GONDO 44
Ina yotshe mibuso ya tsakisa Txizimu?
Jehovha a lava ti to hi tsaka hi tshumela hi va ni mbimo yo hungala. Ina otshe maferiyadhu ma mu tsakisa Jehovha? Hi nga li kombisisa kutxani lirando lathu ngu Jehovha ka mhaka yiya?
1. Ngu kutxani maferiyadhu o tala ma si mu tsakisi Jehovha?
Ti nga maha u xamala ngu kuziva ti to maferiyadhu o tala ma seketetwe ka tigondo ati ti si tsimbilelaniko ni Bhiblia. Mwendo ati ti nga seketelwa ka wukhongeli wa makuhu. Ti nga maha maferiyadhu oneyo ma di seketetwe ka wuñanga mwendo kutsimbitisana ni ti to m’thu a ni moya awu wu si fiko. Mamwani maferiyadhu ma tsimbitisana ni siyila-yila ni kukholwa ko mana tinjombo. (Isaya 65:11) Jehovha a alakanyisa malanda akwe a txi khene: ‘Ti hambaniseni navo, mi nga gweseni txilo txo mbi basa.’—2 Vakorinto 6:17. a
2. Jehovha a tipfisa kutxani ngu maferiyadhu aya ma ningako wudhumo vathu?
Jehovha wa hi bhasopisa ti to hi si weli ka mlawu wo ‘themba m’thu.’ (Lera Jeremiya 17:5.) Yimwani mibuso yi mahilwe ngu nzila yo ndunduzela vathu ni ku va khozela, vo fana ni masotxhwa mwendo vafumeli. Mamwani ma mahetwe kukhozela matiko mwendo m’jeke. (1 Johani 5:21) Kasi mamwani ma tsimbitisana ni timhaka ta politika mwendo mikhuva yimwani ya ditiko. U pimisa ti to Jehovha a ti pfisa kutxani ngako hi txi pateka ka maferiyadhu aya ma dhumisako vathu, mwendo tisengeletano ati ti kuzetako timhaka ati a si ti dhundiko?
3. Ngu yihi mikhuva yimwani ayi yi mahako mibuso yimwani yi si amukeleki?
Bhiblia ya nyenya “wudevi ni makolo ni masuke.” (1 Pedro 4:3) Ka mibuso yimwani vathu va sela ngutu ni kumaha wugango. Ti to hi va vangana va Jehovha hi fanete hi vayilela mikhuva yoneyo yo biha.
ENGETELA WUZIVI WAKO
Wona nzila yi u nga tsakisako ngu yona Jehovha ni kumaha sisungo sa sinene sa ti to u nga pateka mwendo kwa mbi pateka ka mibuso.
4. Vayilela mibuso ayi yi si tsakisiko Jehovha
Lera Vaefesu 5:10, mi gwita mi bhula ngu siwotiso siya:
-
Ngu tihi ati ti lavako hi tsaniseka ka tona hi txi lava kumaha txisungo txa ti to hi nga pateka ka mibuso yo kari?
-
Ngu yihi mibuso ayi yi nga toloveleka amu u zumbako kona?
-
Ina u pimisa ti to mibuso yoneyo ya mu tsakisa Jehovha?
Ngu txikombiso, ina u ta nga tiwotisa ti to Txizimu txi ti pfisa kutxani ngu kutsakela masiku a kuvelekwa? Bhiblia kha yi womba-wombi ngu dilanda ni da dimwedo da Jehovha adi di nga nga tsakela malembe a kuvelekwa. Amu ka Bhiblia kuwomba-wombwa ngu mibuso yimbidi yo tsakela malembe a kuvelekwa ayi yi nga mahwa ngu vathu ava va nga si thumeli Jehovha. Lera Genesisi 40:20-22 ni Matewu 14:6-10. Mi gwita mi bhula ngu siwotiso siya:
-
Ngu tihi ti mibuso yiya yi fanako ka tona?
-
Ngu kuya ngu tindimana tiya, u wona to Jehovha a yi wonisa kutxani mibuso yiya?
Ti nga maha u tiwotisa tiya: ‘Jehovha a ti pfisa kutxani hi txi tsakela malembe athu a kuvelekwa mwendo maferiyadhu mamwani aya ma si tsimbitisaniko ni ti hi ti gondako amu ka Bhiblia?’ Lera Eksodha 32:1-8. Mi xalela VHIDHIYO mi gwita mi bhula ngu siwotiso asi si londiselako.
-
Ngu kutxani i di ta lisima kutsaniseka ngu ti ti tsakisako Jehovha?
-
Hi nga ti mahisa kutxani toneto?
Hi nga ti zivisa kutxani ti to feriyadhu yo kari kha yi txi tsakisi Txizimu
-
Ina yi seketetwe ka ti hi ti gondako amu ka Bhiblia? Zama kuziva amu yi khatelako kona feriyadhu yoneyo.
