GONDO 24
I txani tingelozi, ni ku ngu wuhi mthumo wa tona?
Jehovha a lava ti to hi gonda ngu mwaya wakwe wa nzumani. Mwaya wonewo tingelozi, ati ti dhanwako ku i “vanana va Txizimu.” (Jobe 38:7) Ngu tihi ti Bhiblia yi ti wombako ngu tingelozi? Ni ku tona ti maha txani? Ina totshe tingelozi ti maha txienge txa mwaya wa Txizimu?
1. I txani tingelozi?
Jehovha a khatile ngu kumaha tingelozi a si se maha mafu. Tona i moya kufana ni Txizimu ni ku ti zumba nzumani. (Vahebheru 1:14) Ku ni timiliyoni ta tingelozi nzumani, ni ku yimwani ni yimwani yi ni mazumbelo a yona. (Mtuletelo 5:11) Tingelozi ta ‘londeta sileleto sa [Jehovha] ni ku mu engisa.’ (Masalmo 103:20) Kale Jehovha a ti thumisa tingelozi kasi kuningela didungula, kuvhuna vathu vakwe ni ku va hulukisa ngako va di ka phango. Nyamsi tingelozi ti vhuna Makristu ti to me mana vathu va va lavako kugonda ngu Txizimu.
2. I mani Sathani ni madhimoni akwe?
Tingelozi timwani kha ta thembeka ka Jehovha. Ngelozi yo khata kuwukela Jehovha ngu “yile yi dhanwako ku i Dhiyabhulosi mwendo Sathani, mxengeteli wa dotshe ditiko.” (Mtuletelo 12:9) Sathani a lavile kufuma ngu toneto a xengile Adhamu ni Evha ni tingelozi timwani kasiku ve patana nayo ve wukela Jehovha. Tingelozi toneto ti dhanwa ku madhimoni. Jehovha a hingile tingelozi toneto nzumani, tona ti maneka hamafuni ni ku i singa kale tona ti na loviswa.—Lera Mtuletelo 12:9, 12.
3. Sathani ni madhimoni akwe va duketa ku hi kanganyisa ngu nzila muni?
Sathani ni madhimoni akwe va kanganyisa vathu vavangi ngu kuthumisa wuñanga. Wuñanga ngu duketa kuwomba-womba ni madhimoni. Kambe eto ti bihile. Ngu txikombiso, vamwani va wotisa ka vazivi va tinyeleti, ka vanyatixolo, ka vahuti, ni ka tiñanga. Vamwani va lava kuthumwa malwati ngu wuñanga. Ni ku Sathani a maha vathu ve kholwa ti to va nga si kota kuwomba-womba ni vafi. Kambe Jehovha a womba tiya: “Mi nga yeni ka vanyamsoro, hambi ka vanyatixolo.” (Levhi 19:31) Ene a hi txharihisa ngu nzila yiya kasi ku hi vhikela ka marindi a Sathani ni madhimoni akwe. Vona mbalala va Txizimu ni ku va lava ku hi limaza.
ENGETELA WUZIVI WAKO
Gonda ngu timhaka ta tinene ati ti mahwako ngu tingelozi. Wona phango ayi yi nga hi welako ngako hi txo thuka hi thumisa wuñanga ni nzila ayi hi nga ti vhikelako ngu yona ka Sathani ni madhimoni.
4. Tingelozi ta vhuna vathu ku ve gonda ngu Jehovha
Tingelozi kha ti txhumayeli vathu ngu kukongoma. Hahanze keto tona ti vhuna malanda a Jehovha ku me mana vathu ava va lavako kugonda ngu ngene. Lera Mtuletelo 14:6, 7, mi gwita mi bhula ngu siwotiso siya:
-
Ngu kutxani hi txi lava txivhuno txa tingelozi kasi ku hi txhumayela?
-
Ina kha ti kutsanisi kuziva ti to tingelozi ti nga kuvhuna ku u mana vathu ava va tsakelako kugonda Bhiblia? Ngu kutxani ti txi kutsanisa?
