GONDO 37
Bhiblia yi womba txani ngu mthumo ni male
Ina u ta nga karateka ngu mhaka ya mthumo mwendo male? Mbimo yimwani ti ngava txikarato kumana so hanya ngu sona ni kumana mbimo yo khozela Jehovha. Kambe Bhiblia yi hi ninga sialakanyiso asi si hi vhunako.
1. Ngu tihi ti Bhiblia yi ti wombako mayelano ni mthumo?
Txizimu txi lava to hi tsaka ngu mithumo yi hi yi mahako. Bhiblia yi womba ti to ‘ndinene ku m’thu . . . e dya, e sela, e tsakisa mbilu yakwe, ngu mthumo wakwe.’ (Ekleziyaste 2:24) Jehovha wa thuma ngutu. Nathu ti lava hi tekelela Jehovha ngu kuva vathumi vavanene, hi txi maha toneto hi na tsakisa Jehovha ni ku nathu hi na tsaka.
Kuthuma nda lisima ngutu. Kambe kha ti lavi hi teka mthumo i di wa lisima ngutu kupinda kukhozela Jehovha. (Johani 6:27) Jehovha a hi thembisa to ngako hi txi thangetisa kudhunda kwakwe ka wutomi wathu, kha hi na mbi pwata so ti hanyisa.
2. Ngu yahi mawonelo a manene ngu male?
Bhiblia ya tumela ti to ‘male mtsudi’ kambe yi tshumela yi womba ti to male hi nga yona yi nga hi tiselako litsako. (Ekleziyaste 7:12) Bhiblia yi hi kuzeta ti to hi si dhundi ngutu male kambe “hi tsaka ngu si hi ku naso.” (Lera Vahebheru 13:5.) Ngako hi txi eneliseka ngu si hi ku naso hi na mbi karateka, ni ku hi na vayilela kumaha sikweneti. (Mavingu 22:7) Eto ti na hi vhuna ku hi vayilela m’lawu wa kutha bhatota ni kulava kuganya ngu txikuluveta.
3. Hi nga yi thumisisa kutxani male ti to hi vhuna vamwani?
Jehovha Njizimu txa wuha, se athu hi nga mu etetela ngu ‘kuva ni wuha, hi ziva kuabana ni vamwani.’ (1 Timoti 6:18) Hi nga maha toneto ngu kumaha miningelo dibanzani ni kuvhuna ava va ku ni txilaveko ngutu-ngutu vanathu. Jehovha kha wonisisi mtengo wa si hi ningelako, kambe a wonisisa ati ti hi mahako hi ningela. Ngako hi txi ningela ti txi huma mbiluni, hi nava ni litsako ni kutshumela hi tsakisa Jehovha.—Lera Mithumo 20:35.
ENGETELA WUZIVI WAKO
Wona nzila yi hi nga wuyelwako ngu yona ngu kuva ni mawonelo a manene ngu mthumo ni kueneliseka ngu si hi ku naso.
4. Thuma ngu nzila ayi yi yisako wudhumo ka Jehovha
Wuxaka wathu ni Jehovha wu fanete wu gwesa mawonelo athu mayelano ni mthumo. Xalela VHIDHIYO, mi gwita mi bhula ngu siwotiso asi si londiselako.
-
Ngu kuya ngu vhidhiyo, ngu tihi ati ti nga ku tsakisa ka nzila yi Jason a nga angula ngu yona adi mthumoni?
-
Nji txani txi nga m’vhuna ku eva ni mawonelo a manene ngu mthumo?
Lera Vakolosa 3:23, 24, mi gwita mi bhula ngu txiwotiso txiya:
-
Ngu kutxani kuva vathumi vavanene i di ta lisima?