-
Ina yona yi ninga wudhumo ka vathu, tisengeletano mwendo ka ditiko do kari? Athu hi dhumisa Jehovha, ni ku hi themba ti to ngene a no lulamisa sikarato sotshe hamafuni.
-
Vathu va ti ñolisa kutxani ka mibuso yoneyo? Ina va maha ati Bhiblia yi wombako to tibihile? Kulava hi va ni mahanyelo o basa.
5. Vhuna vamwani ti to ve xonipha txisungo txako
Mbimo yimwani ti nga karata kulamba ngako va txi kusinzisa kupateka ka mibuso ayi yi si tsakisiko Jehovha. Txhamusela txisungo txako ngu nzila ya txixonipho ni kulaphisa mbilu. Kasi ku u wona to u nga mahisa kutxani, xalela VHIDHIYO.
Lera Matewu 7:12, mi gwita mi bhula ngu siwotiso siya:
-
Ngu kuya ngu ndimana yiya, ina i ngava i di tatinene kusinzisa maxaka a wena ku ma si pateki ka feriyadhu yo kari?
-
U nga ti kombisisa kutxani ti to hambiku hi si patekiko ka feriyadhu yo kari kha ti wombi ti to u wite wuxaka navo?
6. Jehovha a lava ti to hi tsaka
Jehovha a lava ti to hi hungala ni maxaka ni vangana vathu. Lera Ekleziyaste 8:15, mi gwita mi bhula ngu txiwotiso txiya:
-
Ndimana yiya, yi tikombisisa kutxani ti to Jehovha a lava to hi tsaka?
Jehovha a lava ti to vathu vakwe ve sakana ni kuhungala votshe. Xalela VHIDHIYO kasi kuwona ati ti mahekako ka mtshangano wa m’ganga wa matiko otshe.
Lera Vagalatiya 6:10, mi gwita mi bhula ngu siwotiso siya:
-
Ina ti lava hi pateka ka mibuso ayi vathu va yi mahako kasi kukombisa ti to ha ‘maha wunene’ ka vamwani?
-
Nji txani atxi txi nga kumahako u tsaka, ngu sinziswa kuningela prezenti ka feriyadhu yo kari mwendo ngu ningela ngu ku u ko tilava ngu mbilu yako?
-
Tifakazi ta Jehovha kha ti emeli feriyadhu yo kari kasi kumahela fexta vanana vawe mwendo ku va ninga ma prezenti. Ngako u di ni vanana, ngu tihi timhaka to tsakisa ati u nga va mahelako?
NGAKO VATHU VA TXI KHONA: “Kha ni nga ni mhaka ni ti to yi khatela hani feriyadhu, txa lisima ngu hungala ni mwaya wangu, ni vangana vangu.
-
U nga khawe txani?
ATI HI NGA TI WONA
Jehovha wa tilava ti to hi hungala ni vangana vathu ni maxaka athu. Kambe wa ti nyenya ti to hi pateka ka mibuso ayi yi si m’tsakisiko.
Ngu tihi ti u nga ti gonda
-
Ngu sihi siwotiso asi si nga hi vhunako kuziva ti to feriyadhu yo kari kha yi m’tsakisi Jehovha?
-
Hi nga va vhunisa kutxani vamwayani kwathu ni vangana vathu ti to ve pfisisa txivangelo atxi txi hi mahako hi si pateki ka feriyadhu yo kari?
-
Hi tizivisa kutxani ti to Jehovha a lava hi tsaka hi tshumela hi sakana?
XOTA TIMWANI
Ngu yihi mibuso yimwani a yi Makristu ma si yi tsakeliko?
“Ngu kutxani Tifakazi ta Jehovha ti si pateki ka mibuso yimwani?” (Msungo mhaka wu ku ka site)
Wona mune wa sivangelo asi si kombisako to kutsakela masiku a kuvelekwa kha ti tsakisi Txizimu.
“Ngu kutxani Tifakazi ta Jehovha ti si tsakeli masiku a kuvelekwa?” (Msungo mhaka wu ku ka site)
Wona nzila yi mphya wo kari a nga kombisa ngu yona txixonipho mbimo yi a nga ti sekwa txikolwani ngu mhaka ya kwa mbi dya khisimusi.
Kutala ka Makristu ma mahile txisungo txa kwa mbi dya khisimusi. Va ti pfisa kutxani ngu txisungo txi va nga maha?
“Vona va mani thomba ya lisima” (Muwoneleli wa 1 ka Dezembro wa 2012)
a Wona Txhamuselo yo gwitisa 5 kasi kuziva to u nga maha txani ngako vamwani va txi tsakela maferiyadhu o kari.
