GONDO 59
U nga sikota kutsanisela u txi xaniswa!
Hotshethu hi na xaniswa mwendo kukanetwa, i ngava mbimo ayi yi tako mwendo konku. Ina toneto ti fanete ku hi dhukisa?
1. Ngu kutxani hi di emete ku xaniswa?
Bhiblia yi ti vekile hakubasani ti to “votshe va va lavako kuhanya ngu wukhongeli ngu ka Kristu Jesu, va na xaniswa.” (2 Timoti 3:12) Jesu a xanisilwe nguko a si lumbi ditiko diya da Sathani. Aku nathu hi si lumbiko ditiko diya, kha ta fanela ku hi xamatisa ngako hi txi xaniswa ngu wukoma wa mafu yawa ni tisengeletano ta wukhongeli.—Johani 15:18, 19.
2. Hi nga ti lulamiselisa kutxani ti to hi ta wonisana ni ku xaniswa?
Kulava hi tsanisa kuthemba kwathu Jehovha konkuwa hi si se khata ku xaniswa. Ditshiku ni ditshiku tihe mbimo yo maha mkombelo ni kugonda Bhiblia. Xalela yotshe mitshangano. U txi maha tiya ti na kuninga txibindi txo wonisana ni ku xaniswa hambi i di ti to u wukelwa ngu maxaka. Mpostoli Paulo awu mbimo yo tala a nga xaniswa a bhate tiya: “Mkoma ngene txivhuno txangu, kha ni nambi thava txilo.”—Vahebheru 13:6.
Tximwani atxi txi nga hi vhunako kuengetela txibindi txathu ngu txhumayela mbimo yotshe. Kutxhumayela ti hi gondisa kuthemba Jehovha ti tshumela ti hi vhuna ku hi si thavi vathu. (Mavingu 29:25) Ngaku u txo va ni txibindi txo txhumayela konkuwa u nava u di lungekile ku ta simama u txhumayela hambi ngako wukoma wu txo ta tsimbisa mthumo wathu wo txhumayela.—1 Vatesalonika 2:2.
3. Hi na wuyelwa ngu txani ngako hi txo tsanisela ku xaniswa?
Ditshuri ti to kha hi ku tsakeli ku xaniswa kambe ngako hi txi tsanisela, likholo lathu li na tsana. Mbimo yi hi wonako mtamo wa Jehovha wu txi hi vhuna ka sikarato asi hi wonako nga kha hi nge sikoti kutsanisela, ti hi maha hi m’themba ngutu Jehovha. (Lera Jakobe 1:2-4.) Jehovha kha tsaki ngu ku hi wona hi txi xaniseka, hambi keto wa tsaka ngu ku hi wona hi txi tsanisela. Bhiblia yi womba tiya: “Ngako mi txi mana sixaniso ngu kumaha wunene, kutimisela kwanu ka tsakisa Txizimu.” (1 Pedro 2:20) Ngako hi txi simama hi tsanisela Jehovha a hi thembisa ku ta hi ninga wutomi wo mbi guma ka ditiko da diphya aha ku no mbi ta va ni wo hi wukela.—Matewu 24:13.
ENGETELA WUZIVI WAKO
Wona ti to hi nga simamisa kutxani hi di thembekile ka Jehovha hambi hi txi xaniswa. Ni ku ngu ahi makatekwa aya hi ma manako ngu kumaha toneto.
4. U nga xula u txi wukelwa ngu maxaka
Jesu a wombile ti to ti nga maha maxaka ako me kuwukela ngako u txi maha txisungo txo thumela Jehovha. Lera Matewu 10:34-36, mi gwita mi bhula ngu txiwotiso txiya:
-
Ku nga maheka txani ngako mmweyo ha mwayani a txi sawula kuthumela Jehovha?
Ti to u wona txikombiso txa toneto, xalela VHIDHIYO, mi gwita mi bhula ngu txiwotiso atxi txi londiselako.