Mthumo mbwa lisima. Kambe kha ha fanela ku wu tumelela ku wu va wa lisima nguto kupinda wuxaka wathu ni Jehovha
5. Kueneliseka ngu si hi ku naso ti nga hi tisela litsako
Vathu vo tala va lava kuva ni male ya yingi. Kambe Bhiblia kha yi hi kuzeti kumaha toneto. Lera 1 Timoti 6:6-8, mi gwita mi bhula ngu txiwotiso txiya:
-
Ngu tihi ati Bhiblia yi hi kuzetako ku ti maha?
Phela hi nga sikota kuva ni litsako hambi hi di ni male ya yidotho. Xalela VHIDHIYO, mi gwita mi bhula ngu txiwotiso atxi txi londiselako.
-
Timwaya tiya ti txi li manisa kutxani litsako hambi ku ti nga ti ni male ya yidotho?
Ngu txihi txikarato hi nga vako natxo ngako hi di ni so tala kambe hi simama hi lava so engeteleka? Jesu a womba-wombile ngu mlawu wonewo ngu kuthumisa txidinganiso. Lera Luka 12:15-21, mi gwita mi bhula ngu txiwotiso txiya:
-
U gondile txani ka txidinganiso txa Jesu? —Wona vhersikulo 15.
Lera ni ku yelanisa Mavingu 10:22 ni 1 Timoti 6:10. Mi gwita mi bhula ngu siwotiso siya:
-
Ngu tihi ti i ku ta lisima kwako? Kuva mngana wa Jehovha mwendo kuva ni male yo tala? Ngu kutxani?
-
Ngu sihi sikarato si hi nga vako naso ngaku hi txi tikaratela kuva ni male yo tala?
6. Jehovha a na khatalela silaveko sathu
Kukarateka ngutu ngu male ni mthumo ti nga duka likholo lathu ka Jehovha. Xalela VHIDHIYO ti to u wona ati hi nga ti mahako ngaku hi di ni ku karateka koneko, mi gwita mi bhula ngu siwotiso asi si londiselako.
-
Ngu kuya ngu vhidhiyo, ngu sihi sikarato asi mwanathu a nga manana naso?
-
Ene a mahile txani ti to e wonisana naso?
Lera Matewu 6: 25-34, mi gwita mi bhula ngu txiwotiso txiya:
-
Ngu tihi ati Bhiblia yi thembisako ka vale va thangetisako Jehovha ka wutomi wawe?
NGAKO VATHU VA TXI KHONA: “Phela ti lava ni thuma kasi kukhatalela mwaya wangu. Ni nge si koti kuya mitshanganoni divhiki ni divhiki.”
-
Ngu wuhi m’bhalo awu wu ku tsanisekisako ti to kuthangetisa kuthumela Jehovha ngu tona i ku txisungo txa txinene ka sotshe?
ATI HI NGA TI WONA
Kuva ni mthumo ni male nda lisima kambe kha ha fanela ku si tumelela si hi tsivela ku hi khozela Jehovha.
Ngu tihi ti u nga ti gonda
-
U nga maha txani ti to u va ni mawonelo a manene ngu mthumo?
-
Ngu kutxani ti txi lava hi tsaka ngu si hi ku naso?
-
U nga kombisisa kutxani ti to wa themba txithembiso txa Jehovha txa ti to a na xayisa vathu vakwe?
XOTA TIMWANI
Ina Bhiblia yi womba to ti bihile kuva ni male?
“Ina male ngu wona m’kuluti wa wubihi wotshe?” (Msungo mhaka wu ku ka site)
Wona nzila ayi hi nga kombisako ngu yona wuha kasi ku hi tsakisa Txizimu.
“Bhiblia yi womba txani ngu ku kombisa wuha?” (Msungo mhaka wu ku ka site)
Ina ti bihile kutha bhatota kasi ku ti hungata?
“Wona ati Bhiblia yi ti wombako ngu Jogatina” (Khenjemuka! wa Março wa 2015)
Wona ati ti nga vhuna wamwamna wo kari ku e leka kutha bhatota ni kupa.
“Ani ni txi ti dhunda ku maha mapalisana ngu makavhalo” (Muwoneleli wa 1 ka Novembro wa 2011)
