U nga duketa kumaha ti u nga ti kotako ti to u va ni wukati ni mwaya wu wu nga tsaka, kambe ku nga humelela thanga ngu ngani wu a nga mahako ti to ti ku nemelela kumana litsako. (Eklesiasta 9:11) Ngu lirando Txizimu txa hi ninga txivhuno hi txi tshangana ni siemo so nemela. U txi thumisa milayo yi yi londiselako ya mu ka Mibhalo, awe ni mwaya wako mi na si kota kulwisana naso, hambi siemo sa kona si txi nemela.

ATI DIBHIBHELE DI TI WOMBAKO: “Vekani masomi ka Txizimu kotshe kukarateka kwanu, nguko Txizimu ngu txona txi mi khatalelako.” (1 Pedro 5:7) Mbimo yotshe khumbulani ti to kha ma fanela kusola Txizimu mbimo yi mi lwisanako ni sikarato. (Jakobe 1:13) Mi txi tshuketa ka txona, txi na mi vhuna ngutu. (Esaya 41:10) “Va txi txi dhumisa ngu yotshe mbilu”.—Masalmo 62:8, NM.

Mi na thaveleleka mi txi lera ni kugonda diBhibhele ditshiku ni ditshiku. Mi txi maha toneto, mi na wona nzila yi Jehovha ‘a mi thavelelako ngu yona ka sotshe sixaniso sanu’. (2 Vakorinto 1:3, 4; Varoma 15:4) A thembisa ku mi ninga “kurula ka Txizimu, ku kupindako wotshe wuzivi”.—Vafilipiya 4:6, 7, 13.

NGU TIHI TI U NGA TI MAHAKO:

• Kombelelani txivhuno txa Jehovha ti to mi zumba mi di ni kurula ka mialakanyo

• Xolisisani ati mi nga ti mahako se mi maha ati ti mi wuyelisako

ATI DIBHIBHELE DI TI WOMBAKO: “Mbilu ya wu a pfisisako yi mana wuzivi, ni nzeve ya va vo txhariha yi khutalela kumana wuzivi.” (Swivuriso 18:15) Tikaratele kutumbula matipfelo a txiro tximwane ni tximwane txa mwaya. Bhulisana naso. Engisela.—Swivuriso 20:5.

U nga maha txani ku txi fa awu u mu dhundako? U nga thavi ku kombisa nzila yi u tipfako ngu yona. Khumbula ti to hambi ‘Jesu a dite’. (Johane 11:35; Eklesiasta 3:4) Nda lisima kuhumula ni kuotela mawora ya ma lavekako. (Eklesiasta 4:6) Eto ti na maha ti to ti ku hehukela kulwisana ni txiemo txo karata.

NGU TIHI TI U NGA TI MAHAKO:

• Ku si se humelela dikhombo, mi nga titoloveta kubhula kota mwaya. Mbimo yi ku no humelela sikarato, ti na mi hehukela kubhulisana ngu sona.

• Bhulisana ni vamwane ava va nga nga manana ni sikarato so nga soneso

ATI DIBHIBHELE DI TI WOMBAKO: ‘Mngana wa ditshuri a ni lirando mbimo yotshe, ni ku i mwanathu wu a velekwako ku di ni makhombo.’ (Swivuriso 17:17) Vangana vako va ti lava ku kuvhuna, kambe ti nga maha va si tizivi ti va nga mahisako tona. U nga thavi ku va gela ati u ti lavako. (Swivuriso 12:25) Lava txivhuno ngu didhawa da moya ka va va pfisisako diBhibhele. Mkongomiso wu va nga ku ningako wona wu wu humako ka diBhibhele wu na kuvhuna.—Jakobe 5:14.

U na mana txiseketelo txi txi lavekako idi ti to mbimo yotshe u titshanganisa ni vathu va ku ni likholo ka Txizimu ni va va thembako sithembiso sa txona. U na thaveleleka ngutu u txi lava kuvhuna ava va lavako ku kuzetwa. Va gele ngu ta likholo lako ka Jehovha ni sithembiso sakwe. Khutalela kuvhuna vamwane ni ku u si ti hambanisi ni va va kudhundako ni va va khatalako ngu ngawe.—Swivuriso 18:1; 1 Vakorinto 15:58.

NGU TIHI TI U NGA TI MAHAKO:

• Kombela txivhuno ka mngana wako wa hombe

• Ti veke hakubasani ati u lavako kuvhunwa ngu tona