GONDO 38
Ninga lisima ningo ya wutomi
Wutomi wa hi ninga mikhanjo yo maha to tala to tsakisa nguto. Hambi hi txi manana ni sikarato mbimo yimwani ta koteka kuva ni litsako. Se hi nga ti kombisisa kutxani ti to ha yi bonga ningo yiya ya wutomi? Ngu txihi txivangelo txa lisima nguto atxi txi hi mahako hi bonga ningo yoneyo ya wutomi?
1. Ngu kutxani hi di fanete kuninga lisima ningo yiya ya wutomi?
Hi fanete kuninga lisima wutomi nguko wona i ningo ayi yi tako ngu ka Tate wathu wa lirando Jehovha. Ene “txisima atxi txi ningako wutomi,” mwendo ku ngene a nga vanga wutomi wotshe. (Masalmo 36:9) Txizimu “txipune ngu txona txi ningako sotshe ka votshe, wutomi ni kuhefemula ni sotshe simaha.” (Mithumo 17:25, 28) Jehovha a hi ninga sotshe asi si lavekako ti to hi kota kuhanya. Kambe ene a tshumela e maha ti to ti koteka ku hi tidila ngu wutomi.—Lera Mithumo 14:17.
2. Hi nga kombisisa kutxani ti to ha m’bonga Jehovha ngu ku a nga hi ninga ningo yiya ya wutomi?
Kukhukhela ka ditshiku do khata adi mame wako a nga va ni txirumbu kala nyamsi Jehovha wa khatala ngu ngawe. Dhavhidha dilanda do thembeka da Txizimu a khongete a txi khene: “Maso ako ma ni woni ni si se velekwa.” (Masalmo 139:16) Eto ti womba ti to Jehovha a wona wutomi wako i di wa lisima ngutu. (Lera Matewu 10:29-31.) Jehovha wa pandiseka ngutu ngaku m’thu a txi daya m’thu kulowe mwendo a txi ti daya apune. a (Eksodha 20:13) Jehovha kha tsaki ngako hi txi veka haphangoni wutomi wathu ni wa vamwani. Ngako hi txi vhikela wutomi wathu ni wa vamwani hi kombisa ti to ha ninga lisima ningo yiya yo xamalisa ya wutomi.
ENGETELA WUZIVI WAKO
Wona tinzila timwani ati u nga kombisako ngo tona ti to wa yi ninga lisima ningo ya wutomi.
3. Khatalela dihanyo dako
Aku hi ku malanda ya Jehovha hi m’thembisile ku m’thumela wutomi wathu wotshe. Hi txi maha toneto to fana ni kuningela mimidi yathu kota magandelo ka Txizimu. Lera Varoma 12:1, 2, mi gwita mi bhula ngu siwotiso siya:
-
Ngu kuya ngu m’bhalo wuwa nji txani atxi txi nga ku vhunako ti to u khatalela dihanyo dako?
-
Ngu tihi timwani tinzila ati u nga ti thumisako kasi kumaha toneto?
4. Tiwonele kumaha tiphango ni kudaya
Bhiblia ya hi kuzeta kuvayilela ati ti nga hi betako ka phango. Xalela VHIDHIYO kasi kuwona ati u nga ti mahako ti to u zumba u di vhikelekile.
Lera Mavingu 22:3, mi gwita mi bhula ngu ti awe ni vamwani mi nga ti mahako ti to mi si weli ka phango . . .
-
mi di mtini.
-
mi di mthumoni.
-
mi di ka misakano.
-
mwendo mi di ka so tsimbila ngu sona so fana ni mmovha, mota, bhasikeni ni simwani so nga soneso.
5. Xonipha wutomi wa mwanana awu a ku ngadi mndani
Dhavhidha a txhamusete ti to Jehovha wa khatala ngu totshe ati ti mahekako ngu mwanana awu aku ngadi mndani ka mame wakwe. Lera Masalmo 139:13-17, mi gwita mi bhula ngu txiwotiso txiya:
-
Ngu kuya ngu mawonelo a Jehovha wutomi wa mwanana wu khata mbimo ayi mame a manako txirumbu mwendo mbimo yi mwanana a velekwako?
