

Madhota, Makristu aya ma nga vitwa aya ma gondisako vathu va Txizimu ngu kuthumisa Bhiblia. Ona ma ti emisete kuvhuna ni kukuzeta ava va thumelako Jehovha. Madotho kha ma holelwi. Hahanze keto, ona ma maha mthumo wa ona “ngu kuranda ka mbilu, i singa ngu moya wa nzambwa ya kulava dibhindu.” (1 Pedro 5:1, 2) Madhota ma thumisana ni malanda a wuthumeli, i ku vavamna ava va vhunetako madhota dibanzani. Ngako malanda a wuthumeli ma txi hokelela tifanelo ati ti wombwako amu ka Bhiblia, ma nga sawulwa kuthuma kota madhota.

Mmidi wu wu Fumako wa sawula madhota o kari ti to me thuma kota vawoneleli va sigava. Vona va pfuxela mabanza ve ningela mkongomiso ni kutiyisa vanathu. Vawoneleli va sigava va sawula vanathu ava va nga hokelela tifanelo ati ti wombwako amu ka Bhiblia ti to veva madhota mwendo malanda a wuthumeli.—1 Timoti 3:1-10, 12; Titosi 1:5-9.

3. Ngu wuhi wutixamuleli wa Fakazi yimwani ni yimwani ya Jehovha?

Votshe dibanzani va “dhumisa ditina da [Jehovha]” ngu kuembelela, kuxamula, kuveka miwombawombo ni mikombiso va di mitshanganoni ve tshumela ve txhumayela mahungu a manene ngu kuya ngu siemo sawe.—Lera Masalmo 148:12, 13.

 ENGETELA WUZIVI WAKO

4. Jesu mthangeli wo dikha

Jesu ngu lirando wa hi ramba. Lera Matewu 11:28-30, mi gwita mi bhula ngu siwotiso siya:

• Jesu mthangeli wo zumbisa kutxani? Ene a lava ti to hi ti pfisa kutxani?

5. Madhota ma gondisa ngu txikombiso txa ona txa txinene

1. Madhota ma xayisa wuxaka wa ona ni Jehovha ni kuvhuna timwaya ta ona ti maha ati ti fanako

2. Madhota ma khatalela votshe dibanzani

3.   Madhota ma txhumayela yotshe mbimo

4. Madhota ma gondisa Dipswi da Txizimu. Ona ma tshumela me vhuneta kubasisa Nyumba ya Mfumo ni kumaha mithumo yimwani

6. Hi nga thumisana ni madhota

Bhiblia yi kombisa txivangelo txa lisima txo hi thumisana ni madhota. Lera Vahebheru 13:17, mi gwita mi bhula ngu siwotiso siya:

• Ina ta pfisiseka kuva Bhiblia yi txi hi kuzeta ku hi tiveka hahatshi ka madhota? Ngu kutxani?

Lera Luka 16:10, mi gwita mi bhula ngu txiwotiso txiya:

• Ngu kutxani i di ta lisima kuengisa madhota hambi i di ka timhaka ati i ku ta tidotho?

 ATI HI NGA TI WONA

Jesu i msungo wa dibanza. Madhota ma londisa mkongomiso wakwe. Ha tsaka ngu kuvhuneta madhota nguko ona ngo thutha ni ku ma hi gondisa ngu txikombiso txa ona txa txinene.

Ngu tihi ti u nga ti gonda

• I mani mthangeli wa dibanza?

• Ngu wuhi mthumo wa madhota?

• Ngu wuhi wutixamuleli wa Fakazi ya Jehovha yimwani ni yimwani?