GONDO 57

Ngako u txo thuka u maha txionho txa hombe u nga maha txani?

TXHAYA

Hambi u txi mdhunda Jehovha ni ku tikaratela kumaha kudhunda kwakwe mbimo yimwani u nga thuka u maha sionho. Hambi keto, sionho simwani nza hombe kupinda simwani. (1 Vakorinto 6:9, 10) Ngako u txo thuka u maha txionho txa hombe, khumbula ti to Jehovha a nga txi kuranda ni ku ene wa ti lava kukuvhuna.

1. Hi nga maha txani ti to Jehovha e hi divalela?

Ava va randako Jehovha va txo thuka ve maha txionho txa hombe va pandiseka ngutu. Kambe ta thavelela kuziva ati Jehovha a thembisako vathu vakwe to khene: “Hambi ngako sionho sanu si di mi bhilivilisile mifana ni txiwunguwungu, si na basa kufana ni hunguva.” (Isaya 1:18) Ngako hi txi tisola ti txi huma mbiluni, Jehovha a na hi divalela. Hi nga kombisisa kutxani ti to ha tisola? Hi nga kombisa kutisola ti txi huma mbiluni ngu kuleka kumaha to biha hi simama hi kombela divalelo ka Jehovha. I si nga eto dwe, hi na tikaratela kuleka kupimisa to biha ni mikhuva ayi yi nga hi maha hi onha, se hi tikaratela kumaha ati Jehovha a ti lavako.—Lera Isaya 55:6, 7.

2. Jehovha a ma thumisisa kutxani madhota ti to me hi vhuna ngako hi di mahile txionho?

Ngako hi di mahile txionho txa hombe Jehovha a khene hi na “dhane madhota a Dibanza.” (Lera Jakobe 5:14, 15.) Ona ma mdhunda Jehovha kumweko ni va va mkhozelako. Madhota ma lungekete ku hi vhuna ti to hi tshumela hi va ni wuxaka wo tsana ni Jehovha.—Vagalatiya 6:1.

Madhota ma hi vhunisa kutxani ngako hi txi maha txionho txa hombe? Madhota mambidi mwendo mararu ma na thumisa Bhiblia kasi ku hi komba ti to ngu kutxani ati hi nga maha i di txionho. Ona ma na hi gela ati hi nga ti mahako ni ku hi ninga sialakanyiso so hi vhuna kasi ku hi si tshumeli hi maha txionho txonetxo. Madhota ma nga wona ti to i tshuko hi si pateki ka mithumo yo kari ya dibanzani kudingana mbimo yo kari kala hi wuseta wumoya wathu. Ngako awu a nga maha txionho a si ti soli madhota ma nga sunga ku mthavisa dibanzani kasi kuvhikela vamwani ka mikhuva yakwe yo biha.

ENGETELA WUZIVI WAKO

Wona nzila yi Jehovha a nga hi vhunako ngu yona ngako hi di mahile txionho txa hombe.

3. Kuwomba sionho sathu ta hi vhuna

Ngako hi txi onha hi henyisa Jehovha, ngu toneto ku lava hi m’gela sionho sathu. Lera Masalmo 32:1-5, mi gwita mi bhula ngu txiwotiso txiya:

Ngu kutxani i di tatinene kugela Jehovha sionho si hi nga maha hahanze ko zama ku si sisa?

Hi txi gela Jehovha sionho sathu hi fanete kutshumela hi kombela txivhuno ka madhota nguko eto ti na hi maha hi tipfa kwati. Xalela VHIDHIYO, mi gwita mi bhula ngu txiwotiso atxi txi londiselako.

VHIDHIYO: “Jehovha wa kawuka ava a va randako” (3:01)

Ngu kuya ngu vhidhiyo, madhota ma mvhunisile kutxani Canon ti to e tshumelela ka Jehovha?

Mbimo yi hi gelako madhota sionho sathu kha ha fanela kuthava, mwendo ku ma sisela timwani nguko ona ma lava ku hi vhuna. Lera Jakobe 5:16, mi gwita mi bhula ngu txiwotiso txiya:

Ngu kutxani ti txi ma hehukela madhota ngako hi txi ma gela sionho sathu hi si ma siseli txilo?