5. Vayilela sotshe asi si tsimbitisanako ni wuñanga
Sathani ni madhimoni akwe mbalala va Jehovha. Nathu hi va wona kota valala. Lera Luka 9:38-42, mi gwita mi bhula ngu txiwotiso txiya:
-
Madhimoni ma maha txani ngu vathu?
Kha hi lavi kutumelela to madhimoni me belela ka wutomi wathu. Lera Dhewuteronome 18:10-12, mi gwita mi bhula ngu siwotiso siya:
-
Ngu tihi tinzila ati madhimoni ma ti thumisako kasi kuwomba-womba ni vathu mwendo ku va kuzetela? Ngu sihi sihena asi si yelanako ni wuñanga asi si nga toloveleka amu u zumbako kona?
-
Ina ta pfala kuva Jehovha a txi tsimbisa wuñanga? Ngu kutxani?
Xalela VHIDHIYO, mi gwita mi bhula ngu siwotiso asi si londiselako.
-
Ngu ha hi nga ti wona ngu kona aha ka vhidhio, u pimisa ti to ti ti ni phango kuva Ana a di vekile disinda diwokoni ka mwanana wakwe? Ngu kutxani?
-
Nji txani atxi Ana a nga ti fanete ku txi maha kasi ku e tivhikela ka madhimoni?
Kukhukhela kale Makristu a ditshuri kha ma pfani ni madhimoni. Lera Mithumo 19:19 ni 1 Vakorinto 10:21, mi gwita ni bhula ngu txiwotiso txiya:
-
Ngu kutxani i di ta lisima kuhisa sotshe asi si yelanako ni wuñanga?
6. Xula yimbi yo lwisana ni Sathani ni madhimoni akwe
Madhimoni ma fumwa ngu Sathani. Kambe tingelozi to thembeka ti fumwa ngu ngelozi ya hombe ka totshe, i ku Migeli. Adiya ditina dimwani da Jesu. Lera Mtuletelo 12:7-9, mi gwita mi bhula ngu siwotiso siya:
-
I mani a ku ni mtamo ngutu, ka Sathani adi ni madhimoni akwe ni Migeli adi ni tingelozi takwe?
-
Ina valondeteli va Jesu ti lava ve thava Sathani ni madhimoni akwe?
Awe u nga xula yimbi yo lwisana ni Sathani ni madhimoni akwe. Lera Jakobe 4:7, mi gwita mi bhula ngu txiwotiso txiya:
-
U nga ti vhikelisa kutxani ka Sathani ni madhimoni akwe?
NGAKO VATHU VA TXI KHONA: “Kha ta biha kujoga mavhidhiyogemi mwendo kuxalela mafilmi aya ma tsimbitisanako ni wuñanga. Ngu tihungata dwe.”
-
Ngu kutxani ti di ni phango kupimisa ngu nzila eyo?
ATI HI NGA TI WONA
Tingelozi to thembeka ta hi vhuna. Sathani ni madhimoni akwe mbalala va Jehovha ni ku vona va thumisa wuñanga ti to ve kanganyisa vathu.
Ngu tihi ti u nga ti gonda
-
Tingelozi ti va vhunisa kutxani vathu ti to ve gonda ngu Jehovha?
-
I mani Sathani ni madhimoni akwe?
-
Ngu kutxani awe u di fanete kuvayilela wuñanga?
XOTA TIMWANI
Wona sikombiso sa ti to Jesu ngene Migeli.
“I mani ngelozi ya hombe Migeli?” (Msungo mhaka wu ku ka site)
Wona wufakazi wa ti to Sathani m’thu ngu ditshuri, kambe hi nga wubihi wu ku mbiluni ka m’thu.
“Ina Dhiyabhulosi waho ngu ditshuri?” (Msungo mhaka wu ku ka site)
Wona nzila yi wamsikati wo kari a nga tikhulula ngu yona ka madhimoni.
“Ene a tumbute to wutomi wu ni txikongomelo” (Muwoneleli, wa 1 ka Julho wa 1993)
Wona nzila yi Sathani a thumisako ngu yona wuñanga kasi ku kanganyisa vathu.
