GONDO 01

Ina Bhiblia yi ni txivhuno?

TXHAYA

Hotshethu ha tiwotisa siwotiso so kari mayelano ni wutomi, kuxaniseka, lifo ni wumangwana. Ha tshumela hi lava kuziva ti to hi nga yi manisa kutxani male, ni ku hi nga li manisa kutxani litsako ha mwayani? Vathu vo tala va ti woni ti to Bhiblia ya xamula siwotiso soneso ni kutshumela yi va ninga sileletelo simwani sa mahanyelo. Ina awe wa kholwa ti to Bhiblia yi nga kuvhuna?

1. Ngu sihi siwotiso asi Bhiblia yi si xamulako?

Bhiblia ya xamula siwotiso sa lisima so fana ni siya: I mani a nga vanga wutomi? Kasi hi hanyela txani? Ngu kutxani vathu va vanene va txi xupheka? Kumaheka txani ngako m’thu a txi fa? Aku hotshethu hi lavako kurula, ngu kutxani ku di ni tiyimbi? Ku na maheka txani ha mafuni mbimo ayi yi tako? Bhiblia yi womba to hi nga ti mana tixamulo ta siwotiso soneso. Vathu vo tala se va ti mani ni ku va tsakile ngutu.

2. Bhiblia yi nga hi vhunisa kutxani ti to hi pfa kutshamba kuhanya?

Bhiblia ya ninga sileletelo sa sinene. Yona ya gondisa timwaya ti to ti hanya ti di tsakile. Ya hi gela to hi nga maha txani ngako hi di ni txitrese, ni ku hi nga maha txani ti to hi tsakiswa ngu mthumo wathu. U na gonda timhaka tiya ni timwani ni wu u no gonda nayo Bhiblia. Ti nga maha nawe u txi kholwa ti to “yotshe Mibhalo [i ku totshe ati ti ku mu ka Bhiblia] ya . . . vhuna.”—2 Timoti 3:16.

Dibhuku diya kha di vhaleti Bhiblia. Kambe di ku kuzeta ku u gonda Bhiblia upune. Ngu toneto hi ku kuzeta ku u gonda yotshe mibhalo ayi yi nga kombiswa, u wona to yi yelanisa kutxani ni ti u ti gondako.

ENGETELA WUZIVI WAKO

Wona nzila yi Bhiblia yi nga vhunisa tona vamwani, u nga mahisa kutxani ti to u dhunda ku yi lera ni ku ngu kutxani ti txi lava txivhuno txa vamwani ti to u yi pfisisa.

3. Bhiblia yi nga hi kongomisa

Bhiblia yi fana ni digezi. Yona yi nga hi vhuna kumaha sisungo sa sinene ni ku hi gela ati ti no maheka mbimo ayi yi tako.

Lera Masalmo 119:105, mi gwita mi bhula ngu siwotiso siya:

Awu a nga bhala dibhuku diya da masalmo a txi yi wonisa kutxani Bhiblia?
Awe u yi wonisa kutxani Bhiblia?

4. Bhiblia yi nga xamula siwotiso asi hi ku naso

Wamsikati mmwani a mani tixamulo ta siwotiso asi si nga ti mu karata kudingana malembe o tala amu ka Bhiblia. Xalela VHIDHIYO, mi gwita mi bhula ngu siwotiso asi si londiselako.

VHIDHIYO: U nga gumelwi ngu themba! (1:48)

Ngu sihi siwotiso asi wamsikati awule hi nga mu wona ka vhidhiyo a nga ti naso?
Kugonda Bhiblia ti m’vhunisile kutxani?

Bhiblia yi hi kuzeta ku hi maha siwotiso. Lera Matewu 7:7, mi gwita mi bhula ngu txiwotiso txiya:

Ngu sihi siwotiso asi u ku naso, asi Bhiblia yi nga si xamulako?

5. Awe u nga ti dhunda kulera Bhiblia

Vathu vo tala va ti dhunda kulera Bhiblia ni ku va wuyelwa ngu yona. Xalela VHIDHIYO, mi gwita mi bhula ngu siwotiso asi si londiselako.

VHIDHIYO: Kulera Bhiblia (2:05)

Ngu kutxani vaphya ava hi nga va wona ka vhidhiyo va nga ti si dhundi kulera?
Konkuwa ngu kutxani va txi dhunda kulera Bhiblia?

Bhiblia yi ni timhaka ati ti nga hi thavelelako ni ku hi ninga themba. Lera Varoma 15:4, mi gwita mi bhula ngu txiwotiso txiya:

Ina ta kutsakisa kuziva ti to Bhiblia yi nga kuthavelela ni ku kuninga themba?

6. U nga vhunwa ngu m’thu mmwani ti to u pfisisa Bhiblia

Vathu vo tala va tumbute ti to kugonda Bhiblia ni m’thu mmwani ta vhuna ngutu kupinda ku yi lera u di wekha. Lera Mithumo 8:26-31, mi gwita mi bhula ngu txiwotiso txiya:

Hi nga maha txani ti to hi yi pfisisa kwati Bhiblia?—Wona vhersikulo 30 ni 31.

Dijaha dile da Muetiopiya di lavile txivhuno ti to di pfisisa Mibhalo. Ngu ha kufanako vathu vo tala nyamsi va ti wona i di tshuku kuvhunwa ngu m’thu mmwani ti to ve pfisisa Bhiblia

NGAKO VATHU VA TXI KHONA: “Kugonda Bhiblia ngu pwata mthumo.”