GONDO 60

Simama u kula ngu didhawa da moya

TXHAYA

Ka kursu yiya ya Bhiblia u gondile to tala ngu Jehovha. Totshe ati u nga ti gonda ti ku mahile u mranda ngutu Jehovha se ti nga maha u di tiningetete kwakwe ni kubhabhatiswa. Ngako u si se bhabhatiswa ti nga maha u di ni makungo o u bhabhatiswa ku si nga kale. Kambe kukula ngu didhawa da moya kha ti gwiteli ko bhabhatiswa. U nga ya masoni u tshuketela hafuhi ni Jehovha ngu ha ku si gumiko. U nga ti mahisa kutxani toneto?

1. Ngu kutxani u di fanete kusimama u tsanisa wungana wako ni Jehovha?

Hotshethu hi fanete ku ti karatela kusimama hi tsanisa wungana wathu ni Jehovha. Ngu kutxani? Hi fanete kumaha toneto “kasiku hi si timeli nzila.” (Vahebheru 2:1) Nji txani atxi txi nga hi vhunako ti to hi simama hi thumela Jehovha ngu kuthembeka? Ti lava hi hiseka ka mthumo wo txhumayela ni kulava tinzila to maha ati ti nga engeteleka ka mthumo wa Jehovha. (Lera Vafilipiya 3:16.) Kuthumela Jehovha ngu tona i ku ta lisima ngutu ka wutomi wathu.—Masalmo 84:10.

2. Ngu tihi timwani ati u fanelako kusimama u ti maha?

Hambiku kursu yako ya Bhiblia yi nga gwita wutomi wako kota Mkristu wa simama. Bhiblia yi khene hi fanete “kuteka mahanyelo a m’thu wamphya.” (Vaefesu 4:23, 24) Ngako u txi simama u gonda Bhiblia ni kuya mitshanganoni, u na gonda ta tiphya ngu Jehovha ni mazumbelo akwe. Lava tinzila to mtekelela ka wutomi wako. Yana masoni u txitxa mahanyelo kasi ku u tsakisa Jehovha.

3. Jehovha a na kuvhunisa kutxani ti to u kula ngu didhawa da moya?

Bhiblia yi womba tiya: “Txizimu . . . txi na mi wusa ni ku mi aka, ni ku mi tsanisa, mi si xulwi ngu txilo.” (1 Pedro 5:10) Hotshethu ha dukwa. Kambe Jehovha wa hi ninga asi hi si lavako ti to hi zumba hi di tsani. (Masalmo 139:23, 24) Ene wa hi thembisa ku hi ninga mtamo ni kunavela ku hi mthumela ngu kuthembeka.—Lera Vafilipiya 2:13.

ENGETELA WUZIVI WAKO

Wona to u nga simamisa kutxani u kula ngu didhawa da moya ni nzila ayi Jehovha a no ku katekisa ngu yona.

4. Mbimo yotshe bhula ni mngana wa wena

Mkombelo ni kugonda Bhiblia ti ku vhuni ti to u va mngana wa Jehovha. Se toneto ti kuvhunisa kutxani ti to u tshuketa hafuhi nayo?

Lera Masalmo 62:8, mi gwita mi bhula ngu txiwotiso txiya:

U nga wu tshukwatisisa kutxani mkombelo wako kasi kutsanisa wungana wa wena ni Jehovha?

Lera Masalmo 1:2, mi gwita mi bhula ngu txiwotiso txiya:

U nga yi tshukwatisisa kutxani nzila yi u lerako ngu yona Bhiblia kasi u kutsanisa wungana wako ni Jehovha?

U nga maha txani ti to u wuyelwa ngu gondo yako ya m’thu a pune? Kasi ku u wona timwani ati u nga ti mahako, xalela VHIDHIYO, mi gwita mi bhula ngu siwotiso asi si londiselako.

VHIDHIYO: Vana ni gondo ya Bhiblia ya m’thu a pune yo tshima (5:22)

Ngu a hi mamahelo mamwani aya ma ku ka vhidhiyo yiya aya u nga ma thumisako?
Ngu tihi timhaka ati u nga tsakelako kugonda ngu tona?

5. Vana ni makungo ka mthumo wa Jehovha

Kuva ni makungo ka mthumo wa Jehovha ti na kuvhuna ku u simama u kula ngu didhawa da moya. Xalela VHIDHIYO, mi gwita mi bhula ngu txiwotiso atxi txi londiselako.

VHIDHIYO: Wutomi wo tsakisa (3:31)

Ngu kuya ngu vhidhiyo, Cameron a wuyelisilwe kutxani ngu ku tivekela makungo a moya?

Hi nga votshe va si kotako kurura veya ka ditiko dimwani ti to ve ya txhumayela. Kambe hi nga tivekela makungo aya hi nga kotako ku ma hokelela. Lera Mavingu 21:5, mi gwita mi bhula ngu makungo aya u lavako ku ma hokelela . . .

dibanzani.
ka mthumo wo txhumayela.

Ati ti wombwako ngu ndimana yiya ti nga ku vhunisa kutxani ti to u hokelela makungo ako?

Makungo aya u nga ma hokelelako

Tshukwatisa mikombelo yako.
Lera Bhiblia yotshe.
Ziva mmwani ni mmwani dibanzani.
Khata gondo ya Bhiblia u tshumela u yi tsimbitisa.
Teka wunyaphandule wo vhuneta mwendo wa mbimo yotshe.
Ngako u di mwanathu wa txiwamna, ti karateli kuva dilanda da wuthumeli.

6. Hanya wutomi wo tsakisa kala kupinduka!

Lera Masalmo 22:26, mi gwita mi bhula ngu txiwotiso txiya:

U nga maha txani ti to u tidila ngu wutomi konku ni ngu ha ku si gumiko?

ATI HI NGA TI WONA

Simama u tsanisa wungana wako ni Jehovha ni ku tivekela makungo a moya. U txi maha toneto u nga ta hanya wutomi wo tsakisa kala kupinduka!

Ngu tihi ti u nga ti gonda

Ngu kutxani u txi themba ti to Jehovha a na kuvhuna u kota ku mthumela ngu kuthembeka?
U nga wu tsanisisa kutxani wungana wako ni Jehovha?
Ku ti vekela makungo ti nga ku vhunisa kutxani ti to u kula ngu didhawa da moya?

Ni hetile kursu ya Bhiblia ngu:

U nga maha tiya:

Ka mitxima ayi yi tako lera dibhuku adi di ku: Achegue-se a Jeová ni di di ku: ‘Venha Ser Meu Seguidor.’ Mabhuku awa ma na kuvhuna ku u simama u tsanisa wungana wako ni Jehovha kumweko ni Mwanana wakwe Jesu Kristu.