-
U nga maha txani ngako dixaka mwendo mngana a txi zama kukulekisa kuthumela Jehovha?
Lera Masalmo 27:10 ni Marku 10:29, 30. Msana ko lera m’bhalo wumwani ni wumwani bhulani ngu txiwotiso txita:
-
Txithembiso txiya txi nga kuvhunisa kutxani mbimo yi u wukelwako ngu maxaka mwendo vangana?
5. Simama u thumela Jehovha hambi u txi xaniswa
Ti lava txibindi kuthumela Jehovha ngako vamwani va txi zama kukulekisa. Xalela VHIDHIYO, mi gwita mi bhula ngu txiwotiso atxi txi londiselako.
-
Ati u nga ti wona ka vhidhiyo ti tsanisisa kutxani likholo lako?
Lera Mithumo 5:27-29 ni Vahebheru 10:24, 25. Msana ko lera m’bhalo wumwani ni wumwani bhulani ngu txiwotiso txiya:
-
Ngu kutxani i di ta lisima kusimama hi thumela Jehovha hambi hi txi tsimbiswa kutxhumayela ni kuya mitshanganoni?
6. Jehovha a na kuvhuna ti to u tsanisela
Tifakazi ta Jehovha ta titanga ni midhawuko yo hambana-hambana ta simama ti thumela Jehovha ngu kuthembeka hambi ti txi wonisana ni ku wukelwa. Ti to u wona ati ti nga vhuna vanathu vonevo, xalela VHIDHIYO. Mi gwita mi bhula ngu txiwotiso atxi txi londiselako.
-
Ngu kuya ngu vhidhiyo, nji txani txi nga vhuna vanathu ti to ve simama ve tsanisela?
Lera Varoma 8:35, 37-39 ni Vafilipiya 4:13. Msana ko lera m’bhalo wumwani ni wumwani bhulani ngu txiwotiso txiya:
-
M’bhalo wuwa wu kutsanisekisa ngu nzila yihi ti to u nga sikota kuxula sikarato?
Lera Matewu 5:10-12, mi gwita mi bhula ngu txiwotiso txiya:
-
Ngu kutxani u nga tsakako hambi u txi xaniswa?
Vanathu vo tala va simama ve thumela Jehovha ngu kuthembeka hambi va txi xaniswa. Nawe u nga sikota!
NGAKO VATHU VA TXI KHONA: “Ani ni nge sikoti kutsanisela ku xaniswa.”
-
Ngu wuhi m’bhalo awu wu nga mvhunako ti to e va ni txibindi atxi txi lavekako?
ATI HI NGA TI WONA
Jehovha wa ninga lisima mizamo yathu yo m’thumela, hambi hi txi xaniswa ene a na hi vhuna ti to hi simama hi tsanisela!
Ngu tihi ti u nga ti gonda
-
Ngu kutxani Makristu ma di tiemete ku xaniswa?
-
Hi nga maha txani kasi ku hi ti lulamisela ti to hi ta wonisana ni ku xaniswa?
-
Nji txani txi kutsanisekisako ti to u nga sikota kuthumela Jehovha hambi u txi xaniswa?
XOTA TIMWANI
Wona ti Jehovha a nga vhunisa tona mwanathu wo kari mbimo yi a nga khotelwa ngu kwa mbi seketela ta politika.
Wona ati Jehovha a nga vhunisa tona mpatwa wo kari ti to wu simama wu thumela Jehovha kudingana malembe o tala hambi ku wu nga ti xaniswa.
Wona ti u nga tsaniselisako tona ngu txibindi mbimo si u wonisanako ni ku xaniswa.
Wona to ngu kutxani u sa fanela ku xamala ngako u txi xaniswa ngu maxaka. U tshumela u wona to u nga simamisa kutxani u kombisa kuthutha ni kuthumela Jehovha ngu kuthembeka.
“Ditshuri di tisa ditxhari i singa kudikha” (Muwoneleli wa Outubro wa 2017)
