Jesu a wombile to Makristu tilava me bhabhatiswa. (Lera Matewu 28:19, 20.) Kambe i txani bhabhatiso? Ni ku ngu tihi ti m’thu a fanelako ku ti maha kasi ku e bhabhatiswa?

1. I txani bhabhatiso?

Dipswi adi di ku “kubhabhatiswa” di ta ngu ka dipswi da Txigriki adi di wombako “kunyupeliswa” matini. Ngu toneto ti nga maheka mbimo yi Jesu a nga bhabhatiswa ka mnambo wa Jordhani. Wotshe mmidi wakwe, wu bete matini. Eto hi tiziva nguko, msana kova a di bhabhatisilwe ene a to “huma ngu matini.” (Marku 1:9, 10) Kufana ni Jesu, otshe Makristu a ditshuri, mbimo yi ma bhabhatiswako, mmidi wa ona wa nyupeliswa matini.

2. M’thu a txi bhabhatiswa a kombisa txani?

Mbimo yi m’thu a bhabhatiswako a kombisa to se a ti ningetete ka Jehovha. M’thu a tiningetelisa kutxani ka Jehovha? Na m’thu a si se bhabhatiswa, a khata ngu kumaha mkombelo e gela Jehovha to a lava ku mthumela ngu ha ku si gwitiko. Ene a thembisa to a na thumela Jehovha dwe, ni kuthangetisa kudhunda ka Jehovha wutomini kwakwe. Wa sunga ku ‘ti leka apune e . . . londisa’ tigondo ni txikombiso txa Jesu. (Matewu 16:24) Kutiningetela ni kubhabhatiswa ka m’thu, ku mmaha eva ni wuxaka wo tsana ni Jehovha ni va va mkhozelako.

3. Kasi ku m’thu e bhabhatiswa, ti lava e maha txani?

Na u si se bhabhatiswa, nda lisima kugonda ngu Jehovha ni kuva ni likholo kwakwe. (Lera Vahebheru 11:6.) Mbimo yi u yako u va ni wuzivi ni likholo, lirando lako ngu Jehovha li na ya li kula. Tsaniseka ti to eto ti na kumaha u lava kutxhumayela ni kuhanya ngu milayo yakwe. (2 Timoti 4:2; 1 Johani 5:3) Ngako m’thu a txi sawula ku “tsimbila ngu tifanelo ti ti lavekako masoni ka Mkoma,” a nga sunga kuningetela wutomi wakwe ni kubhabhatiswa.—Vakolosa 1:9, 10. a

 ENGETELA WUZIVI WAKO

4. Hi nga gonda to tala ka bhabhatiso ya Jesu

Lera Matewu 3:13-17 kasi ku u gonda to engeteleka ngu bhabhatiso ya Jesu. Gwitani mi bhula ngu siwotiso siya:

• Ina Jesu a bhabhatisilwe i ti ngadi mwanana?

• A bhabhatisisilwe kutxani? Ina a to thelwa mati a madotho ha msungo?

Msana ko bhabhatiswa, Jesu a khatile kumaha mthumo wo sawuleka awu Tate wakwe a nga ti mningile. Lera Luka 3:21-23 ni Johani 6:38, mi gwita mi bhula ngu txiwotiso txiya:

• Msana kova Jesu a di bhabhatisilwe, ngu wuhi mthumo wu i nga ti wa lisima ka wutomi wakwe?

5. U nga sikota kuhokelela makungo o u bhabhatiswa

Kutiningetela ni kubhabhatiswa, ti nga woneka nga mthumo wa hombe ngutu. Kambe mbimo yi u yako u gonda ngu Jehovha ni kuhanya ngu ti u ti gondako, u na tipfa u di tsani kasi kumaha txisungo txiya txa lisima. Kasi kuwona vathu ava va nga maha toneto, xalela VHIDHIYO.

Lera Johani 17:3 ni Jakobe 1:5, mi gwita mi bhula ngu txiwotiso txiya:

• Nji txani txi nga vhunako m’thu ti to e ti lulamisela kubhabhatiswa?

1. Athu hi tiningetela ka Jehovha ngu kumaha mkombelo hi m’gela ti to hi lava ku mthumela wutomi wathu wotshe

2. Mbimo yi hi bhabhatiswako hi kombisa ka vamwani ti to hi ningetete wutomi wathu ka Txizimu

 6. Ngako hi txi bhabhatiswa hi maha txienge txa mwaya wa Jehovha

Mbimo yi hi bhabhatiswako hi maha txienge txa mwaya wumwewo wa hamafuni kotshe. Ti singa ni mhaka ni ditiko, m’dhawuko wathu, athu hi kholwa ka tigondo to fana ni kuengisa milayo yo fana yi tako ngu ka Txizimu. Lera Masalmo 25:14; 1 Pedro 2:17, mi gwita mi bhula ngu txiwotiso txiya:

• Msana ka kuva m’thu a di bhabhatisilwe, ngu wuhi wuxaka wu a khatako kuva nawo ni Jehovha kumweko ni va va mkhozelako?

 ATI HI NGA TI WONA

Jesu a gondisile ti to Makristu ma fanete ku me bhabhatiswa. Ti to m’thu e bhabhatiswa, a fanete kuva ni likholo lo tsana ngu Jehovha, e hanya ngu milayo Yakwe ni kutiningetela ka Jehovha.

Ngu tihi ti u nga ti gonda

• I txani bhabhatiso? Ngu kutxani i di ya lisima?

• Ngu kuhi kuyelana ku kuho ka kutiningetela ni kubhabhatiswa?

• Ngu tihi ti m’thu a fanelako ku ti maha na a si se tiningetela ni kubhabhatiswa?