Ngako ku txi humelela phango, vathu vo tala va tiwotisa tiya: “Ngu kutxani atiya ti txi maheka?” Ta tsakisa kuziva to hi nga mana xamulo ya txiwotiso txiya amu ka Bhiblia!

1. Wu khatisile kutxani wubihi hamafuni?

Sathani Dhiyabhulosi a wukete Jehovha. Ene a txi lava kufuma vamwani, ngu toneto ene a kuzetete mpatwa wo khata, Adhamu ni Evha ti to ve patana nayo ko wukela Jehovha. A ti mahisile kutxani toneto? Sathani a gete makuhu Evha. (Genesisi 3:1-5) Ene a mahile Evha e pimisa ti to tiho ta tinene ati Jehovha a msiselako. Sathani a mahile ti to vathu ve pimisa ti to va nga mana litsako hambi va si engisi Txizimu. Sathani a gete Evha makuhu o khata ka otshe, a txi kha na mbi fa. Ngu toneto Bhiblia yi dhanako Sathani to “m’hembi ni tate wa makuhu.”—Johani 8:44.

2. Adhamu ni Evha va sungile kumaha txani?

Jehovha a kombisile wuha ka Adhamu ni Evha. Ene a ti va gete ti to va nga dya yotshe mihando ya jaradhi ka Edheni, hahanze ka m’hando wawumwewo dwe. (Genesisi 2:15-17) Kambe vona va sawute kudya wona wule va nga ti tsimbisilwe. Evha “a to hapha muhando wa mndonga, e dya.” Ngu msana Adhamu “nene a to dya.” (Genesisi 3:6) Aku Adhamu ni Evha va nga ti hetisekile ti si va karateli kumaha ati i ku ta tinene. Kambe vona va sawute kwa mbi engisa Jehovha. Ngu toneto va onhile ni ku tshuralela wukoma wa Txizimu. Txisungo txawe txi va tisete sikarato sa hombe.—Genesisi 3:16-19.

3. Txisungo txa Adhamu ni Evha txi hi gwesa ngu nzila yihi?

Mbimo yi Adhamu ni Evha va nga onha, va vile vo mbi hetiseka, ni ku va tshapelisile kwa mbi hetiseka ka votshe vanana vawe. Bhiblia yi womba tiya mayelano ni Adhamu: ‘Txionho txi wulete ha ditikoni ngu mhaka ya m’thu wa mmweyo, ngu msana ku txi wulela lifo, ngu toneto lifo nilona li wulelete votshe vathu.’—Varoma 5:12.

Ngu kutxani hi txi xaniseka? Mbimo yimwani hi xaniseka ngu mhaka ya sisungo so biha asi hi si mahako. I si nga eto dwe, ha xaniseka kambe ngu mhaka ya sisungo so biha asi vathu vamwani va si mahako. Ha xaniseka kambe ngu kuva hi di ka wukhalo awu i si ngako wa wunene ngu mbimo yi i si ngako ya yinene.—Lera Ekleziyaste 9:11.

 ENGETELA WUZIVI WAKO

4. I mani awu a vangako kuxaniseka?

Vathu vo tala va pimisa ti to Txizimu ngu txona txi fumako mafu awa. Ina ditshuri toneto? Xalela VHIDHIYO.

Lera Jakobe 1:13 ni 1 Johani 5:19, mi gwita mi bhula ngu txiwotiso txiya:

• Ina hi fanete kusola Txizimu ngu wubihi ni kuxaniseka aku hi ku wonako nyamsi?

5. Wona wuyelo ya kufuma ka Sathani

1. Adhamu ni Evha va ti hetisekile ni ku va ti hanya Paradhise kambe va engisile Sathani ve wukela Jehovha

2.   Neti ku nga wukelwa Wukoma wa Jehovha, txionho, kuxaniseka ni lifo si wulete hamafuni

3. Jehovha a na fuvisa txionho, kuxaniseka ni lifo. Se vathu va na tshumela ve hanya ka Paradhise va di hetisekile

6. Jehovha wa khatala ngu ngathu

Ina Txizimu txa khatala ngu ngathu ngako hi txi xaniseka? Wona ati Mkoma Dhavhidha ni mpostoli Pedro va nga bhala. Lera Masalmo 31:7 ni 1 Pedro 5:7, mi gwita mi bhula ngu txiwotiso txiya:

• U tipfisa kutxani kuziva ti to Jehovha wa ti wona ni ku wa khatala ngako hi txi xaniseka?

 ATI HI NGA TI WONA

Sathani, Adhamu ni Evha ngu vona va ku ni mnando wa kotshe kuxaniseka aku ku ku hamafuni. Jehovha wa khatala ngutu ngu ngathu, ngu toneto i singa kale a na gumisa kotshe kuxaniseka.

Ngu tihi ti u nga ti gonda

• Ngu yahi makuhu aya Sathani Dhiyabhulosi a nga gela Evha?

• Ngu yihi wuyelo yo biha hi yi manako ngu konaha ka txisungo txa Adhamu ni Evha?

• Hi tizivisa kutxani ti to Jehovha wa khatala ngu ngathu ngako hi txi xaniseka?