GONDO 53

Sawula misakano ayi yi no tsakisa Jehovha

TXHAYA

Jehovha ‘Njizimu txo tsaka.’ (1 Timoti 1:11) Ene a lava ti to hi tsaka ni ku hi ti dila ngu wutomi. Ni ku ene wa tsaka ngaku hi txi ti ninga mbimo yo humula. Ka gondo yiya hi na wona nzila ayi hi nga londolako ngu yona mbimo yathu yo humula kambe hi si divali ku tsakisa Jehovha.

1. Ngu tihi a ti hi fanelako ku ti khumbula ngaku hi txi sawula misakano?

Ngu tihi ati u dhundako ku ti maha ngu mbimo yo humula? Vamwani va dhunda kuzumba mtini va txi lera mabhuku, va txi engisela wutxenje, va txi xalela mafilmi mwendo kubela ka internet. Vamwani kha va ti dhundi kuzumba wukhalo wumwewo va dhunda ku ti dolota, kuya praya mwendo kusakana ni vangana vawe. Ti si nga ni mhaka ni ti to ngu tihi ti hi ti dhundako hi fanete ku tsaniseka ti to misakano yathu yi fanete kuva ayi yi “tsakisako Mkoma.” (Vaefesu 5:10) Ti ni lisima ku alakanyisisa ngu mhaka yiya nguko misakano yo tala ayi vathu va yi sawulako yi ni timhaka to tala ati ti si tsakisiko Jehovha to fana ni mazunga, ku ti ñola ko biha ngu ta mataho ni wuñanga. (Lera Masalmo 11:5.) Nji txani txi no hi vhuna kusawula kwati misakano yathu?

Ngako hi txi sawula vangana ava va randako Jehovha vona va nga hi kuzeta kumaha timhaka ta tinene ni ku hi vhuna kusawula kwati misakano ya yinene. Nga ha hi nga ti wona ngu kona ka gondo 48 “awu a tsimbilako ni titxhari a na txhariha.” Ngu toneto ngaku hi txi heta mbimo yo tala ni vathu ava va si randiko Jehovha hi “na xaniswa.”—Mavingu 13:20.

2. Ngu kutxani ti di ni lisima kuwona mbimo yi hi yi hetako hi di ka misakano?

Hambi i di ti to msakano wu hi wu sawulako mbwa wunene, ti lava hi ti wonela ti to hi si heti mbimo yo tala hi di ka wona. Ngaku hi si ti woneli hi nga pwata mkama wo maha mithumo ya lisima ngutu. Bhiblia yi hi kuzeta ti to hi ‘londola kwati mbimo yi hi ku nayo.’—Lera Vaefesu 5:15, 16.

ENGETELA WUZIVI WAKO

Wona nzila yi u nga mahako ngu yona sisungo sa sinene mayelano ni misakano.

3. Vayilela misakano yo biha

Ngu kutxani hi di fanete kusawula kwati misakano yathu? Xalela VHIDHIYO, mi gwita mi bhula ngu siwotiso asi si londiselako.

VHIDHIYO: Ngu wuhi msakano awu ni nga wu sawulako? (4:39)

Misakano ya kale ya Varoma yi fanisa kutxani ni misakano ya nyamsi?
Ka vhidhiyo ngu tihi a ti Daniel a nga ti gonda mayelano ni misakano?

Lera Varoma 12:9, mi gwita mi bhula ngu txiwotiso txiya:

Ndimana yiya yi nga ku vhunisa kutxani ti to u sawula misakano ya yinene?

Ngu sihi silo si Jehovha a si nyenyako? Lera Mavingu 6:16, 17 ni Vagalatiya 5:19-21. Msana ko lera m’bhalo wumwani ni wumwani bhulani ngu txiwotiso txiya:

Ka timhaka ti ti nga xaxametwa ka mavhersikulo yawa, ngu tihi ati ti nga toloveleka ka misakano ya ngweno?

U nga yi sawulisa kutxani misakano ngu nzila ya yinene?

Ti wotise tiya:

Wu ni txani? Ina msakano wuwa wu pata timhaka ti Jehovha a ti nyenyako?
Ngu mbimo muni? Ina msakano wuwa wu na mbi khulumetela timhaka ta lisima ngutu?
Na sakana ni mani? Ina msakano wuwa wu na ni maha ni zumba ni vathu ava va si randiko Jehovha?

Ngako ti txi koteka, nda lisima kuvayilela phango yi di ngadi kule. Ngako hi si tsaniseki ti to msakano wo kari mbwa wunene mwendo wu bihile, i tshuko hi tekela ku wu vayilela

4. Thumisa mbimo yako ngu wutxhari

Xalela VHIDHIYO, mi gwita mi bhula ngu txiwotiso atxi txi londiselako.

VHIDHIYO: Nji txani txi purako mbimo yako? (2:45)

Hambiku mwanathu awu hi nga mu wona ka vhidhiyo a nga ti si xaleli timhaka to biha, ngu tihi ati ti ngava txikarato kwakwe?

Lera Vafilipiya 1:10, mi gwita mi bhula ngu txiwotiso txiya:

Ndimana yiya yi nga hi vhunisa kutxani ti to hi ziva mbimo yi hi no yi heta hi txi sakana?

5. Tiwonele mbimo yi u sawulako misakano

Ditshuri ti to misakano yimwani kha yi mtsakisi Jehovha, kambe ku ni to tala ati hi nga ti mahako kasi ku hi hungata. Lera Ekleziyaste 8:15 ni Vafilipiya 4:8, mi gwita mi bhula ngu txiwotiso txiya:

Ngu yihi misakano ayi u yi dhundako?

U nga tidila ni kuhungata ngu misakano yo tsakisa

NGAKO VATHU VA TXI KHONA: “Ani kha ni nga ni mhaka ni kuxalela mafilmi, kulera mabhuku aya ma womba-wombako ngu mazunga, kutiñola ko biha ngu ta mataho mwendo wuñanga. Txa lisima nguva ni si mahi timhaka toneto.”