Tumela txionho txako, ma gele ditshuri madhota ni kutumela txivhuno txa Jehovha txa lirando

4. Ngu yihi wuyelo yo thavisa dibanzani m’thu wu a si hundukiko?

Ngako m’thu wu a nga maha txionho txa hombe a txi lamba kulondisa milayo ya Jehovha, kha fanela kusimama dibanzani. Ene wa thaviswa dibanzani hi si swi hi patana nayo hambi kuwomba-womba nayo. Lera 1 Vakorinto 5:6, 11 ni 2 Johani 9-11, mi gwita mi bhula ngu txiwotiso txiya:

Kufana ni mtshumbelo wu vilisako wurathi, kupatana ni muonhi awu a si hundukiko ti nga onhisa kutxani dibanza?

Vathu vo tala ava va nga ti thavisilwe dibanzani va tshumete ve wuyela nguko hambiku kulaywa koneko ku nga ti panda, ku va vhuni ve wona ti to ati va nga ti ti maha ti bihile. (Masalmo 141:5) Xalela VHIDHIYO, mi gwita mi bhula ngu txiwotiso atxi txi londiselako.

VHIDHIYO: Seketela kulamula ka Jehovha ngu kuthembeka (9:28)

Ngu kuya ngu vhidhiyo, kuthaviswa dibanzani ku mvhunisile kutxani Sóni?

Kuthavisa m’thu dibanzani . . .

ti di dhumisa ngu nzila yihi ditina da Jehovha?
ti kombisa ngu nzila yihi ti to Jehovha wa hi alakanyela ni ku wa hi randa?

5. Jehovha wa hi divalela ngako hi txi ti sola

Jesu a thumisile txidinganiso atxi txi hi vhunako kuziva nzila yi Jehovha a tipfako ngu yona ngako m’thu a txi ti sola. Lera Luka 15:1-7, mi gwita mi bhula ngu txiwotiso txiya:

M’bhalo wuwa wu ku gondisa txani ngu Jehovha?

Lera Ezekhiyele 33:11, mi gwita mi bhula ngu txiwotiso txiya:

Ngu tihi ati m’thu a fanelako kumaha kasi kukombisa ti to wa tisola ngu ditshuri?

Kufana ni m’dyisi, Jehovha wa khatala ngutu ngu tinvuta takwe

NGAKO VATHU VA TXI KHONA: “Na thava kugela madhota txionho txangu nguko ni nga thaviswa dibanzani.”

U nga khawe txani ka m’thu wu a tipfako ngu nzila yoneyo?

ATI HI NGA TI WONA

Ngako hi di mahile txionho txa hombe, hi txi tisola ti txi huma mbiluni ni ku tiemisela kuleka kumaha to biha, Jehovha a na hi divalela.

Ngu tihi ti u nga ti gonda

Ngu kutxani i di ta tinene kugela Jehovha sionho sathu?
Ku laveka hi maha txani kasi ku hi divalelwa sionho sathu?
Ngako hi di mahile txionho txa hombe, ngu kutxani hi di fanete kukombela txivhuno ka madhota?

Ni hetile gondo yiya ngu:

U nga maha tiya:

Ziva madhota a dibanzani kwanu.

Mwendo tiya:

Your other goal

XOTA TIMWANI

Wona nzila yi dijaha dimwani di nga kombiswa ngu yona wuxinji wa Jehovha awu wu nga txhamuselwa ka Isaya 1:18.

U nga kanakani wuxinji wa Jehovha (5:02)

Ngako m’thu wu a nga onha atxi thaviswa dibanzani a wuyeliswa kutxani ene kumweko ni dibanza?

“Ngu kutxani malulamiselo o thavisa m’thu dibanzani ma txi kombisa lirando” (Muwoneleli wa 15 ka Abril wa 2015)

Wona to u nga mtxhamuselisa kutxani m’thu wu i si ngako Fakazi malulamiselo o thavisa m’thu dibanzani.

“Ina Tifakazi ta Jehovha kha ti manani ni vathu ava va nga khala kuva siro sa wukhongeli wa tona?” (Msungo mhaka wu ku ka site)

Ka mhaka ayi yi ku: “Ni ti lava kutshumelela ka Jehovha,” wona ati ti nga maha dijaha dimwedo adi di nga ti lekile ditshuri di wona to Jehovha wa tilava ku di tshumelela kwakwe.

“Bhiblia ya txitxa wutomi wa vathu” (Muwoneleli wa 1 ka Abril wa 2012)