Milayo ayi Jehovha a nga txi ninga Vaisrayeli va kale yi txi vhikela mame ni mwanana awu a nga ti ngadi mndani. Lera Eksodha 21:22, 23, mi gwita mi bhula ngu siwotiso siya:
-
I ti yahi mawonelo a Jehovha ngu m’thu wu ngu phazamo a nga txi daya mwanana a di ngadi mndani ka mame wakwe?
-
Jehovha a ti pfisa kutxani ngu m’thu wu a dayako mwanana awu a ku ngadi mndani ka mame wakwe khakwenye? b
-
U khawe txani ngu mawonelo a Jehovha ka mhaka yiya?
Hambi wamsikati awu a tizivako ti to wutomi mbwa lisima ti nga maha a eva ka txiemo atxi a nga wonako nga kha ku na timwani a nga ti mahako i singa kudola txirumbu. Lera Isaya 41:10, mi gwita mi bhula ngu siwotiso asi si londiselako:
-
Se, ngako wamsikati atxi kuzetwa kudola txirumbu a nga kombela txivhuno ka mani? Ngu kutxani?
NGAKO VATHU VATXI KHONA: “Wamsikati wuhi ni wuhi a txhatxhekile ku ti sawulela kudola txirumbu mwendo nem nguko mmidi mbwakwe.”
-
Nji txani txi ku kholwisako ti to Jehovha wa ninga lisima wutomi wa wamsikati ni mwanana wakwe awu a ku ngadi mndani?
ATI HI NGA TI WONA
Bhiblia yi hi gondisa kudhunda, kuxonipha ni kuvhikela wutomi nguko i ningo ya lisima ayi Jehovha a nga hi ninga. Eto ti pata wutomi wathu ni wa vamwani.
Ngu tihi ti u nga ti gonda
-
Ngu kutxani wutomi wa m’thu i di wa lisima masoni ka Jehovha?
-
Jehovha a ti pfisa kutxani ngako m’thu a txi thavisa wutomi wa mmwani m’thu khakwenye?
-
Ngu kutxani hi txi ninga lisima ningo ya wutomi?
XOTA TIMWANI
Hi nga ti kombisisa kutxani ti to ha m’bonga Jehovha ngu ningo yiya ya wutomi?
Ina Jehovha a nga m’divalela wamsikati awu a nga khala kudola txirumbu?
“Bhiblia yi womba txani ngu kudola txirumbu?” (Msungo mhaka wu ku ka site)
Mawonelo a Jehovha ngu wutomi ma fanete ku gwesa nzila yi hi sawulako ngu yona misakano ayi yi si hi betiko ka phango.
“‘Ina hi nga belela misakano ayi yi nga hi betako ka phango?” (Khenjemuka! wa 8 ka Outubro wa 2000)
Ku nga mahwa txani ngaku m’thu a di ni mipimiso yo lava ku ti daya? Wona ati Bhiblia yi nga m’vhunisako tona.
a Jehovha wa ku pfisisa kupandiseka ka wu a lavako ku ti daya; ngu toneto a lava ku mvhuna. Jehovha a hafuhi ka vale va ku kupandisekani ka mbilu. (Masalmo 34:18) Kasi kuwona ati Jehovha a nga va vhunisako tona ava va pimisako ku tidaya wona msungo mhaka awu wu ku: “I tshuko kufa—Ina Bhiblia yi nga ni vhuna ngaku ni di ni mialakanyo ya kulava ku ti daya?” ka txienge atxi txi ku: Xota timwani, ka gondo yiya.
b Wamsikati awu a nga khala kudola txirumbu a si se gonda ditshuri, kha fanela ku tipfa mnando kupinda mpimo nguko Jehovha a nga m’divalela. Ti to u mana ati ti nga engeteleka wona msungo mhaka awu wu ku: “Bhiblia yi womba txani ngu kudola txirumbu?” ka txienge atxi txi ku: Xota timwani.
